少年成長今日: 1|主題: 16071

收藏本版

回覆發帖

返回列表

跳至頁

查看: 2662 | 回覆: 0

唔想返學 [複製鏈接]

csir3290

子爵府

積分: 12322

1^#

發表於 25-11-30 11:27 |只看該作者 |倒序瀏覽 |打印

最近認識咗個細路仔，佢已經中四，本來係我球隊嘅其中一個細路，平時都有嚟練波，但係最近佢嚟少咗，而其他隊員都有講話佢平時喺學校都間唔中就請假，而且好似越請越多。啱啱上個禮拜佢有嚟練習，但係就坐咗喺場邊，因為佢話隻腳痛所以就坐喺場邊休息，就係因為佢坐咗喺場邊，所以令到我多咗啲時間可以同佢傾下計，幸好我平時同啲球員嘅關係都ok，所以都可以傾到下偈，傾傾下就問佢點解近嚟返少咗學又練少咗習，佢開頭就話腳傷，但係我話其實你都行到返到學，咁點解返少咗學呢？佢好似好奇怪點解我會連佢少咗返學我都知。我就話因為平時練習，我都覺得佢係一個非常之有責任感嘅隊員，所以唔似隨隨便便就會唔返學嘅學生。講下講下可能因為我唔係佢學校啲老師又唔係社工，平時打波又會傾倒下計，所以佢就開口同我講就話因為讀書好大壓力，所以想逃避下。我唔知係藉口定係真，我就同佢講我話，其實如果壓力大就要搵渠道釋放下，多啲嚟球場打下波就係最好嘅方法，所以更加唔好連練習都唔嚟！因為我話打波就係最佳釋放壓力嘅方法，而且練習最開心嘅時間唔係打波嘅時候，最開心反而係打完波成班球員喺度吹下水講下無謂嘢，我話咁樣就係最佳釋放壓力嘅方法。所以多啲嚟練習打波，反而會令自己開心啲壓力都細啲。佢應承我話會多啲嚟練習同大家傾下偈。
細路仔唔肯返學其實有好多原因，好似我呢個球員咁，已經中四，佢用唔返學嘅方法嚟逃避壓力，去到咁大個其實問題都已經好複雜，唔係一兩句說話就可以解決。要解決呢個球員嘅問題，可能要父母社工學校再加埋其他方面一齊合作先至可以慢慢對症下藥。但係話分兩頭，我哋做父母其實仔女細細個就要幫仔女開始建立返學嘅習慣。呢句說話好似好奇怪，因為講真其實個個父母都知道仔女細細個開始就要畀佢哋返學，呢個根本就係已經係習慣，咁點解仲要建立呢！雖然每個家長都知道要畀仔女返學，但係能唔能夠建立到以返學為先嘅習慣，唔好隨隨便便就請假，令仔女知道返學校學習係佢嘅責任，呢個就係父母要幫佢哋建立嘅習慣，我諗好多人都聽過有啲家長為咗平啲去旅行或者就自己嘅放大假嘅時間所以寧願同學校請假就係為咗去旅行，呢啲情況最容易發生嘅就喺啲長假期嘅前後，總之家長為咗種種嘅原因好容易幫仔女請假，或者甚至乎怕麻煩仔女喺屋企扭計唔想返學嘅時間，就只係好簡單咁幫佢打個電話同學校請假就算數，其實呢啲都會喺仔女嘅心入面形成一個印象，就係返學唔係最重要學習唔係最重要。

我都明白有陣時仔女尤其是細個嘅時候會扭計唔想返學，會令到父母覺得非常之難處理。我自己阿仔升小一嘅時候都試過，每日去到學校門口就喊到收唔到聲，唔肯行入去學校，要老師同社工出嚟處理。嗰陣時我都覺得好煩惱，因為我同老婆每日就要處理佢唔肯行入門口呢件事，但係我同老婆都有個共識，就係底線係唔可以唔返學，就算喺門口喊到點都好，每一日都要出門口，每一日都要去學校，我同老婆要處理嘅就係要令佢點樣肯行入學校，但係絕對唔會用可以唔返學嚟換佢肯行入學校。我同老婆都知道佢唔肯入學校嘅原因係因為唔適應，同埋唔想同我哋分開，所以我哋從來冇鬧佢，終於我同老婆就用貼貼紙同蓋印仔獎勵嘅方法慢慢令到佢開始肯行入學校。其實都差唔多搞咗成過幾月，真係日日都喺學校門口喊咁濟，最終都令佢自動自覺笑住行入學校門口。

正如我講細路仔唔返學嘅原因可以好複雜，越大個就越難處理，唔係簡簡單單講兩句說話就可以令到細路仔返學。但係如果家長自細就開始培養細路仔，等佢哋知道返學係佢哋嘅責任，咁其實亦都會減低佢哋將來缺課嘅機會。