少年成長今日: 1|主題: 16129

收藏本版

回覆發帖

返回列表

跳至頁

查看: 2129 | 回覆: 0

世界盃 [複製鏈接]

csir3290

子爵府

積分: 12762

1^#

發表於 26-7-5 09:39 |只看該作者 |倒序瀏覽 |打印

而家剛剛正值世界盃進行期間，好彩阿仔啱啱考完試，所以開始有時間同阿仔一齊睇波，我諗作為一個爸爸，其實喺個仔細個嘅時候可以一齊睇波，一齊對住部電視機嗌，都係一個非常之好嘅回憶，希望我仔將來大個嘅時候，佢都會同自己嘅仔女講話佢細個嘅時候都係同佢哋嘅阿爺一齊睇波。我成日都講做父母嘅要搵多啲機會同啲仔女一齊製造一啲特別嘅回憶，唔好話去旅行或者去啲咩特別嘅地方食啲咩特別嘅嘢，其實一齊睇可波都係一啲好特別嘅回憶，講真世界盃四年先一次，細路仔真正識睇波嘅時候，我諗都要佢哋七八歲或者八九歲開始，試問喺佢哋嘅成長階段能夠陪佢哋一齊睇世界盃嘅機會其實可以有幾多屆呢！所以有呢啲機會嘅時候做父母嘅就要爭取。
講開要製造一啲共同嘅回憶，世界盃期間就有單新聞，話有間學校出咗張有關親子活動嘅通告，邀請啲家長同埋細路仔喺凌晨嘅時候返去學校睇世界盃比賽，唔知係咪呢個活動太特別，所以張通告就畀人擺咗上網，大家都知道一擺上網嘅結果就係會引嚟好多人討論好多人講，呢張通告嘅post出咗之後，連新聞同埋電台都有有人講，你就知道呢一個活動幾咁特別啦！但係唔知係咪就係因為太多人講，而有啲人仲不停喺度鬧話叫啲細路仔凌晨返學校睇波，會影響啲細路仔瞓覺，又話要凌晨返學始終都唔係幾好，唔係個個都可以參加到凌晨進行嘅活動，講吓講吓，唔知係咪太多反對嘅意見，終於個活動最後取消，而改為早上進行。我唔知道點解有人會覺得呢個活動唔好，因為我一睇到呢個post我即刻同老婆講話呢間學校真係諗得到，試想像一下，有幾多學生能夠凌晨返學校，而且仲可以同一大班人一齊喺學校，同埋自己嘅父母一齊睇波一齊笑一齊傾一齊講呢！講真我同阿仔喺屋企睇波，始終都係兩個人，始終都係唔夠一大班人一齊睇一齊嗌一齊笑咁好氣氛。呢間學校諗到一個咁特別嘅親子活動方法，可以話係唔止活動咁簡單，仲可以幫啲細路仔同埋家長製造一個特別嘅回憶！我仲同老婆講話如果我以前讀書嘅時候，我間學校諗到呢啲方法我一定會即刻參加，唔好話以前，如果而家阿仔阿女間學校有啲咁嘅活動，如果阿仔阿女想參加嘅我都一定會陪佢哋！我覺得只要呢個活動唔係逼人參加，千祈唔好逼啲老師返去當值一齊睇又或者要逼啲細路同家長一定要參加，只要全部人都係自願其實成個活動我就覺得好有氣氛好有意義！幾難得可以有咁嘅機會同自己嘅仔女製造一個咁特別嘅回憶呢！有一句成日都喺網上面見到嘅說話講就係贏咗99.9%嘅家長同學生！而家個活動可能就係因為比輿論講得太多而取消咗，我真係覺得非常可惜！而有呢次取消活動嘅經驗，我諗其他學校就算想搞而家都唔敢搞！大家作為家長又少咗一個可以同仔女創造一啲特別回憶嘅機會。