自由講場 今日: 1451|主題: 1355099

演奸角通常被演好人角色更搶戲，每次啲角色越奸，越睇到你咬牙切齒你就越印象深刻。所以唔少演員都希望有機會演一次大奸角，除咗可以考驗演技之外，分分鐘仲大受歡迎添呀！今年亦有唔少演奸角嘅演員成功突圍而出，被觀眾大讚佢哋好演技。想知今年呢班奸角做得有幾出色有幾奸？一齊重溫吓啦～

1. 《巨輪II》高天鷲（吳岱融飾演）
吳岱融事隔22年回巢，喺年頭播出嘅《刀下留人》飾演奸角李孜省，之後就去到《巨輪II》又再飾演大奸角高天鷲。劇中佢飾演獸父多次想強姦養女Nana（陳凱琳飾演）、叫Wing（李佳芯飾）落仔兼侮辱佢、又打老婆、殺人等等。雖然人人都對高天鷲恨之入骨，但係反而令吳岱融人氣急升。薑始終都係愈老愈辣，連男主角蕭正楠都俾佢搶晒風頭，話一個高天鷲救起成套劇。唔少人大讚佢嘅演技可以將「變態」發揮得淋漓盡致，仲話佢絕對有資格拎「最佳男配角」。

2. 《城寨英雄》楊竹鑾（歐瑞偉飾演）
《城寨英雄》好評如潮，有咁好成績除咗因為故事特別、拳拳到肉之外，當然唔少得一班出色嘅演員啦！識睇當然係睇綠葉，呢套劇令到唔少綠葉成功上位！歐瑞偉喺劇中原本係飾演一個有人情味、忠厚嘅砵仔糕老闆楊竹鑾，後尾變身一個殺手集團嘅終極Boss天干先生。佢做得終極奸角當然有番咁上下殘暴不仁啦，佢先後殺死牙佬父親、柯萬長、龍成虎及將段家滅門。最令觀眾印象深刻嘅係城寨武功最高強嘅龍成虎為咗救柯德莉被楊竹鑾用鐵通插死一幕，令唔少觀眾睇到眼濕濕。唔少網民大讚歐瑞偉好戲、好打、難辨忠奸、任何角色佢都可以輕易駕馭。

3. 《城寨英雄》馮春美（吳家樂飾演）
除咗終極Boss歐瑞偉之外，當然唔少得張國強、吳家樂及林偉飾演嘅三大奸角！平時拍劇唔多不過鍾意扮鬼扮馬嘅吳家樂，今次喺劇中飾演陰陽怪氣不過好好打嘅黑幫惡霸馮春美，為營造冷血、陰險毒辣嘅一面，吳家樂不惜每集都化超厚粉底、畫眼線加搽紅色唇膏，唔少網民都讚佢今次演譯呢個娘娘腔、眼神又夠奸，更表示支持佢喺台慶攞獎。

4. 《刀下留人》萬貞兒 （康華飾演）
《刀下留人》被評為近期佳作，因為除咗題材講生死夠新穎，值得觀眾反思之外，劇中個個都係好戲之人，當中以飾演萬貴妃嘅康華最為搶戲。劇中萬貞兒持住深得皇上寵幸而陷害兼殺死吳皇后，後期更立令將好友花蕊紅處斬，睇到觀眾勁肉緊。不過除咗好演技之外，唔少網民大讚44歲嘅佢仍然keep得好好、有女人味、身材fit爆，索過唔少花旦，更封佢係「最正奸妃」。雖然康華已經離開無綫北上搵真銀，不過佢之前話過如果有好嘅角色佢都好樂意返無綫拍劇，所以大家仍然有機會見到康華返香港拍劇㗎！

5. 《純屬意外》卓聲揚（黎諾懿飾演）
黎諾懿一向都係飾演開一啲乖乖仔角色，加上《愛回家》中飾演「最接近神嘅男人」馬壯，心地善良、口花花又鍾意講笑嘅形象已經入晒屋。為咗跳出馬壯嘅框框，今次佢喺《純屬意外》中飾演亦忠亦邪嘅年輕有為律師卓聲揚。唔少網民都讚佢今次做得唔錯、有新鮮感，可能同之前嘅角色又好大出入啦！

6. 《愛情食物鏈》劉利高（鄭子誠飾演）
有鄭子誠當然就有陰謀，所以講奸角有點可以唔提佢呀！被網民封為「完美奸人」嘅鄭子誠，只要出動佢嘅招牌奸笑，唔少觀眾就會睇到心寒。喺劇中飾演奸人劉利高，係一個連鎖飲食集團老闆，因為唔甘心屈居喺劉鏶（劉江飾演）之下，所以自立門戶，同時佢又不停針對同陷害啱啱接手劉鏶生意嘅Pete（陳智燊飾演）。