夫婦情感 今日: 4 | 主題: 42771

積分: 138

1^#

發表於 10-12-13 12:10 |只看該作者 |倒序瀏覽 |打印

各位MAMI你好︰

小妹遇到一件事，好想有人幫我分析下，我無從去向。

小妹尚未結婚，一齊6年，就如同結婚了的親密、好恩愛，當年初打算同居然後結婚，發生了一件事，我”老公”突然消失左，連佢家人都找不到，後來與他爸聯絡，才知道我”老公”有一日同佢弟弟打架，甚至報警處理，然後我”老公”就無再回家過夜，電話一直都係唔通，其實佢發生事當晚有搵過我，只係我低估個嚴重性，佢平時將所有野收係心唔講我知。

發生打架事件後佢一直未有回家，直到2星期後有晚我搵佢食糖水(我住開的租約到期，要搵新屋，所以打算一齊住的，傾過地區，佢大埔我荃灣，佢話就我想近家人就選荃灣)，佢就問我搵到屋未(佢都仍然無返屋企，我想佢總有辦法容身，有問題佢會同我講)我見佢平時唔緊唔要搵屋的事，我見到好盤問佢意見又話我鍾意咪都得，都唔知佢有冇心同我一齊住，我就激佢答”關你咩事”，佢一直就話為同我住，同佢爸嘈，咁我可以點喎，無理由要佢同佢爸鬧翻架嘛，我更無理由去搵佢爸講啦。然後我見到有街招租套房，就叫佢你租啦咁(都係激佢)

我知道當初我都有錯，發生事無關心佢、佢無屋住都無上心、亦無體諒佢的心情、佢連家人都唔理時我都無理佢、當我要處理好多事時佢好多唔開心都無同我講，我忽略左佢，又自以為是，但佢食糖水當晚依然係笑笑口，無憂愁的樣，呢個就係令我低估發生係佢身上的事情的原因。

後來，我仍然繼續去搵屋，繼續打去問佢意見，因為離我退租期只有2星期，我仲未搵到，我再去搵盤(青衣)(佢從未同我一齊睇過盤，但都有一齊去搵過，因為佢工作關係，好難約一齊去睇)，考慮後再打去問佢意見，就同佢嘈，然後佢一句”分開住啦”，我以為係氣話，咁見佢咁嬲，我連忙係2日內去租另一個地方(粉嶺)，仲俾個代理呃，我都係樓市動向問過意見。個代理後來俾個新盤我睇，就租左，都無問佢，因為電話打唔通啦，SMS又唔覆，我租約只有1星期。租左後，我一直搵佢，又要搞搬屋，個舊業主又麻煩，要我係夜晚11:30交吉，我話唔得就話扣一日租，當我SETTLE晒啦，不斷SMS通知佢，都係無回應，電話亦唔通。

我一直都有不斷SMS同CALL佢的，1個月後有一日中午，我打通佢電話，當然無聽，後來佢覆我話分手，佢已回大陸住(佢一向極度抗拒上大6)，又話有新女友(MMS張相，但只係一張男女合照)等等，我簡直晴天霹靂。當晚收工就係佢家等佢，佢係附近返工嘛，佢知我去等都有覆我，但都係唔肯出現和覆好絕的話，仲話佢連父親都放棄，點會放棄唔到我，一時又話佢爸贊成同我分手(我問佢爸話唔會理我地之間的事，一唔一齊都唔關佢爸事)，將佢一直收係心的發了出來。佢見我唔肯走，打俾我媽喊住同我媽講佢一直的不滿，我點求佢氹佢都係無用，當時以為佢係發洩，就由得佢靜一排啦，然後去搵佢爸食飯先知道真係咁嚴重，佢仲叫佢爸”要溝通，搵社工”。

隔左約2個月，因為佢唔住，我都退租了粉嶺，好在我上網搵到人頂租，如果唔係我要賠11個月或一直住，我唔住因為我想存錢去還卡數向佢證明，因為佢係附近返工，佢有晚開始回家住，當然佢爸無通知我，但佢爸就會KEEP住話我知佢的情況，但一直唔知佢咩原因，開解唔到佢。

事由如今已8個月啦，佢一直唔肯見我，我過得好辛苦，份工又搞到好麻煩俾人針對，最後我11月頭被裁了。係呢8個月，我好努力將佢同我媽講的不滿都改好，包括清晒卡數、消費習慣、生活習慣、離開公司(公司人少，佔我太多時間)、將我消費過多的物資清走(有賣、有上網換同捐去明愛)和由200幾磅減到160幾磅(呢個我自己改，佢從無嫌我肥的)，仲有做好多唔同的食物、親手做本相簿俾佢、買佢鍾意的野送俾佢同煲湯俾佢(全部都經佢爸的)。

直至上星期二晚，同佢爸傾過後，我就上去搵佢想講清楚、問清楚，當我見到佢後，佢就好平靜咁話原諒左我啦，佢有新女友啦(仲用手機俾我睇，我無睇)，半年前已分左手架啦，我話我知道錯了，我們從重開始過開開心心生活、2個人面對問題、叫佢唔好收係心，佢就開始火起話見唔到我就好開心架啦，佢已經處理D晒問題，只要我離開佢就冇問題、有人結婚都會離啦、從重開始可以的佢媽就唔會死左啦，又話佢都係大6俾人呃左幾萬元、話佢當初住賓館等左我一個月俾答案佢、仲叫我去搵社工，那刻我只懂喊，後來佢叫保安趕我走，趕唔走就報警了。

我真的知道錯了，佢都有講一句，問我係咪可以同佢係香港搵屋住，又問夙知唔知佢的需要，又話叫我令佢後悔咁對我，又話當初係我叫佢自己搵屋，而家佢聽我話自己搵屋，我又唔制，問我想點﹗我就同佢講，我當初無理佢感受係好唔啱，但當時真係好多事一齊發生，係我有限時間內(佢已叫了保安報警)，我實在解釋唔晒。我同佢講，我係2日內都為左佢去租粉嶺，然後1個月內退租，佢就呆左一呆。我俾我紅簿仔佢睇，我存有幾萬了同剪了的信用卡之前都寄晒俾佢睇，改晒大洗的習慣，一星期用100元而已，佢就話唔信我。

原來佢根本唔係要時間去冷靜和消化，佢的怒氣一直都存在，佢而家更加唔再回家住了，每日上上落落去落馬洲，我知佢都辛苦。無意中，我發現佢現在的電話號碼，佢爸都應該唔知，佢當初就係同家人斷聯絡時都仲會俾我搵到，仲會理我，後來佢連我都嬲埋啦。佢成日覺得我唔會為佢去做任何事。

當晚佢都有話佢住大6係因為同佢弟弟的問題(佢爸都係咁講)，又話間屋無佢份(買的公屋)係佢弟弟的，咁我知佢同家人關係一直唔係好好。但人地家事我管唔到咁多(就算結婚都唔可以理咁多啦)，加上佢一直好愛我，唔鍾意講太多唔開心的事，而我自己家亦有好多事。我知道佢一直好想有自己的家，有個撐佢的女人令佢安心出外工作，所以大家係想一齊住開開心心的，點知就變成咁。

當中事情的細節未必好詳細，我好想請教各位意見，一個男性的怨氣可以維持幾耐，而家我唔想再提舊事，但佢又怒氣沖沖，唔令佢解開心結，佢唔會平靜到，但佢無再回家，斷估佢農曆年會回家都係未知數，再俾時間根本無幫助，我見佢之後，就寫了一篇文想寄俾佢(可能佢中午回家收信)同一段SMS(我有佢新NO)。

成件事，我地就係欠缺好的溝通，我事後都怪自己當時唔冷靜同佢傾，但佢已經叫保安，令我好心急，有時我感覺佢要試探我(因為佢對我失望過又無信心)，有時又覺得佢連警都報了，我仲要有信心下去嗎？

我真的好亂，有冇姐妹分享下、分析下，又或者男性角度分析下，俾個意見我諗諗。

謝謝

0 0 0

私人傳訊

5geng

積分: 413

2^#

發表於 10-12-13 12:32 |只看該作者

詳情真係唔係好清楚. 不過冇愛就冇恨. 佢應該仲愛你掛

私人傳訊

積分: 138

3^#

發表於 10-12-13 12:37 |只看該作者

原帖由 5geng 於 10-12-13 12:32 發表
詳情真係唔係好清楚. 不過冇愛就冇恨. 佢應該仲愛你掛

我就係同你諗法一樣，佢會嬲會生氣到咁的程度，佢真係好愛我，好在乎我。

我都同佢講，2個人的感情，如果係真的話都係經得起考驗的。但佢呢刻咩都聽唔入耳啦…

點樣可以解開佢的心結呢？

私人傳訊

maybaby

積分: 5834

4^#

發表於 10-12-13 13:15 |只看該作者

既然係咁,大家再冷靜一吓吧,你逼佢都冇用,同埋你講到佢咁唔開心,亦唔需要你理,你就比D空間他啦,如果佢仲愛你,佢實會返黎揾你的.

但另一方面,佢報警叫你走,其實都幾絶啦,喺嗰一刻我會心死呢!何必苦苦糾纏!

私人傳訊

積分: 138

5^#

發表於 10-12-13 13:46 |只看該作者

原帖由 maybaby 於 10-12-13 13:15 發表
既然係咁,大家再冷靜一吓吧,你逼佢都冇用,同埋你講到佢咁唔開心,亦唔需要你理,你就比D空間他啦,如果佢仲愛你,佢實會返黎揾你的.

但另一方面,佢報警叫你走,其實都幾絶啦,喺嗰一刻我會心死呢!何必苦苦糾纏! ...

講真，隔左8個月，我見返佢都以為佢冷靜左，可以傾。但原來佢根本無放低過，咁佢需要的都唔係時間和冷靜。我都明白無得逼，我只知道佢好嬲，正常係要時間冷靜，再去氹返佢的，但今次佢嬲成咁，我都唔知可以點，見佢咁樣生活，又好心痛。

私人傳訊

積分: 138

6^#

發表於 10-12-13 13:49 |只看該作者

[quote]原帖由 tango_yanny 於 10-12-13 13:46 發表

講真，隔左8個月，我見返佢都以為佢冷靜左，可以傾。但原來佢根本無放低過，咁佢需要的都唔係時間和冷靜。我都明白無得逼，我只知道佢好嬲，正常係要時間冷靜，再去氹返佢的，但今次佢嬲成咁，我都唔知可以點，見佢咁樣生活，又好心痛。 ...

我都問自己究竟點先會死心…我真係唔想為左一件事就失去一個世上遇到唯一的佢。

好多人都話我執著和糾纏，從另一角度睇，我唔想係佢失意時離開佢，所以一直都堅持和忍耐。

但我真係好亂，無晒主意…

私人傳訊

maybaby

積分: 5834

7^#

發表於 10-12-13 14:51 |只看該作者

如果你真係唔想係佢失意時離開佢,咁咪以朋友關係黎開解佢囉,佢唔領情就算啦!
8個月了,你都仲未明白,你要為自己唸吓,唔好哂時間呢!佢唔係你唯一架~
同埋我想知道你認為前男友冇放底過D咩呢?

私人傳訊

積分: 138

8^#

發表於 10-12-13 15:29 |只看該作者

原帖由 maybaby 於 10-12-13 14:51 發表
如果你真係唔想係佢失意時離開佢,咁咪以朋友關係黎開解佢囉,佢唔領情就算啦!
8個月了,你都仲未明白,你要為自己唸吓,唔好哂時間呢!佢唔係你唯一架~
同埋我想知道你認為前男友冇放底過D咩呢? ...

就係佢仍然好激動、好嬲的行為，但佢連家人都唔理，而家除左佢d師兄弟(佢做電工的)搵到佢，佢完全脫離我和家人的世界，根本唔可以用朋友身份開解佢。

佢講明，見唔到我就開心，我覺得呢句係氣話，因為佢想逃避過去所發生令佢好唔開心的過去，我咪同佢講，過去左的發生都發生左，我同佢一齊開心生活，咁當然佢怒氣未消，又點會一下子答應我。

其實係上星期見到佢時，我同佢講我為佢改左，佢話唔信，我知佢未放低，如果唔係，佢會講關佢咩事。

原因佢媽係7年前自殺走左，佢到而家仲未放低，仲怪佢爸令佢媽走上絕路，所以佢一直都同家人關係唔好，另外佢弟弟差唔多20到尾仲可以係讀書，唔使為家庭擔憂，又係佢另一個心結。

呢一刻，佢完全放唔開呢d心結，一個人走左。

私人傳訊

alice44

積分: 7623

9^#

發表於 10-12-13 16:22 |只看該作者

呢d係佢家裡嘅問題, 點解要嬲你, 仲要嬲到唔見你同你分手, 對不起樓主, 我覺得佢已經唔再鍾意你. 因為之前我想同ex分手時都係咁, 唔想見到佢, 見到佢就想鬧佢一樣, 所有好與唔好的都全部變到不好, 如果仲有愛, 喺愛的人面前係會心軟. 第一次見到會嬲, 但第二三次再見就再嬲唔落. 這些只是我的感覺.

私人傳訊

sukky73923

大宅

積分: 2012

10^#

發表於 10-12-13 16:47 |只看該作者

我覺得個男仔已經唔再愛你,
愛你態度係咁既咩?
時間係最好既證明,
你試下放下啦,
我睇完你既 post,
只覺好多野係你自己覺得係咁,
樓主, 再咁落去, 痛苦既只係你,
你唔好等佢喇, 感情變左係好難番轉頭架,
你重新開始啦, 係你既唔會走架,
唔係你既, 捉都捉唔到架.

私人傳訊

積分: 138

11^#

發表於 10-12-13 17:21 |只看該作者

原帖由 alice44 於 10-12-13 16:22 發表
呢d係佢家裡嘅問題, 點解要嬲你, 仲要嬲到唔見你同你分手, 對不起樓主, 我覺得佢已經唔再鍾意你. 因為之前我想同ex分手時都係咁, 唔想見到佢, 見到佢就想鬧佢一樣, 所有好與唔好的都全部變到不好, 如果仲有愛, 喺愛 ...

就係當佢失去家人時，我分不了身，亦低估左件事的嚴重性，無關心佢。而佢嬲就係我話”關佢咩事”叫佢自己租屋，然後佢自己租賓館等我一個月，但我根本唔知情，都係佢上星期講我先知。所以當我話為左佢租粉嶺佢都呆左，佢唔相信我係有咁為佢。佢都有一刻心軟﹗

連佢最親的”老婆”都忽略佢，一下子佢無晒最親的人的關心和支持，令佢走上這條路。

我隔左8個月先係上星期第1次見到佢，佢就係怕自己心軟所以一直避唔肯見我，當然我都知佢工作地點可以去搵佢，但又會得到咩結果呢﹗

我係明白要放鬆自己，唔可以咩都為佢，我只係覺得要寄望下一個可能會更好/更差的時候，眼前的這個只係因今次被忽略事件，某程度，佢都係受害人，又或者我當局者迷。

所以我好想有唔同意見。

謝謝。

[ 本帖最後由 tango_yanny 於 10-12-13 17:33 編輯 ]

私人傳訊

積分: 138

12^#

發表於 10-12-13 17:26 |只看該作者

原帖由 sukky73923 於 10-12-13 16:47 發表
我覺得個男仔已經唔再愛你,
愛你態度係咁既咩?
時間係最好既證明,
你試下放下啦,
我睇完你既 post,
只覺好多野係你自己覺得係咁,
樓主, 再咁落去, 痛苦既只係你,
你唔好等佢喇, 感情變左係好難番轉頭架,
你重新開 ...

當初就係因為我對佢愛理不理先搞成咁，好多野佢唔講(因為男性都唔善於談及感情)，靠我以往的瞭解+現在佢的行為觀察所得的結果，佢係咪而家無感情，定變左，都無人知。

愛一個人係想佢幸福快樂，可能有人覺得佢而家好快樂，係我話佢唔快樂，所有小妹好迷茫﹗

私人傳訊

alice44