少年成長今日: 0|主題: 16021

收藏本版

發帖

返回列表

跳至頁

查看: 27579 | 回覆: 0

追夢 [複製鏈接]

csir3290

子爵府

積分: 12068

1^#

發表於 23-8-20 10:14 |只看該作者 |倒序瀏覽 |打印

昨日全家人一齊入戲院睇近期上映嘅「GT跑車浪漫旅」，睇呢套戲嘅原因係我我同阿仔阿女都有玩呢個遊戲所以覺得特別有感覺，我老婆當然係畀我哋逼入去睇㗎喇，因為佢根本就冇玩過呢隻game。套戲成兩個幾鐘頭，但係都算拍得精彩唔悶，尤其是係我哋三個有玩過隻game就更加覺得套戲入面嘅場景熟悉，我老婆雖然係畀我哋逼入去睇，但係睇完都話其實都幾精彩，套戲大致都係講一個後生仔，自細個開始鍾意玩隻game，一路夢想成為真實賽車手，最後排除萬難終於達成心願成為職業賽車手嘅故事，過程中當然係經歷家人反對然之後自己努力證明自己嘅夢想係可以達成嘅老土故事。當中雖然故事老土但由於拍得精彩，賽車場面刺激所以兩個幾鐘頭嘅時間都唔會覺得悶。

我唔係想做影評反而係想講套戲入面嘅一個訊息，就係年青人追夢嘅故事。故事嘅主角係一個自細就鍾意賽車，不停喺屋企打遊戲機夢想成為職業賽車手嘅後生仔，為咗成為賽車手連大學都唔讀只係不停呢喺房入面玩賽車遊戲訓練自己，當然屋企人好反對啦！覺得佢無所事事只係顧住打遊戲機。其中有場戲講到兩父子對鬧，爸爸就覺得個仔終日無所事事但係個仔就鬧返個阿爸轉頭，因為係個爸爸自細鼓勵佢追夢，點解而家會阻止佢呢！個爸爸嘅諗法其實都係同好多家長嘅諗法一樣，因為成為賽車手嘅人萬中無一，見到個仔大學又唔讀只係匿喺間房入面不停練習，只係間中返下兼職點會唔擔心呢！個爸爸最後鬧個仔做嘅嘢不切實際。其實我覺得個爸爸都話得啱嘅，真係有幾多人能夠因為咁樣而最終達成夢想成為賽車手呢！個爸爸擔心嘅就係如果個仔最後唔能夠達成夢想咁佢點樣過以後嘅生活呢！

戲入面個爸爸所面對嘅處境其實好多家長都可能會面對，一方面覺得應該畀個仔去追自己嘅夢想，但係另一方面又擔心佢只係顧住追夢，如果萬一最終唔能夠成功咁佢將來點樣生活呢？戲入面亦都反映咗其實好多家長都會覺得應該畀仔女去追夢，但係追夢有陣時同現實又好似係互相對立咁，始終作為父母嘅都係擔心仔女現實嘅生活，追夢係好但係最終都會擔心如果追夢唔成功將來嘅生活會點呢！而且好多家長都唔能夠明白追夢當中所需要付出幾多嘅努力！可能個細路仔係好努力但係呢啲努力最終又能唔能夠令到佢將來面對實際嘅生活呢？始終現實嘅生活，衣食住行成家立室先至係父母最大嘅考慮，父母唔係要諗住將來要仔女養返自己，而係擔心佢將來為咗追夢可能連自己都養唔掂，所以望住仔女只係付出努力去追夢又點會唔擔心呢！但係如果唔畀佢哋去追又可能會令到大家嘅關係越嚟越差，仔女覺得父母唔明白自己！

年輕人嘅志向往往與上一輩不同，其實呢個問題有冇得解決呢？我自己都係覺得應該畀細路仔去追自己嘅夢想，但係如果好似套戲個主角咁終日無所事事咁只係呢喺房度打機，咁樣就係追夢，又點會唔擔心呢！所以我自細就已經同自己對仔女灌輸一個概念，就係追夢想係需要背後有實力去支撐嘅，即係話如果萬一追夢唔成功都能夠返到轉頭，簡單啲嚟講就即係話喺追夢想之餘其實都要裝備自己其他方面嘅實力，所以自細我已經同阿仔阿女講無論點樣都好都一定要有一個專業，因為只有咁佢先至可以無後顧之憂敢去追自己嘅理想。咁當然未必個個都鍾意讀書，就算讀唔到書都應該要有一技之長，所以如果要追夢就更加應該努力裝備好自己。我會同佢哋講例如好似歌星許廷鏗咁，佢好鍾意唱歌所以努力喺音樂上面追求夢想，但好多人只係留心到佢做歌星嘅一面，但係更重要嘅係喺做歌星嘅背後其實佢係一位牙醫，就係因為有牙醫呢一份職業，所以先至令到佢可以喺追夢上面咁隨心所欲，可以做自己鍾意做嘅音樂，因為就算佢喺音樂上面發展唔順利，但係佢都仍然係一位牙醫足夠讓自己可以有一個無後顧之憂嘅生活，咁先至可以無後顧之憂咁去追夢。我唔係話要市儈但係我有陣時都會同佢細佬講如果要維持而家自己嘅生活水平，要點樣嘅收入先至能夠足夠呢！就好似琴日睇完戲我都藉住呢個機會同佢哋講下，所以要追夢，就更加需要努力裝備自己，令自己無後顧之憂免得萬一追夢失敗嘅時候，自己嘅生活會變得更差。唔係孤注一擲不成功便成仁付出所有就會追夢成功，如果只係咁樣諗只係不設實際嘅諗法，因為現實係一百個人入面都未必會有一個人追夢成功，而另外個99個人之後點樣生活呢！為咗夢想放棄一切付出所有嘅努力表面上就好似好好聽，實際上只不過係迫自己無路可揀必須要成功咁解，最弊係社會上只不過係不停吹捧追夢成功嗰一個人，所以睇起上嚟好似只要努力就能夠成功。但係其實更多嘅係追夢唔成功要搞到自己生活潦倒。所以自細我已經同對仔女傾慢慢灌輸呢套價值觀畀佢哋，等佢哋知道追夢係需要實力，唔好只係憑空想像因為夢想係虛無飄渺，但係生活先至係最實際！所以我對仔女從來都知道追夢想冇所謂，但係父母嘅最低要求就係起碼佢哋要讀完大學或者係搵到一技之長！問題係好多時就係父母自細冇同佢哋傾亦都冇幫佢哋建立正確嘅價值觀，例如好多時都會有啲後生仔好鍾意打波，會夢想成為一個職業球員，父母見到佢哋只係鍾意打波唔做其他嘢可能都會好擔心，甚或之乎唔再畀佢哋參與，最終破壞大家之間嘅感情。但係如果父母自細已經會同仔女去做一啲生涯規劃，亦都畀佢哋知道運動員嘅出路，更加要畀佢哋知道「有得讀就有得踢」即係話只有做學生嘅時間先至可以能夠有咁多時間練習。亦要慢慢等佢哋知道運動員退役之後嘅生活係點，就會令到細路仔除咗鍾意踢波之餘亦都要知道要安排退役之後嘅生活。只要父母一路陪伴佢哋行呢條路同埋支持，其實係追夢嘅過程入面反而可以增進親子之間嘅感情。