好少出 post，但作為請左有8年工人既僱主，一直都係安樂窩請姐姐。但近幾年啲姐姐質素好唔掂，合作左好耐既 agent 愈嚟愈敷衍，真係頂唔順要出 post 幫人避雷。內文有啲長，但係要寫番自己啲真實經歷俾大家參考。大家可以斟酌下係咪一定要係呢間又貴、性價比又低既 agency 搵工人姐姐。
( 利申，我係文明僱主。我屋企日頭大人番工，日常家務亦唔多，第一同第二個工人都有向 agency 反映我係好僱主，有規矩但對佢地好好。我全部都係請海外印傭，因家中長輩唔識英文。而且全部工人我都要求有新加坡 / 馬來西亞工作經驗，唔係無做過野。入屋時亦會講明 house rules )
我2017年開始係佢地銅鑼灣分店 ( 當時仲係麥當勞大廈樓上舖，證明我真係老客人 )，我個 agent 係 Nadia。開頭兩個姐姐唔錯，而我都好少搵 agent，係自己教，因為個 agent 都係用佢萬能嗰句 “姐姐係要教既” 嚟回應我。Agent 會係兩個姐姐做左約一個月左右問下你有冇問題，之後都無乜聯絡你。第一個姐姐完約前三個月都開始 hea，而第二個姐姐最好，係因為佢自細家教好嚴，我甚至同過佢媽媽傾過偈，係屋企教得佢好，同呢間僱傭中心既所謂訓練一啲關係都無。之後佢要結婚生BB就要番印尼先無得同佢續約。
我揀呢間主要原因知佢收費唔平，有學校訓練，佢地 claim 會親自去學校揀人。因為係要湊小朋友，所以我都係諗住用錢換來質素同安心，起碼唔係亂請工人。點知自從23年我第二個姐姐要走再請工人，我就連續三次中伏。短短兩年要換三次工人，唔計等工人時間成本，仲要次次都要一大筆真金白銀換，嚟彌補個 agent 揀人差、呢間中心啲姐姐唔太掂既問題。
第三個工人：
Agent 幫我揀既，仲話好好，咁我信佢。結果嚟到係大懶鬼。
佢可以趁無人係度上床瞓覺連一啲家務都唔做。我問佢有冇拖地，佢話有，我拎住支乾既地拖問佢，佢即刻無出聲。仲多次係我勸喻下捉到佢自己落街遊蕩。
會自己去印尼舖買野攝單 claim 錢，仲要偷野。連我個女既串珠仔盒同棉花糖都要偷。講左屋企食物問過可以食，唔可以自己攞出街。佢有次放星期日番嚟係我面前唔怕我知咁，拎番屋企啲餅乾同水果出嚟，丟番入雪櫃同零食櫃 ( 無錯係真係丟 )。搞唔掂，一個半月要炒。賠左一個月人工同16000蚊中介費請過個。
第四個工人：
工作能力不佳，學左半年廣東話連單字都聽唔明。
會成日詐病，係屋企彎哂腰，陪佢去醫院時我去左廁所，出番嚟見佢即刻好精神咁用手機睇片 message。
疑似有精神問題，成日個表情都好怪( 究竟間 agent 點揀人 )，然後居然趁我唔係度俾荷里活廣場斬人案個 video 俾阿女睇，阿女好驚問我先知道。
佢有日無啦啦同我講想番印尼唔做，最後只留了半年辭職走左。我又要俾多次中介費請人。
第五個工人：
上個禮拜先唔要佢，極品。今次我唔容忍寫左投訴信加埋證據俾入境處。
會頭兩個月扮勤力攞你信任，然後家務表現跳崖式下降，逐樣家務唔做嚟試你底線。吩咐左野，佢會積極咁話 yes 然後係已經決定左唔會幫你做。
廣東話幾好 (我測試過)，但當你問佢點解咁既表現佢會扮蠢扮聽唔明企圖過關。真係好乞人憎。
非常狡猾，好唔誠實，而且會攝好多位呃到你盡。包括企圖用白單打斧頭，唔理你嚴正咁講唔再食某樣食物，都堅持要去買，因為嗰個檔口可以打斧頭。自己去印尼店話買 lunch 攝單 claim 錢 (講左屋企有飯食唔可以落街買)。
偷野，小到洗衣珠、食物玻璃盒都偷，扮唔見阿女八達通錶同自己八達通卡嚟食左啲錢。
對阿女好差，丟佢眼鏡落地下要佢執，阿女叫佢唔好做犯法野 (佢想嘟阿女張小童八達通卡入閘) 會大力推開個小朋友。好彩事件無發生多次，我好唔開心同輔導左阿女。
我數哂呢啲野出嚟，佢初頭唔認，後來認左，自己寫辭職信走。我就無用呢間 agency。問過 agent 搞乜，佢答我可能係間學校出品有問題，佢地會再處理下。
我聽完真係大笑左三聲。好簡單，你係一間餐廳連續食物中毒三次，唔理係供應商問題定餐廳有問題，餐廳本身都難辭其咎。我三次請工人成本同心理壓力，你一句推搪責任就可以，咁請問你憑乜收咁貴中介？既無遵守服務承諾又可以將高額中介費袋袋平安。三次中伏絕對不是單一事件。
***你以為工人質素咁差係極品，agent啲態度先係更極品。***
1.
問佢點解啲姐姐咁差？
佢答： “可能係我揀人唔好”、 “可能間學校出品有問題”、“你要預左而家啲姐姐會古惑好多” ( 最後嗰句最頂癮，真係痴線咁都答得出 )
呢度啲 agent 最叻耍人、若無其事同不負責任。
2.
最鐘意 hea 客。問乜問題，都係統一推搪方式，例如： “ 工人姐姐係要教 “ ， ” 會唔會同佢溝通下先？” 多謝你，我唔係無溝通，而係啲工人講極當你無到。我同你 agent 尋求協助，你都永遠玩虛應嗰套。反映姐姐問題永無一次實際幫助，全部得把口。
3.
佢幫我請左第一個工人後，好熱情咁搵我寫推薦信因為佢想升 manager。我好人幫佢。之後我有問題要搵佢，佢愈來愈 hea 我 ( 因為已經升左去中環唔使坐舖 )。最近嗰次 bye bye 第五個工人時，佢原本約左我係中環分行幫我處理手續，居然臨時縮沙話自己有會開，叫我去銅鑼灣搵同事。我當然唔會就咁算。叫佢呢件事好重要，點都要幫我搞掂佢。我一直對佢好客氣，呢一次係我惟一一次語氣咁嚴肅。去到既時候當然係搵下屬推你去無人既房搞掂。佢全程皺眉，無一句問候或者講聲唔好意思。只係講左“你要預左而家啲姐姐會古惑好多” 就臨急臨忙搞掂 bye bye 我。
做到資深高層都係咁，都可以知呢間公司而家係點。唔好比佢地一開始熱情少少呃到，出左事即刻過橋抽板。
佢地分店係 google 好多都係百幾二日個 comments，但其實大部分9成幾都係啲姐姐寫，而且內容都係啲職員幫佢地搵工 ( 所以點解會有好評 ) ，但當你轉去睇差評，就可以知道真實用家的感受。例如係中環安樂園大廈分店個僱主情況同我簡直一模一樣，都係話佢地 “近年為了擴張，對工人姐姐的了解度同質素都下降”、 “淨係識得賣廣告，網上已好多用家白費金錢” 。我真係係呢度白白浪費左好多中介費。
最慘係我有個 very important customer 問過我攞 agent contact，試下請菲律賓工人。結果一個整壞左佢屋企啲野同個安保系統，另一個菲律賓司機好快就撞爛左佢架車…
我地都有合約精神，但呢間公司係 website 既宣傳語就可以唔當係服務承諾？我照 copy 佢地既宣傳語：
“旨在以「重視長遠客戶關係，改革創新」的服務宗旨，為僱主、外傭及中介建立長久而互信的良好合作關係。”
“我們致力提供優質服務，緊貼跟進每個申請，讓顧客感受既方便又窩心的服務。”
“積極革新，精益求精，以超越顧客的期望為目標，達至「快、準、懇、貼、專」的服務。”
而家睇番簡直諷刺。
最後我真係唔覺得佢地既服務同出品值咁高價，更可以話係性價比甚低。我俾咁貴中介費都係因為有去左佢地學校訓練姐姐度，而姐姐咁過份既行徑好明顯同學校教既完全唔一樣，即係連基本質素保證都無。
唔知有無其他苦主，大家可以將經歷講出嚟，幫大家避雷。
PS：
係 babykingdom 睇其他 post，真係負評居多，好多都係我自己切身感受。以上嗰篇我用左幾個鐘寫，而且係重新挖多次不愉快回憶既傷口，係因為希望幫大家唔好踩雷。大家有多個參考。
發表於 
返回列表
