母乳餵哺今日: 0|主題: 85706

收藏本版

回覆發帖

返回列表

跳至頁

查看: 15251 | 回覆: 11

給兩歲半女兒戒人奶（長篇） [複製鏈接]

cookingellie

大宅

積分: 2202

1^#

發表於 17-5-29 00:10 |只看該作者 |倒序瀏覽 |打印

無疑人奶係媽媽給寶寶最好嘅禮物，但媽媽亦有退下來的一天。就在6天前，我為長達926天的奶媽生涯正式畫上句號。

能夠做到自然離乳當然係最理想，但因為各種原因我決定要為寶寶提早戒人奶！

人哋話寶寶越大就越難戒，的確！小朋友越大就越醒，要成功戒奶就要同佢鬥智鬥力！可是每個小朋友性格都唔同，冇一個方法係絕對可行。我曾經都為戒奶既事而煩惱。

聽過外國有一個媽媽準備為兩歲既女兒戒奶，戒奶前一個月，佢放題式咁俾呀囡任啜，有一日當呀囡又想要奶奶時，佢問個囡：「are you hungry for food or hungry for love?」，呀囡竟然答：「hungry for love」。自此，呢位媽媽就用擁抱同陪伴去滿足佢對愛既需求，從此就戒左奶！

好可惜，呢個方法對我家公主完全唔work！早喺9個月前，當呀囡1歲9個月大時，我因為要入院做手術，需要停人奶一個星期。當時佢正直語言爆發期，喜歡聽道理同重複大人既說話。爸爸就喺我入院前一晚開始不斷同佢講，媽媽要做手術，傷口會痛痛，唔可以飲奶奶喇。呀囡好似好明白咁，仲不繼重複呢番說話。當然，仲有提供代替品，就係佢一直期待飲既紙包奶！結果，喺零哭鬧既情況下，成功停左日奶！不過，對於夜晚半睡半醒既bb黎講，係唔會記得任何理性！既然所有招數都不奏效！唯一既方法只有一個，就係要夠狠！

多得爸爸配合，夜晚負責照顧呀囡，當佢豪哭要奶奶時安慰佢。當時爸爸用卡通片令佢停止哭鬧。雖然呢個方法唔係太好，但總好過由佢喊到瞓著。好好彩，不需要一星期，呀囡就可以一覺到天光。從此至少可連瞓7小時！

呢段期間，呀囡雖然冇再要求奶奶，但從未忘記奶奶，經常將爸爸既說話唸在口邊，我睇到佢對奶奶仍然係好渴求。當時絕對係戒奶既好時機，但我選擇不在那一刻完結我的人奶路。一星期過後，待身體復原一點之後又再繼續做返奶媽。

（待續⋯）

0 0 0

私人傳訊回覆引用

cookingellie

大宅

積分: 2202

2^#

發表於 17-5-29 00:11 |只看該作者

直至一星期前，各方面既因素都令我覺得係時候真的要戒了！只是應該用咩方法令大家在feel comfortable 既情況下戒。我係ftm，一日奶奶七次、八次係何等閒事！每日減少一餐既方法係唔可行！加上呀囡已進入秩序敏感期，對生活既規律有她自己的一套，識睇人眉頭眼額，知道大人做事背後既動機，用呃呃氹氹既方式唔可以持久。所以，必須明確咁令佢知道事實～再沒有奶奶了！

小朋友突然失去了最心愛既野，可以理解佢有幾難過。為左填補佢內心既空缺，我決定同佢等價交換！意思就是用她渴望得到既野黎作為不要奶奶既條件。咁做似乎唔係長遠既辦法，但暫時沒有諗到其他更好的選擇，於是便即管試下。

第一天出乎意外的順利。清晨食過最後一餐奶之後，瞓醒後呀囡忘記左奶奶（最近經常發生），中午給了她一包Qoo豆奶做交換條件，期間不停洗佢腦，話佢知只有bb才要奶奶，你大個了，唔飲奶奶喇，可以飲鮮奶，bla bla bla⋯然後傍晚再給她半杯鮮奶，晚上由爸爸氹瞓覺，佢亦冇揾我，咁就順利過左第一日。

第二日，用返同樣方法，可惜今次冇咁順利！呀囡似乎意識到要用更強烈既方式先可以爭取到奶奶，更一度喊住咁話：「我要奶奶～我未大個呀～嗚～」，做呀媽聽到呢句點會唔心酸！自此之後，我再冇同佢講大個女要戒奶既說話。呢一刻有放棄既念頭，但既然決定提早戒奶，就預左會出現哭鬧既情況，所以最終都係堅持落去。

之後幾日，分別利用雪糕、peppa pig奶、Qoo豆奶、自家制奶昔、豆漿等等黎做交換條件，期間要明確表明再沒有奶奶，同埋出多啲街，令佢唔會有悶既時間。

直到今日戒奶第六日，呀囡全日都冇要求過奶奶，我亦無需再提供任何東西作交換，離成功不遠了！可幸既係，過程中既哭鬧比我預期中少，同時亦感到我在適當的時候做了正確的決定。