烹飪搵食

收藏本版
回覆 發帖
返回列表
跳至頁

首頁
1

尾頁
   0
韭菜仔


洋房

積分: 83


1#
發表於 25-9-6 11:38 |只看該作者
本帖最後由 韭菜仔 於 25-9-16 22:18 編輯

----序---
　　由古至今，不論東方定西方，都各有自己不同款式嘅鐵鑊。直到現代，各式各樣嘅鐵鑊都好多人用。多人用就一定有佢原因！
鐵鑊嘅好處唔需要我多講，自己上網搵有大把資料。
呢啲好處似乎係明火煮食專利？
我近年由明火煮食轉用無火煮食，買過唔少不同款色鑊(包括 不鏽鋼鑊/煲)，用各種方法，試圖將呢個專利搬到無火煮食上。
祈望可以 馬照跑 舞照跳，更祈望我嘅旅程能夠俾到大家有個參考。

　　上海街買咗隻 厚身鐵鍋，似乎搵啱咗...唔好急住，睇完再諗諗 (可一齊交流吓) 先至買都未遲。
但如果你好心急或者自問冇耐性睇長編文，咁可以直接買隻 Lodge 放係電陶爐上任勞任怨，唔使睇我喇，哈哈


---與 電磁爐 鬥智鬥力---

　　話說，我十五年前初中時，開始用屋企石油氣爐，用傳統中式生鐵鑊(南鑊/廣東鑊) 煎炒。
直到近年搬屋，一個人住，打算轉用電磁爐。心信用 電磁爐 高效能，慳電環保，係煮食首選。

　　預備搬屋之時，買咗個 天上野 28cm 窒化鐵 鐵砂鍋 (佢聲稱明火、電磁爐...可用)。一人煮食剛剛好。
初試呢隻 鐵砂鍋 用 明火 煎炒，真係超級正。用細細火就超快熱，用好少油就煎到好靚嘅蛋奄列，煎牛肉勁香，正！

　　幾百蚊買咗個 樂信電磁爐 迎接新居，貪佢平又有 2級能源標籤。
煲水真係超級快，以為可以好好咁煎炒，點知...
明火用得好地地嘅 鐵砂鍋，轉用 電磁爐 後簡直係由天堂變地獄！
以前唔係咁識，聽聽埋埋嘅資訊都係話無火煮食火力不及明火，令我當時誤以為電磁爐要開好大火去預熱鐵鑊。
點知咁就拎晒嘢！
呢個平價 樂信電磁爐，一開就係 1400W，當時唔識死，一味加大火力：1600、1800、2000W。跟住鐵砂鍋中間就標晒煙，仲燒到鑊底有點變形。
禍不單行：當時買隻新鑊剷迎接新居。以為無火冇明火咁熱咁就試吓矽膠鑊剷。就係咁搞法，鑊剷尖熔L埋，搞到隻鑊好L臭。
再試，由 1400W 開始減：1200、1000、600W...
喺 600W 時，雖然冇太大油煙，但問題又來：
1. 平價電磁爐，電磁線圈太細，只係鍋中間熱...
2. 平價電磁爐，減到 600W 時就開吓熄吓，開時鍋中間有煙，熄時鍋又冷卻得好快。
呢兩點加埋，導致個鍋永遠都冇辦法得到足夠熱力，就連煎隻蛋都唔掂！
加一級火 1000W，鍋中間就狂標煙，又係唔掂！

　　無奈之下，拎隻舊嘅 美亞 厚底不鏽鋼細煲(煲底有厚鐵餅嘅煮麵煲)。
試用來炒：切片嘅乾蔥頭加埋切幼條嘅雜錦菇一齊炒，冇乜油煙而又可以炒到有啲香，好似又得喎。
於是朝住 "厚底" 呢個方向，買咗隻平價美亞厚底不鏽鋼炒鑊 (鑊底有厚鐵餅)。
呢隻鑊口徑 30cm，鑊底 15~16cm 左右，實際發熱面只得鑊嘅平面部分，即係只得 ~16cm 夠熱。https://drive.google.com/file/d/1OIT7yLhhQPE9YRz_6kRLn84La6Ak32Og/view?usp=drive_link
簡單少量小炒或煎兩塊肉係可以，但想炒多些少嘢就唔太方便。
於是朝住 "厚底" 方向，喺上海街買咗隻 10吋口徑嘅 厚身鐵鍋，似乎就係我心目中嘅 鑄鐵鍋。
性能有限嘅平價電磁爐上，鍋中間夠熱，周邊唔太夠熱。
如相：煎奄列。
雖然有點蛋碎四散，但鍋中間奄列總算叫做有啲啲似樣。對於當時電磁爐新手嘅我來講，似乎係一大進步，至少冇黐底。
https://drive.google.com/file/d/1Y0oDiURDl1n0NtUADVm15Sedrmof0Yzn/view?usp=sharing
---待續---
私人傳訊回覆 引用

韭菜仔


洋房

積分: 83


2#
發表於 25-9-8 14:01 |只看該作者
本帖最後由 韭菜仔 於 25-9-16 22:25 編輯

---遇上 電陶爐---

　　講到冇黐底：用 易潔鑊 咪得囉！
轉用 電磁爐 初期，有用過家人嘅 易潔鑊。(美亞 扭紋寶 高級款)
用來 煎奄列 或 炒滑蛋 都超容易上手。
但我要鑊氣，試炒 炒麵王，炒幾次之後，鍋邊緣 (接觸唔到食物嘅位置) 塗層撲起咗、有碎裂。
...高級塗層都咁快死，咁普通 特福塗層鑊 去到我手上實死硬...

　　平價 樂信 電磁爐，性能好有限。
經常預到一大難題：乾燒預熱鑊時，稍為熱啲，個爐好容易過熱停機。要就住加熱。
小炒雜碎或煎奄列 都免強可以。但要求高啲例如 炒麵或炒菜心 就唔掂：
一係 鑊 就唔多夠熱、黐底、炒到出水...
一係 電磁爐 就過熱停機。

　　家人有個 電陶爐 閒置咗，趁當時入秋冇咁熱就試吓。
厚身鐵鍋，喺電陶爐上 有如 "儲熱式炒爐"。
只要有足夠時間儲夠熱，炒一人份量似乎有唔錯嘅鑊氣。
試炒 炒麵王、蛋炒飯... 之前用石油氣爐生鐵鑊嘅感覺開始返返來。

　　再講：其實以前中學時，都只係煎吓蛋、牛仔骨。唔係太識炒嘢。蛋炒飯有時炒到一 pack 糊咁...
後來，近呢三、四年來睇 職人吹水、star leo 等等，令我對煮食要求高咗。參考佢地方法，實踐、練習...跟住搬屋之後就冇咗明火煮食。
天上野 28cm 窒化鐵 鐵砂鍋：之前明火掂，電磁爐唔掂。好彩呢次 電陶爐 終於掂喇。
電陶爐 由於加熱範圍不及明火咁闊，所以需要用中火慢慢燒隻 鐵砂鍋，等熱力由中間漸漸傳到周邊。當隻鍋漸漸夠熱時，感覺都幾似明火生鐵鑊，可炒一人份量。

　　有啲可惜係呢隻 天上野 鐵砂鍋 用耐咗，個底變形向上拱起。
後來因為咁又買多隻二手不鏽鋼多層中式鑊試吓，但結果係適得其反...
對於實心鐵鍋來講，向上拱起其實問題不大，只要落多些少油都可以。相反如果向下凹，隻鑊係平面爐上碌下碌下就麻煩。
換著係多層鑊，萬一出現變形，基本上隻鑊就收得工，詳情遲啲再講...

　　另外都試過係街市買百零蚊嘅 ~22cm 熟鐵小炒鑊。
呢啲平價熟鐵鑊新買時表面亮黑色，睇落好靚，但其實係要大火開鑊。
所以如果想用熟鐵鑊，無火煮食至少要有個 電陶爐，有足夠紅外線熱力燒鑊，燒到變藍再變銀藍...再抹油養鑊。
細細隻熟鐵鑊，加熱快，降溫都比較快。炒菜 炒麵 需要較大火力，以及需要不停咁調整火力，達到理想溫度。
幸好電陶爐本身存在大量熱能。當鑊底接觸或接近爐面，能夠有限度吸收爐嘅熱力。
同 鐵砂鍋 或 厚身鐵鍋 比較，熟鐵鑊 煎炒更香口，但油煙比較大。我窮鬼冇抽油煙機...最後隻細熟鐵鑊送咗俾人。

　　補充：

平價 電磁爐 ：
----
~1000W 預熱，感到差不多夠熱** 就轉 600W 落油攪一陣再煮...
美亞 30cm 不鏽鋼鑊 長用 600W 煎炒都夠熱。
厚身鐵鍋 用 600W 間中要轉 1000W 煎炒先至夠熱。
----
** 事後檢討，係唔夠熱。同 坊間常見嘅水珠測試 或 起油紋現象 比較，仍差一段距離。關於水珠測試，詳情之後再講。
易潔鑊 不可乾燒預熱，煎炒 600W 或以下就可以。

電陶爐 - 28cm 窒化鐵 鐵砂鍋：
----
1000~1200W 預熱 兩分鐘左右，感到有油煙氣味就轉 ~750 預熱半分鐘多啲，落油攪幾吓就可煎炒。
註，如果炒菜份量稍多，轉 ~750W 後，要預熱耐啲，等更多熱力傳到更周邊位置。
炒麵需要 1000~1200W。
相：https://drive.google.com/file/d/ ... view?usp=drive_link
不宜長期超過 1500W 乾燒預熱。
----

電陶爐 - 22cm 熟鐵小炒鑊：
----
1000~1200W 預熱 一分半鐘左右，感到有油煙氣味就轉 ~750 預熱半分鐘多啲，落油攪幾吓就可煎炒。
相：https://drive.google.com/file/d/ ... view?usp=drive_link
煎炒中途需要不停調整火力，對技術要求較高...
----

電陶爐 - Lodge 10.25吋 鑄鐵鍋
----
1200W 預熱兩分鐘左右，再轉 ~750 預熱多兩分鐘，感到有油煙氣味就差不多夠熱。呢個時候可炒蒜頭、洋蔥、雜碎或滑蛋...
如要煎奄列，就轉 ~500W 等一兩分鐘，等多啲熱力傳到周邊，用 500~750W 慢煎。
炒麵需要持續 750~1000W 預熱，見煙落油，再見煙落麵，轉 1000~1200W 炒...
相：https://drive.google.com/file/d/ ... view?usp=drive_link
註：鑄鐵鍋雖然好厚身，但由於電陶爐加熱範圍有限，因此同 鐵砂鍋 一樣，不宜長期超過 1500W 乾燒預熱，否則鍋周邊未夠熱時中間已超級熱。
----

　　奇怪喇，之前喺上海街買嘅 10吋口徑 厚身鐵鍋呢？點解又無端端拎隻 Lodge 10.25吋 出來嘅？
呢個係旅程嘅浪漫之處詳情之後再講。

---待續---
私人傳訊回覆 引用

韭菜仔


洋房

積分: 83


3#
發表於 25-9-11 20:16 |只看該作者
本帖最後由 韭菜仔 於 25-9-16 22:32 編輯

---再戰 電磁爐：專業電磁爐---

　　插曲：雖然幾款唔同嘅鐵鑊，喺 家人嘅電陶爐上表現唔錯，但我對嗰個雜嘜電陶爐有啲不滿...想買個有牌子嘅雙環電陶爐。(先前分享時已買咗。)
搵爐途中，行過聯鎖店見到大大部嘅 專業電磁爐，有實體扭掣，做緊特價。神推鬼㧬就買咗。
咁都好嘅，又可以嘗試實踐吓我當初嘅信念 - 電磁爐 高效能，慳電環保，係煮食首選。
注：呢個所謂嘅專業電磁爐，一開就 2800W。如果熱鑊，你一開爐就要立即扭細佢...我個人就唔推薦新手買。

　　人係貪心嘅，之前搵到隻似乎啱心水嘅電磁爐用鑊，用一段日子後又想搵多隻更啱用嘅鑊。
行荃千，幾乎行勻全層都搵唔啱，臨走時差不多上扶手電梯，零零丁丁望到一角賣不鏽鋼鍋/煲，價錢好平。拎上手摸下，幾厚底喎！
結果唔使 $300 買咗隻 Carl Schmidt Sohn 24cm 不鏽鋼深煎鍋，鍋底有厚鐵餅，平到笑！(過幾日，行過其他千，要 $3XX。就好似註定當時要我買佢咁！)
呢隻鍋嘅鍋底直徑 22~23cm，比先前隻 美亞 炒鑊嘅鍋底(15~16cm只) 大得多，對於電磁線圈比較大嘅專業電磁爐來講，能夠獲得較大嘅加熱面。
呢隻鍋深度接近 7cm，比先前喺上海街買嘅厚身鐵鍋(~4.8cm)深唔少。炒菜更就手，菜冇咁容易飛出。
從市場定位睇，呢種有厚鐵餅底嘅鍋，都係入門級貨色，但從實用角度睇，鍋底嘅厚鐵餅對 電磁爐 來講簡直係重要到不得了！
只需要稍為有技巧咁預熱，炒菜(尤其銀芽)可不停啫啫聲炒到乾身。炒粉麵香口唔黐底，鑊氣唔錯，應用上肯定唔只係入門級！

　　專業電磁爐：電磁線圈比較大，可用鍋具直徑較大。睇落好勁，但有一大缺點，對煎炒來講亦係一個大挑戰！
電磁爐 加熱位置正中間係個空洞，加熱面如 "日環食"。
可睇 麥花田 佢用電磁爐乾燒焦糖嘅樣。
https://www.youtube.com/watch?v= ... Ombu-ejgeeIkA%3D%3D

　　電磁爐 熱鑊，需要啲技巧。
用 "中火" 慢燒，令 "日環食" 光環嘅熱力慢慢向內同向外擴散。
將 "日環食" 漸漸化成稍為似樣嘅 "大太陽"。
對於電磁爐嘅所謂 "中火"，我就有啲見解。
電陶爐(或明火)：靠個爐發熱。直接調整爐火就可獲得大中小火，所謂嘅"中火"係針對個爐。
電磁爐：爐本身唔發熱，係靠鍋底發熱。因此我認為"中火"係針對鍋具，而唔係個爐。
換句話：同一個 電磁爐 用不同鍋，爐所用嘅不同 Watt數 對應鍋嘅 大中小火，都大有不同。
更何況，有啲電磁爐係用度數"1,2,3,4,5..." 表示火力，度數亦未必能夠對應到某個恆定 Watt數。
因此，要搵出 鍋具 喺某個電磁爐上嘅 "中火"，我暫時諗到以下方法：
----
先煲滾些少水(水大概1cm高，小鍋就2cm)，熄火等一等再重新開小火。
唔冚蓋，漸漸加大火，直到鍋底表面出現一堆細細粒嘅小水泡，同時水整體處於滾同唔滾之間(小小滾)，呢個大概就係鍋嘅"中火"。
細心觀察呢堆小水泡，係個 "日環食"！記熟呢個 "日環食" 嘅大小同位置，對之後嘅操作非常重要！
有啲二線牌子電磁爐，爐面標示嘅加熱範圍 同 實際電磁線圈位置可能有出入。觀察小水泡可確認實際電磁線圈位置。
----

　　用 不鏽鋼鍋 可以用水珠測溫去驗證呢個 "中火"：
以我經驗，用"中火" 乾燒預熱 不鏽鋼鍋 ，兩分鐘多啲， 水珠 喺 "日環食" 光環位置開始可浮起。鍋正中間或最周邊位，水珠未必能夠浮起。
如果未夠 一分半鐘 已感到鍋好熱，水珠 浮起跑得好勁，咁呢個已經算係中大火或大火，要細一格。
如果超過三分鐘，未有浮起跡象 或 只能免強浮起然後漸漸蒸發，咁就太細火。要加大一格。

用呢個 "中火" 繼續乾燒，直到滴水落鍋正中央，水珠能夠立即浮起並立即走動時**，就收細一格火燒多半分鐘多啲，落油攪油。
如果大油煙就再收細一格火，攪油攪半分鐘左右就煎得，炒可以轉返中火。
**如果鍋正中央嘅水珠郁幾郁先至浮起，咁係未夠熱，煎太陽蛋或炒麵，鍋正中央仍有機會黐底。

　　用 鑄鐵鍋，就唔建議 水珠測溫。因為鍋有油養住，當達到一定溫度就出油煙，而油煙會帶走鍋嘅熱能。
結果可能係 鑄鐵鍋 標晒青煙，但鍋嘅溫度仍未能令水珠浮起。
註：Youtube 見過有啲商家教人鐵鑊做水珠測溫，不過嗰啲似乎係新科技鐵鑊，仲有佢地洗鑊洗到好乾淨...估計同鑄鐵鍋有啲分別。
咁用咩方法測溫好？我諗到 "star leo 口訣"！
轉換成 電磁爐 版本 口訣，就係：中火慢燒 (兩分鐘或以上)，見煙收一格落油攪油，攪油再見煙可煎炒。
同樣道理：
用"中火" 乾燒預熱，我經驗係兩分鐘多啲，開始聞到有啲氣味，跟住漸漸見煙。
如果未夠一分半鐘已見到好大油煙，咁就太大火，要細一格火。
如果超過三分鐘，完全聞唔到氣味，或冇乜動靜咁，咁就太細火。要加大。
鑄鐵鍋 比較容易用，火力控制較為寬容。唔似得 不鏽鋼鍋 咁：熱啲啲就好快燶，稍唔夠熱就立即勁黐底。(不過好狠重呢...)

　　電磁爐用 大火 乾燒熱鑊 有乜問題？
"日環食" 光環位短時間升到超高溫，正中央或周邊位又未夠熱，結果係黐底囉！
如果大家有其他方法，歡迎提出。

　　同 電陶爐 相比，電磁爐 呢種 "日環食" 嘅加熱形狀，熱力非常之唔均勻，因此需要更有耐性，慢慢等，等整個鍋底都能夠吸收足夠熱力。
故此，電磁爐 雖然煲水快，但要煎炒一啲較易黐底嘅嘢 如煎太陽蛋、炒出前一丁，熱鑊時間可能比電陶爐更長。
而炒菜或炒銀芽等等，要求較高熱量但又唔會黐底，咁用電磁爐熱鑊就唔需要太仔細，用中大火預熱一陣，落油攪油，見煙就炒。

　　今次喺 電磁爐 上用 鐵鑊 (鑄鐵鍋)，理論上總算實踐到我嘅信念。
但理論同現實總有出入。想喺 加熱唔均勻嘅電磁爐 上發揮 鐵鑊 嘅好處，現實係有點事倍功半，難以享用到電磁爐高效能嘅優點。
而 不鏽鋼鍋 似乎效能就稍為好些少。

　　補充：

專業電磁爐 - Carl Schmidt Sohn 24cm 不鏽鋼深煎鍋 (中火 = 900~1200W)
----
預熱：1200W 兩分半鐘左右，轉 900W 30~45秒， 落油轉 600W 攪油。
煎：600W。炒：900~1200W。
相：https://drive.google.com/file/d/ ... view?usp=drive_link
相：https://drive.google.com/file/d/ ... view?usp=drive_link
炒後，油同汁有輕微燒焦，可見稍為過熱嘅位置形成環形污跡，。正中央冇跡嘅位置係剛好夠熱。
----

專業電磁爐 - 美亞 30cm 不鏽鋼炒鑊 ~發熱面約 16cm (中火 = 600~900W)
----
預熱：900W 兩分半鐘至三分鐘，轉 600W 30~45秒，落油轉 300W 攪油。
煎 300~600W。炒：600W。
炒麵需要短暫用：900W。
相：https://drive.google.com/file/d/ ... view?usp=drive_link
----

專業電磁爐 - Lodge 10.25吋 鑄鐵鍋 (中火 = 1200W)
----
1200W 兩分半鐘多啲，見煙 轉 900W 落油攪油 (約一分鐘多啲)，再見煙 轉 600W 攪油。
煎：600~900W。炒：1200。
炒麵可短暫 1600W。
相：https://drive.google.com/file/d/ ... view?usp=drive_link
----


---待續---
私人傳訊回覆 引用

韭菜仔


洋房

積分: 83


4#
發表於 25-9-17 21:07 |只看該作者
本帖最後由 韭菜仔 於 25-9-17 21:14 編輯

--- 電磁爐/電陶爐 用咩鑊好？ ---

　　如果你自己上網搜尋 電磁爐/電陶爐 用鑊，總係搵到一大堆 電磁爐 廣告、仲有啲幾千蚊嘅易潔鑊...又有一大堆"呀媽係女人"嘅資訊。
搵完一大輪，除咗易潔鑊之外，我相信你幾難搵到用乜鑊好。
你叻啲，搜尋指明 "親子王國"、"連登" 等等，會發現老一輩用家都係生鐵鑊。
youtube 有 麥花田、點 Cook Guide 等等，此外都有唔少大陸或台灣片教你如何將鐵鍋或不鏽鋼鍋變成不粘鍋。
不過，最大嘅盲點，係佢地多數都係明火煮食。無火嘅只佔極少數。
我呢個經驗有限嘅窮鬼，自問未有資格教人，但都試講吓我無火煮食嘅經驗同感想，俾大家參考。用咩鑊就自己諗啦。

　　我窮鬼會周圍行街。有時會去上海街 或 觀塘美亞(貪平)。呢兩度，款色夠多，有平有貴。
又會行吓百貨公司同家品店。平少少就 家品屋、文記 等等，或者行吓深水埗 等等。貴少少有 簡簡單單、億世家、生活館、天上野、張小泉 等等..
百貨公司通常定價高，食水深，我都係睇嘅多，偶然見有特價又啱用先至買。
電磁爐 煎炒來講，厚底鑊比較好。要平又要好用，有厚鐵餅底嘅入門不鏽鋼鍋已經唔錯。深煎鍋比較實用，煎炒煮炸都得，蒸小小嘢都得，加個蒸籠又得。
Carl Schmidt Sohn 24cm 深煎鍋：係我電磁爐最常用嘅其中一隻鍋。
之外，特價買咗套 牛頭牌 20cm Pro Twins Cook：包括 20cm 單柄鍋、20cm 小煎鍋、鍋蓋。(屯千 訂購價 ~$270，又係緣份，註定。)
20cm 單柄鍋主要用來煮麵。而令我喜出望外嘅係用佢煎炒都好掂。咁係因為佢同隻 20cm 小煎鍋都係一樣咁厚底。
相：https://drive.google.com/file/d/ ... view?usp=drive_link
註：平價煮麵煲之中，係 牛頭牌 或 美亞 嗰啲厚底單柄鍋，鍋底鐵餅夠厚夠質量，我先至放心咁樣玩。其他雜嘜不鏽鋼單柄鍋未必適合乾燒煎炒。

　　講開小煎鍋，有段插曲。
又係貪心或者好奇，想試 不鏽鋼多層鑊，唔知好唔好用又唔敢買太貴。
行過深水埗賣專業刀具嘅店，平平哋買咗細細隻 20cm 小煎炒鍋試吓。
相：https://drive.google.com/file/d/ ... view?usp=drive_link
電磁爐上，細細隻多層鑊，傳熱快，900W 熱鑊，唔使兩分鐘，鍋正中間到周邊好快就好夠熱，邊緣熱到辣手。快速 煎蛋炒蛋或快炒雜碎都好用。
但要慢煎就比較難用，長用 600W 好快就太熱，300W 好快又唔夠熱。個爐 300W 時開吓熄吓又係唔掂... 結果用咗唔係好多次就半賣半送俾咗人。
經驗話我知，電磁爐都係厚底鍋比較實用！
事後，導致我當時行過屯千見 牛頭牌 入門套裝，厚底又咁平，唔多考慮就訂咗。
形狀同尺碼都相差無幾嘅小煎炒鍋，由深水埗賣嘅多層鑊 換成 牛頭牌厚底鑊，電磁爐長用 600W 升溫唔太快，300W 降溫亦唔太快，好用。

　　另一方面，因為 用開嘅 天上野 鐵砂鍋，用到鍋底變形向上拱起，所以有借口換鑊。貪得意 $150 買隻二手 孖人牌 中式鑊造型嘅不鏽鋼多層鑊。
值得注意嘅係我形容呢隻 孖人牌 係 "中式鑊造型嘅鑊"，而唔係 "中式炒鑊"，繼續睇落去就知原因。
呢隻 孖人牌 不鏽鋼多層鑊，用電磁爐水煮，比厚底鍋更快水滾。水蒸，成個鍋蓋好快蒸到辣手。
煎一兩隻太陽蛋或蛋奄列係好掂，不過稍為要用多啲電。
要炒其他嘢就好麻麻。
蛋炒飯：落蛋汁再落飯(新鮮熱飯)後，飯烘咗一大輪好似都唔係好香，炒咗好多吓，飯依然有啲濕腍感。但鑊斜邊飯掂唔到嘅表面就標緊煙，咩料呀？！
炒菜：明明已好有耐性，用 "中火"(1200~1600W) 預熱兩三分鐘，鑊熱到有少少油煙，但一落菜 (一人份量只) 啫 三秒多啲就冇哂聲氣，結果係炒極都水汪汪咁囉！
炒麵：唔掂！就算鑊燒到幾熱，開大火都好，一落麵 啫三秒多啲就黐死晒，掂唔到麵嘅鑊面又係標晒煙。
我頂！炒 出前一丁 係我撚手菜，明明用隻 Carl Schmidt Sohn 或 美亞 ，兩隻 cheap 嘢都炒得好地地，貴嘅 孖人牌 就唔得？！咩料呀？！
抱住屢敗屢戰精神，我一次比一次大火熱鑊，結果依然炒麵完全黐底！
之後仲熱到鑊面拱起，鑊內層變成空鼓。最後不論用電磁爐定電陶爐，就連煎隻太陽蛋都唔掂。

　　最終結果係適得其反！
原先係因為隻 天上野 鍋用到拱起，諗住 換隻 孖人牌 會好啲。倒頭來隻孖人牌鑊都一樣用到拱起。
而唔一樣嘅就係：天上野 係窒化鐵鍋，拱起咗都仍然煎炒得到，只係需要比先前用多咗油。孖人牌 係多層鑊，一旦變形拱起咗，傳熱變得極差，咁就收得工！
傳統炒中菜要較高溫，偏偏呢啲咁嘅多層鑊，又唔挨得高溫，又要扮晒中式炒鑊咁嘅造型。
多層鑊除咗蒸煮之外，炒多啲啲嘢都唔掂，簡直係花拳繡腿！
買呢啲咁嘅 中式鑊造型嘅多層鑊，買佢就好似交智商稅。

　　呢 $150 智商稅或算係學費，我覺得值！
呢次我再一次好肯定咁學識：電磁爐 要用 厚底鑊！
呢一點真係重要到不得了，我必須再次提醒自己！
電磁爐 要 厚底鑊！
電磁爐 要 厚底鑊！
發夢都要記住！蛇咬都唔可以忘記！
電磁爐 要 厚底鑊！
電磁爐 要 厚底鑊！

　　我亦試過 電陶爐 用多層鑊。
同 熟鐵鑊 相比，多層鑊 乾燒時，"表面上" 更為優勝，快熱、熱力擴散得更均勻。
要注意嘅只係"表面上"！
多層鑊 一旦接觸到食材，呢層 "表面上" 嘅熱力就被冷卻，急速降溫。
就算加到好大火，熱力要經過多層"關卡"... 接觸食材嘅鑊面難以升溫。相反，冇食材嘅鑊面就繼續升溫。
試過就連細塊雞排或細隻雞翼都好難煎得香脆。結果只能用來煎隻蛋，炒好少嘢。

熟鐵鑊 乾燒時，中間比較快熱，周邊要等一等先至熱。
實際應用：
熟鐵鑊 接觸到食材，鑊面亦會降溫。
只要稍為加到中大火，熱力經過實心鐵，接觸食材嘅鑊面溫度可有限度回升。
用 熟鐵鑊 煎炒，只要食材處於鑊較為中間位時，就能得到較多熱力，咁樣我覺得較符合煮食邏輯。

另外，又可以睇吓 麥花田 佢用不同物料嘅平底鑊煎肉。
https://www.youtube.com/watch?v=xhvwLvfw_-c
佢最貴隻兩千蚊嘅 All-Clad 同 其他鐵鑊比較，煎肉未有太大優勢。
兩千蚊隻 All-Clad 我估都只係用來煎吓洋蔥、煮汁煮意粉。抵唔抵用就見仁見智。

　　電陶爐用鑊大小：
中式炒鑊或砂鍋，鑊底平底部分比爐嘅發熱面稍為細，咁樣比較理想。鑊底邊緣以外，發熱環露出，熱力可以射上鑊側邊嘅斜底，有少少似明火火焰包圍鑊嘅效果。
我雙環電陶爐，天上野鐵砂鍋 鑊底剛好大過內環又細過外環，咁都幾好。
平底煎鍋，鑊底剛好同發熱面一樣大或稍大啲啲都得，但唔好太大。
我隻 Lodge 10.25吋 鑄鐵鍋 對我個電陶爐來講係大左啲，中間夠熱時，最周邊要等較耐先至夠熱。
咁上海街買嗰隻 10吋 鐵鍋呢？唉，之後講。
雙環電陶爐，用細隻平底鑊可調用內環火，咁就慳電啲。

　　電陶爐用鑊物料：
最好係暗色鐵鑊。我試過不鏽鋼，加熱係超級慢。我估係銀色鍋底會反射電陶爐嘅紅外線熱能，所以鍋較難吸熱。
再講，有啲電磁爐廣告，為咗突顯電磁爐嘅優勝，往往只會用不鏽鋼鍋煲水計時...呢個實驗我認為對電陶爐係非常唔公平。
我試用 熟鐵鑊 或 窒化鐵鐵砂鍋 煲水，事實上 電陶爐 的確慢些少水滾，但就唔係好似廣告咁，電磁爐快好多囉。
廣告經常強調：電磁爐爐面唔發熱，好安全，電陶爐有餘溫，好危險！
應用上：用隻唔太厚嘅鐵鑊來煎炒，電陶爐嘅餘溫可穩定鑊底溫度。
至於電磁爐呢？爐面唔發熱，只係依靠鑊底發熱。如果想煎炒夠火侯，不論鐵鑊定不鏽鋼鑊，我都係嗰句：
電磁爐 要 厚底鑊！
電磁爐 要 厚底鑊！

　　補充

專業電磁爐 - 牛頭牌 20cm Pro Twins Cook：
----
牛頭牌 20cm 單柄鍋- 厚底 ~19cm (中火 <= 900W)：
預熱同煎炒用法，幾乎同美亞 ~16cm 底嘅 30cm 不鏽鋼炒鑊差不多。(可睇返之前)。
----
牛頭牌 20cm 小煎鍋 - 厚底 ~15cm (中火 = 600-900W)
900W 預熱時間要比美亞嗰隻稍短，煎炒用法兩者差不多。
----

---待續---

私人傳訊回覆 引用

韭菜仔


洋房

積分: 83


5#
發表於 5 天前 |只看該作者
本帖最後由 韭菜仔 於 25-9-24 11:25 編輯

--- 有失有得 ---

　　我窮鬼嘅新居，都只係最基本硬件裝修。原裝公屋廚廁。
廚房灶頭對上旁邊加個孖插座，原裝灶頭上裝塊板加高，上面放兩台座枱爐 (電磁爐或電陶爐)，下面多咗個空間放常用雜物。
再裝一把平價 KDK 抽氣扇。基本上煮食嘅部分就係咁，冇抽油煙機。
當時我未曾用過電磁爐煎炒，為咗方便裝塊板，毫不猶豫就決定將灶頭嗰段石油氣管 cut 走。到正式開始用電磁爐時就後悔了。
失去咗用明火嘅可能性，破管沈火(破釜沈舟)，硬著頭皮去試用無火煮食，得到嘅係呢次 浪漫旅程。

　　破管沈火，冇得用明火已成大局。(用卡式石油氣爐咪得囉，但經常用好重皮㗎！)
假如當時肯退一步，只要稍為放吓我對 電磁爐 嘅信念 (依家諗返就係 執念)，買多個電陶爐，
用返隻 窒化鐵鐵砂鍋 煎炒就得。電磁爐只用來煲水或煮麵，就係咁簡單，唔使搞咁多。
正係我堅持信念 (執念)，先至有呢次旅程。
買多咗幾隻不同嘅鑊。透過試驗不同鑊嘅特性，令我體會到明火、電陶爐同電磁爐嘅不同特性，從而了解到無火煮食困難之處嘅根源。

　　　　失去明火，得到嘅係見識同見解。
以前用明火時，我唔明白點解千幾二千蚊隻鑊會有人買。但當我親身試過唔只一個嘅電磁爐後就體會到。再行吓街睇吓，就似乎明白。
電磁爐 理論上高效能，煲水超快滾，可惜實際上加熱非常唔均勻，煎炒前熱鑊，係極難令成個鑊底均勻咁熱。
如我之前講過嘅 "日環食" ：一般唔係特別厚嘅鐵鑊，"光環"位同正中央位，乾燒熱鑊時溫差可能超過70攝氏度，鑊周邊溫差更大...
估計有啲本身煮嘢唔叻，或者用開明火煮食嘅人，電磁爐用普通鑊煎炒唔掂，就用千幾蚊試圖解決問題囉。
我窮鬼就連肉都唔可以時常買來食，邊捨得買千幾蚊嘅鑊吖。(六、七百蚊隻鑊都覺得好貴)。
只好以勤補拙，買多幾隻平價鑊試。用技術解決問題。
我嘅見解：又係嗰句：
電磁爐 要 厚底鑊！
電磁爐 要 厚底鑊！
因為呢點實在太重要！用法都好重要！(詳情可睇返之前)
如果你係電磁爐為主，即使你好有錢，我都唔希望你花錢買隻超靚鑊但個底又唔夠厚，結果用落麻麻。
當然，有錢嘅話，電磁爐用貴價厚底鍋就更好 (中式炒鑊款除外)，熱鑊時間可縮短，煎得可更靚更均勻(我估)。
有啲更貴更靚嘅多層不鏽鋼厚身鍋，更可煲煲仔飯、無水蒸煮 等等。
退一步：電陶爐用好平嘅瓦煲都做到。
我嘅見解：需要長時間煮 (煲仔飯、湯、粥、中藥...)，平價座枱電陶爐 用 平價鍋，效果可比美 貴價電磁爐 用 貴價鍋。
我無火煮食就 電磁爐 同 電陶爐 雙修，咁你哋呢？

　　失去明火，失去少少金錢同時間，得到嘅係成功！成功以無火繼承鐵鑊嘅好處：
我要鑊氣，又要鑊唔貴。又要馬兒好 又要馬兒不吃草，有冇呢？
試試埋埋，我認為吃得最少草嘅好馬係：
1. 明火 + 傳統中式生鐵鑊。
2. 電陶爐 + 唔厚唔薄嘅鐵鑊 或 鐵砂鍋。
3. 電磁爐 + 厚底不鏽鋼鍋**。
炒粉麵 火候要求較高， 電陶爐 或 電磁爐 要 厚鑄鐵鍋。
明火、電陶爐 可以平平哋試吓二手 de buyer 等等嘅 好馬，
而要馬不停蹄，鍋就要係 無塗層。
嗰啲 LC、Staub、小V鍋，我就唔會俾錢買，唔使錢送俾我或者會研究吓。
至於嗰啲聲稱可用金屬鑊剷嘅蜂巢鍋，送俾我都唔要，嗰啲一粒粒嘅花紋塗層，一旦甩咗拎咗嘢都唔覺。
**雖然 不鏽鋼鍋 外觀同 鐵鑊 好唔同，但入門級嘅厚鐵餅底嘅不鏽鋼鍋，喺電磁爐上主要靠鐵餅傳熱，某程度上都可以當鐵鍋咁用，最重要係價錢平！

　　失去明火，得到嘅係獨立思考、批判能力 同 更寶貴嘅經驗。
關於煮食，除咗youtube 或 老牌討論區之外，近年我搵到唔少 Threads 同 Reddit 貼文。見有唔少有心人，都有耐性解答其他人嘅問題。
只可惜係佢哋多數人都冇講明係用明火定電磁爐。如果十多年前，佢冇講明係電磁爐嘅話我都當佢係明火。
但近年香港新樓都係納米樓，好多都係電磁爐，加上見唔少廣告都吹到電磁爐有幾好有幾普及。而我因為呢次旅程，深深體會到 電磁爐 同 明火 大不同。
我睇法係：近呢五、六年關於廚具或煮食技巧嘅貼，如果佢冇講明用咩爐咩鑊，好話唔好聽，對新手來講近乎毫無參考價值。
新手我認為睇公開嘅 youtube 較好（但唔建議睇 shorts）。要睇佢用咩鑊，明火定電磁爐，小心思考吓佢嘅煮法係唔係啱你用。倒返轉，我認為新手發問(有咩鑊介紹...點解我XXX會好易燶/黐底嘅...)都應該講明自己用咩爐，咁人哋先至可以對正下藥幫你。

　　啲人經常講：因為想少啲油或油煙而用易潔鑊。
我覺得，如果係納米樓開廚，用蒸焗爐咪仲好，唔駛煩咁多，好過用易潔鑊就住煮。
註：我未住過納米樓開廚，如果住過嘅人不如分享吓啦。

　　如果梗廚，我覺得冇乜必要因為怕油煙而用易潔鑊。
我自己冇抽油煙機，都係咁煎炒啦，我係舊公屋廚房連露台，我對住個爐，背後就係晾衫位。假如經常大油煙，我試幾次就放棄咗啦。
註：我啲衫最吸味唔係油煙，而係煲中藥嘅味。
我最大油煙嗰幾次，咪就係當初唔識用電磁爐時，天上野鐵砂鍋唔夠厚底，中間標煙。仲有用隻死人孖人牌多層鑊時囉。
如果無火煮食識得 "中火" 慢燒 (詳情可睇返之前)，油煙少啲，耗油量自然都少啲。只要係平底鍋或深煎鍋，無論 鐵鍋 定 不鏽鋼鍋，用油量都可以好少。
少到我每次落油後要用隻木鑊剷反覆掃，先至可以將油薄薄咁掃勻。
用鐵鑊炒粉麵我唔敢講話少油(有啲粉麵係非油炸，炒時吸較多油...)，但用 不鏽鋼鍋 煎肉、蛋炒飯或炒菜我可以少油到同人哋用易潔鑊差不多。
用易潔鑊嘅你，又敢唔敢同我用不鏽鋼鍋 鬥少油呢？

　　見唔少人講：明火大油煙，電磁爐少油煙。我唔太同意。
如果學啲電磁爐廣告咁，明火用中式鐵鑊大火爆炒，電磁爐用易潔鑊低溫撈撈吓，咁就梗係少油煙啦！
倒返轉，你有冇見過大牌子嘅家用電磁爐廣告或電力公司廣告用中式鐵鑊吖？衰啲講句：嗰啲商家高層 可能連鐵鑊都唔識用。
再講：有啲賣電磁爐嘅商家一味吹：選購優質 (貴價) 電磁爐火力更勁更有鑊氣。
假如我未用過電磁爐，都會信嘅。
但我經驗：就算再厚嘅鑄鐵鍋，不論熱鑊定爆炒，電磁爐好難用到 1600W 或以上。再上就標哂青煙。
更何況 孖人牌多層鑊就係被我用電磁爐大火整死咗 (詳情可睇返我之前)。
電磁爐 2000W 家廚來講煮乜都夠，關鍵唔只係睇有幾多千 Watt，而係個爐散熱夠唔夠好，能否容許隻鑊夠熱。
我認為：商家講嘅電磁爐火力勁係廢話，而優質電磁爐散熱較好係真嘅！
退一步：電陶爐(尤其可 BBQ 嘅)唔需要好貴， 熱鑊呢方面比電磁爐優勝得多。

　　另外：我隻 Carl Schmidt Sohn 24cm 不鏽鋼深煎鍋，新買第一次用，係返家人屋企用石油氣爐 (雙環石油氣爐。抽氣扇只。)。
當時只用內環火慢燒熱鑊，足以通過水珠測溫。只用內環火炒麵(一人份量)，麵同配料一齊炒時只短暫用雙環火，咪又係少油煙又香口。
相反，電磁爐因為加熱唔均勻，先唔講香唔香口，要炒麵唔黐底，有較大機會比明火較大油煙。

　　以我經驗：明火定無火，只要用啱鑊同用啱方法，鐵鍋 定 不鏽鋼鍋 都可以少油煙又炒到香口。(方法詳情可睇返之前)
star leo 用明火中式鑊，佢成日講 背口訣！我經驗係 "見煙" 只需要有少少白煙或聞到有啲氣味已經足夠。
以前用明火或依家用電陶爐，白煙唔太勁時都仲係香嘅，我估冇問題。
電磁爐 熱鑊，稍有不慎過大火，就好快出白煙然後變青煙。變到好臭好攻鼻，咁就實有問題啦。
　　以我經驗，最容易燒到出青煙係 電磁爐，其次係電陶爐，跟住係煤氣爐(深紫藍色火)，石油氣爐(淺藍/粉藍/藍綠色火)較不容易燒出青煙。
之前明火，用 天上野鐵砂鍋，用較低煙點嘅花椒油煎蛋都仲得，轉用電陶爐就唔太得(油煙好容易變臭又變黐)。
你哋會信廣告，定係信我呢個由細到大廚房都冇抽油煙機、同從未買過易潔鑊嘅死窮鬼呢？
註：我呢一世直到 2025年9月，除咗電飯煲之外，未曾自費買過任何易潔鑊。但係為咗浪漫旅後續，日後唔排除會買來試。

　　最後，如果你為咗貪靚，用隻靚靚易潔鑊會煮得開心啲，咁你就用啦，最緊要開心。
用易潔鑊中細火小心啲用，煮到少少香口都 OK。千其唔好學有啲 youtuber 咁教人用易潔鑊大火炒炒到"鑊氣"。
煎炒要用高煙點嘅油，呢個係呀媽係女人嘅理論。
但係用易潔鑊煎炒，如果用電磁爐，我估用煙點冇咁高嘅油(如初炸種子油 150~180攝氏)比較好。油到煙點出青煙你會聞到臭，收返細火就OK。
如果用高煙點油 (如 豬油、精煉植物油 等等)，當你聞到臭，你隻易潔鑊可能已經收得工。
註：較早前明火，用家人嘅 美亞扭紋寶，曾經用過葵花子油(低煙點)，煎雞都幾香甜㗎。用 易潔鑊 嘅你不妨參考吓。
　　
　　以上能夠俾大家參考嘅，都差唔多。多得我對 電磁爐 嘅 執念，先至諗到以上咁多嘢。之後嗰啲當故事聽吓就算。
回覆舊貼 都係旅程之一。除咗關於我自己之外，翻睇 youtube 加睇回覆，睇其他人嘅想法，都學到嘢㗎。
遇到一啲我認為有用嘅貼或者都會分享吓。

　　補充

　　淘寶嘢係平，但我經驗係有部分有伏，要撞手神。深水埗有啲都平，但性價比未必高。
如果真想平買平用，穩陣嘅話去上海街揀老牌子。觀塘美亞 地方夠大，廚具可任睇任摸，新手好去處。
百貨公司等得就等減價先至買。其他地方大家都可以分享吓。

　　無火煮食真係冇咁熱？我經驗大至上都係。
但係用明火就一定熱好多呢？熱就一定熱啲啲。如果覺得好鬼熱，咁就係你開得太大火，火焰升到鍋旁邊。
我嗰次明火用 Carl Schmidt Sohn 24cm 不鏽鋼深煎鍋 炒麵，同電磁爐相比 又唔覺得特別熱。
用電陶爐煲中藥，感覺同明火差不多咁熱。
用電磁爐煲中藥，係冇咁熱，但煲出來淡好多，咁都冇意義啦。
註：電磁爐 翻煲兩次，感覺藥材味都唔係出得哂。正常明火或電陶爐只翻煲一次，藥材放入口咬係淡口嘅。

----
另外：Lodge 10.25吋 鑄鐵鍋，比我個電陶爐 發熱面稍為大左啲。
用淘寶矽膠防滑墊，DIY 整個圓框。跟鑄鐵鍋嘅招紙畫圓再剪。圓要比爐發熱面稍大同時比鍋底細啲啲。
相：https://drive.google.com/file/d/ ... view?usp=drive_link
相：https://drive.google.com/file/d/ ... view?usp=drive_link
相：https://drive.google.com/file/d/ ... view?usp=drive_link
一來可防滑，二來 鑄鐵鍋 同 爐面之間稍有~1mm 距離，熱力困係圓框內，可均勻傳到整個鍋底。
之前預熱鑊只可用 1200W 就住慢燒，依家可 1500W 熱鑊，預熱時間縮短咗，鍋最週邊又快熱咗。

另可參考前人 用電陶爐 嘅奇招。
https://www.baby-kingdom.com/for ... thread&tid=10968489

---待續---
私人傳訊回覆 引用

無知人


大宅

積分: 3989


6#
發表於 前天 18:21 |只看該作者
嘩，真係好長呀。
唉，厚底儲熱係好，但等到夠熱係天芳地老呀？
我用熟鐵加煤氣呀，30秒內出煙可以落油。又輕身，洗都方便唔攰呀。
最煩係第一次，燒到變白、變藍，我用左 45分鐘，用咗我好多煤氣。但係有 d 供應商，買左幫人做呢個步驟。

一開火熱力就到，用過番唔到轉頭。

樓主只好用時間換取無火啦。

要鑊氣，睇下王剛獅虎啦，煮個餸費話一大堆，成30分，算把啦。佢既專業爐頭，係恆星發動機，即係專業廚房果d，好似呢類爐頭除左gas，都係加左氣/氧？
私人傳訊回覆 引用

韭菜仔


洋房

積分: 83


7#
發表於 前天 20:07 |只看該作者
回覆 無知人 的帖子

明火同無火的確好唔同。我轉咗無火一年有多，仍好懷念用明火嘅滋味


厚底鑊可以話係電磁爐煎炒嘅唯一選擇。
電陶爐較為似明火，炒少少嘢可以用唔厚唔薄嘅鐵鑊。但唔可以太大隻...想炒多啲啲點都要厚底鍋儲熱，冇計。
私人傳訊回覆 引用

韭菜仔


洋房

積分: 83


8#
發表於 前天 20:10 |只看該作者
--- 厚鐵鍋驚現銀色 ---

　　我喺上海街買嘅 10吋口徑 厚身鐵鍋，一心諗住買到隻好馬，可馬不停蹄咁開心，但旅程之中總有啲不測。
用中式炒法炒同一隻長通粉。
用 電磁爐 就算慢燒到鐵鍋稍大油煙，通粉總有小小黐，黐到一條條幼痕。
用 電陶爐 中火慢燒，唔需要大油煙，都可以完全唔黐底。
開心比較後，再一次證明，電陶爐煎炒比電磁爐優勝，真開心！

　　開心過後，用意式煮法煮長通粉。手持牛油將其中一邊壓落鍋面中間，發現牛油有黑色，當時以為只係鑊屎。
洗鑊時用百潔布用力擦，鍋面中間越擦越銀。聞落有淡淡異味。有如磨機碟 拮碟 (cut碟) 氣味。
片：https://www.youtube.com/watch?v=26gStg1cCPQ
心諗有唔妥：鑄鐵鍋係一件實心鐵，點解係銀色？點解有拮碟嘅異味？
隻鍋係上海街買，好重手，敲落去叮叮聲厚實而清脆，理論上係冇塗層，點解會咁嘅？

　　想安慰自己：呢啲只係過熱，氧化咗啫。
跟住就好似鴕鳥將頭埋喺沙咁，我頭埋喺電腦前，搵吓有冇啲關於鐵鍋變銀色嘅例子。
當時得到安慰嘅係搵到唔少視頻，都係話鐵鍋氧化咗變咗銀白色。重新燒鑊開鑊就變返原來嘅灰黑色。
抱住冇咁易認輸嘅心態，我決定試吓搞返掂呢隻鍋。

　　我用百潔布再努力啲洗擦，鍋面中間銀色範圍越擦越大。變得更亮更銀。先前中間灰銀色帶有黑同黃嘅地方變成純亮銀色。
網上教重新燒鑊開鑊都係明火。我冇明火，只好試用火槍(卡式石油氣火槍)，向鍋面直接燒，好似冇乜變色，仍然亮銀色。
可能我支火槍唔夠力掛...

　　我再次安慰自己：我呢隻係鑄鐵鍋(生鐵)。網上有啲影片標題雖然都係"生鐵"，但睇落片中鑊又好似係熟鐵。情況可能唔一樣呢...
無奈地，用廚房紙狂捽銀色位置。點知越用力捽，異味越大，有如用磨機 cut 鐵嘅氣味，幾濁鼻。呢陣味留喺手指上極難清走...
火直接燒反而冇乜氣味。
相：https://drive.google.com/file/d/ ... view?usp=drive_link

　　之後試用鋼絲刷狂擦，發現聞到最濃烈異味(磨機cut鐵味)，係喺黑色層被磨走及暗銀色剛剛現形嘅一刻。
而 黑色層同銀色之間有D深黃色笠黐黐嘅油漬。
冇養鍋，過一兩日，竟然發現中間亮銀色嘅地方，並冇變成鐵生鏽嘅啡色，只係由亮銀變成暗銀。
呢隻理論上係實心鑄鐵鍋。諗住擦走哂原有我認為嘅天然塗層，重新燒鑊開鑊就繼續用。
但唔知點解會出現嘅唔係鐵鏽應有嘅啡色，而係暗銀色?
自責：究竟係因為我未夠努力徹底擦去我認知嘅天然塗層？還是有其他原因？
相：https://drive.google.com/file/d/ ... view?usp=drive_link
相：https://drive.google.com/file/d/ ... view?usp=drive_link

　　再之後，我冇養鍋，又刻意整濕隻鐵鍋，刻意令佢生鏽。
但估唔到，鍋面中間係我最初發現有銀色嘅位置，又係當時最用力擦嘅位置。
呢個位由亮銀變暗銀色後，被我咁搞法，仍然係暗銀色，冇再進一步變色，奇怪...
後來刻意擦甩鍋面其他黑色嘅位，就好快生鏽變啡色。
相：https://drive.google.com/file/d/ ... view?usp=drive_link

　　有人話係假鑄鐵鍋，我都開始懷疑：
感性分析：
呢個鍋好重手。同市面上常見嘅 Lodge 一樣咁重手，而且敲落去同樣係叮叮聲，音色清脆。
鐵本身好平，理論上冇必要造假。

但：
已經多次煲梳打水，再刻意洗走油層，但擺咗幾日個樣依然都係差唔多。
鍋面正中間依然係暗銀色。
刻意用鋼絲刷擦甩嘅黑色，雖然有生鏽變啡色，但帶有一部分不明嘅暗銀色，
鍋最周邊未擦甩嘅純黑色地方仍然係純黑。

理性分析：
鐵鍋冇油膜保護，偏偏只有一部分生鏽，不是完全變鐵生鏽嘅啡色，咁估計係有層嘢，而且正中間銀色嘢睇嚟唔係一小層咁簡單。
一隻咁厚嘅鐵鍋，都唔知點解要造層咁嘅嘢喺度。究竟係"好心做壞事" 定係 鐵原材料本身有問題要造層嘢掩飾。
不過感性再諗：
呢隻始終都係鐵鍋，再努力啲洗刷吓佢理應照用得。

　　唉！假如當初冇驚現銀色，仲以為呢隻係好馬。
其後喺大埔墟 生活館 好彩遇到特價 Lodge 10.25吋 鑄鐵鍋 <$200，唔諗咁多買咗先。
諗返轉頭，當時喺上海街搵到隻似乎好好嘅厚身鐵鍋，又比當時嘅 Lodge 平，就以為自己好醒...又唔怪得自己，因為當時行上海街見到 Lodge 係貴好多。
再講：依家 Lodge 鑄鐵鍋 似乎比 疫情時平咗，美亞 鑄鐵鍋 之前好多款都冇貨依家有唔少款有貨。有買襯手。
買 Lodge 嘅原因唔係想放棄上海街買嗰隻鍋，而係心有不甘，想用隻 Lodge 做對照實驗，希望想搞清楚情況，想搞返掂上海街買嗰隻鍋繼續用。
咁又為旅程添加點後續喇。
註：人係有惰性。我用隻 Lodge 鑄鐵鍋好地地，好自然就懶得理嗰隻變咗銀色有唔妥嘅鐵鍋。
但我堅持一個想法：搞返妥嗰隻鐵鍋俾自己用。Lodge 呢隻好嘢可以好平咁半賣半送益街坊。咁我就有動力繼續努力洗擦嗰隻唔妥嘅鐵鍋。


　　補充

　　上海街買嗰隻厚鐵鍋 <$200 只。話貴唔貴。假如兩百蚊買隻易潔鑊，差不多一年用殘，咁都死得心服口服。
但呢隻理論上係鑄鐵鍋，唔係易潔鑊！喺上海街買嘅，理應係生財工具，原則上係可靠耐用。唔服！
教訓：上海街 買鑊，並不是所有鑊都值得買，要買大牌子或老字號！
講開大牌子，有奇怪現象令我匪夷所思。

　　點解好多外國牌子出嘅"中式炒鑊"賣咁貴，又會有人買？
好多所謂嘅德國炒鑊標價千幾二千銀，網上介紹強調德國製、信心保證...
但以我所知，德國當地人根本好少用炒鑊，衰啲講句：炒中菜德國佬識條鐵咩！
憑乜貼個德國牌子造隻中式鑊造型嘅炒鑊，賣到二千銀咁貴？！
細心睇，好多不鏽鋼廚具說明都話唔適宜熱鑊沖凍水。偏偏中菜好多時都煮煮吓又灑酒或倒上湯或汁 (我估唔係人人都咁好耐性會預熱酒或上湯掛...)。
講白啲：呢啲中式鑊造型嘅不鏽鋼鑊，根本唔適合煮中菜。
得罪講句，買二千蚊隻德國中式鑊，唔知話你係不幸中伏好定係話你傻好，一係你就有錢冇地方使。
仲有其他好多：咩咩瑞士牌子、丹麥牌子 中式鑊？咩邏輯呀？！要崇洋嘅話，有錢買隻深煎鍋/西式炒鍋煮西餐唔好咩？
不過如果你自問每次翻轉鑊底見到 Made In Germany 會好開心嘅話，咁你就開心買啦，可唔使理佢係中式定西式鑊喇。
意大利牌子炒鑊我認為都講得通，因為以我所知意式會有唔少炒嘢。
　　又講吓日本牌子炒鑊。以我所知，日本當地人用雪平鍋或類似嘅倒梯形薄身鍋，細火煮較多。頂多咪鐵板燒、乜燒物燒(鑊面上慢慢燒)。
唔會好似我哋咁經常乜都炒一大餐。佢地分得好清楚，用來爆炒嗰啲叫 "中華鍋"。
既然人哋都要咁樣特意分辨。中國人又憑乜要俾多幾百蚊買隻日本炒鑊呢？
要崇日嘅話，去 AEON 買隻一百幾十蚊嘅雪平鍋唔好咩？

　　除非係特價賣好平，否則我唔知買德國炒鑊或者日本炒鑊係乜邏輯囉。
唔通隔山買貴鑊，炒嘢會香啲嗎？！
你地又點睇？

---待續---
私人傳訊回覆 引用


首頁
1

尾頁

跳至頁
返回列表
回覆
發帖
高級模式 | 發表帖子
B Color Image Link Quote Code Smilies
你需要登錄後才可以回帖 登入 | 註冊
Presslogic Logo
Baby Kingdom Logo
聯絡管理員 廣告查詢 使用條款 免責聲明 使用意見

Copyright © 2025 Baby-Kingdom.com Limited. | Privacy Policy