少年成長今日: 0|主題: 16071

收藏本版

回覆發帖

返回列表

跳至頁

查看: 14002 | 回覆: 1

面對勝敗 [複製鏈接]

csir3290

子爵府

積分: 12328

1^#

發表於 25-10-26 11:28 |只看該作者 |倒序瀏覽 |打印

我自己一路都有幫朋友一齊教下啲細路仔打籃球，打波當然少不免比賽啦，我哋成日都會提醒啲細路仔，打比賽當然贏就係最好，但係都要學習點樣面對失敗，唔可以只係為咗贏而不擇手段，最重要嘅就係要盡自己能力，更重要嘅當然係要按時練習，我哋成日都提醒啲細路仔就算輸波，只要盡咗自己能力，平時努力練習就算輸波都係一種學習，不論贏輸都好，都要從經驗中學習，再提升自己，咁先至可以令到自己不停進步。
教得人多當然自己都會打下比賽，早兩日就同自己對波參加比賽，對壘嘅兩隊波都有好多屋企人喺場邊捧場打氣，氣氛好熱鬧。開始打嘅時候都好順利，但係當對隊開始落後佢哋就越打越忟憎，犯規嘅次數亦都越嚟越多，到暫停嘅時候，對隊甚至乎喺度鬧自己嘅隊員，更嚴重嘅因為唔服球證嘅判決而對球證嘅態度都唔係咁好。見到佢哋氣氛越嚟越緊張，企喺牆邊嘅屋企人亦都唔敢出聲，甚至乎見到啲細路望住自己嘅爸爸喺場入面打波，竟然聽到自己嘅爸爸喺度呼喝其他嘅隊員，更甚嘅有啲唔係咁好聽嘅說話出現。我當時心諗乜我哋做家長唔係成要教細路仔點樣面對挫折，成日都講就算輸咗都唔緊要只要盡力就得，但係嗰次嗰場波就活生生咁上演咗，原來平時嘅道理都只不過係攞嚟講嘅，都上場嘅時候先至見到真實嘅人性！嗰日企喺場邊望到自己爸爸喺度打波嘅細路仔，望到自己爸爸比賽時候嘅表現，你估仲會唔會信比賽贏輸唔係最重要呢句說話呢！我哋自己成日都教啲細路仔要享受比賽，不論贏輸都能夠從經驗中學習不斷提升自己，我哋仲成日都講要裝備自己嘅細路仔教佢哋點樣面對失敗，但係原來最面對唔到失敗嘅反而係家長。

喺好多家長心目中，幫細路仔報任何比賽，其實當然最終都係希望佢哋贏，好多口口聲聲話贏輸唔緊要，志在參與嘅家長其實心入面根本就係最在乎輸贏，唔好以為細路仔睇唔出，其實細路仔從家長嘅一言一行入面根本就完全感覺到家長嘅諗法，如果家長自己本身都咁重視贏輸，只看重成功，又點樣裝備我哋自己嘅細路仔有足夠嘅抗逆能力去面對自己嘅失敗呢！要做到享受比賽享受過程，首先就要放開得失，只要真正盡咗自己能力，自然能夠坦然面對成功同失敗，成日聽到人講「搏盡無悔」正正就係呢一種態度！我哋唔係只係要教細路仔點樣可以贏，更加重要就要教佢哋點樣面對輸同接受失敗。