少年成長今日: 0|主題: 15990

收藏本版

發帖

返回列表

跳至頁

查看: 24127 | 回覆: 0

防護罩 [複製鏈接]

csir3290

子爵府

積分: 11830

1^#

發表於 23-5-28 11:51 |只看該作者 |倒序瀏覽 |打印

上星期講過親戚個仔因為誤交損友最終因為犯法畀人拉咗。我相信作為家長，仔女誤交損友係其中一件最擔心嘅事。但係擔心還擔心，除咗靠把口成日提醒仔女要小心識朋友之外，其實作為家長仲有啲乜嘢可以做到呢？

正如我成日都講細路仔由出世開始就只不過好似係白紙一張，好多嘢都係由家長幫佢寫上去，包括佢識嘅第一批朋友，同以後點樣交朋結友嘅價值觀等，都係靠家長幫佢發展。但係好多時家長喺細路仔細個嘅時候就已經忽略咗點樣幫自己嘅仔女識朋友，同埋究竟要識啲乜嘢朋友，因為如果喺仔女細個嘅時候呢樣嘢做得好，其實係可以避免到到佢長大嘅時候，因為唔知識咗啲乜嘢朋友或者容易受朋友影響而做錯事。

首先當然仔女嘅第一批朋友好多時都係嚟自學校，咁所以揀學校係其中一個最重要唔可以忽略嘅因素，我唔係話一定要揀啲band one學校或者什麼名校，我哋要知道學校嘅同學將會係佢將來嘅朋友網絡，所以揀校風有陣時真係緊要過揀成績，揀學校之前試吓放學時間去學校附近度睇下，尤其是係啲公園同商場，其實就最容易睇到間學校嘅校風。另外，喺細路仔幼稚園同小學階段，其實都盡量要嘗試識佢身邊嘅朋友，等小朋友習慣會同家長講朋友嘅嘢，另外透過一齊玩亦都可以見到仔女朋友嘅優點同埋缺點，從而提醒佢哋乜嘢應該做乜嘢唔應該做。

除咗學校之外，幫細路仔喺同學以外識其他朋友，其中我覺得最易出事嘅就係畀細路仔自己去啲公園或者商場度玩，有啲家長可能返工唔得閒或者根本管唔到甚至唔管，咁所以就會畀細路仔放咗學之後自己喺附近嘅公園玩，其實咁樣係最容易出事，因為畀細路仔自己喺公園度玩，根本你就掌握唔到佢識咗啲乜嘢人，好似我之前講呢個親戚佢就係話佢個仔都係開頭放學玩一陣，點知越玩越夜返，最後先至出事。所以畀細路仔自己喺公園商場玩係最容易出事嘅。但係家長會話佢都冇時間陪佢一齊去咁可以點做啦？我就覺得應該喺細路仔細個嘅時候同佢哋搵一啲合適課外活動或者功課輔導班咁，趁佢哋細個嘅時候等佢哋適應放學係去參與興趣班或者課餘託管。除咗可以做啲有意義嘅嘢之外，亦都係充實佢哋課餘時間嘅一個好方法。更加重要就係幫佢哋喺嗰啲地方識到朋友，講真能夠放學去託管或者去參加興趣班嘅細路仔都唔會差得去邊。

另外，更加重要我哋要明白點解去到青春期嘅時候啲細路仔咁鍾意群出面啲朋友嘅原因，其中一個就係出面嘅朋友唔會令到佢哋唔開心，通常街外邊嘅朋友都會同佢哋嘻嘻哈哈，更加特別嘅係佢哋會覺得呢啲朋友點解可以唔使返屋企，可以冇人管佢哋。咁樣嘅生活令到青春期嘅細路仔覺得好自由同冇管束。但係會咁諗嘅細路仔好多時都係同屋企嘅關係唔好，所以父母應該珍惜細路仔細個嘅時間同佢哋好好建立關係，令佢哋覺得屋企係一個溫暖嘅地方，屋企人對佢哋嘅關心先至係最重要。呢種關心唔係好似有啲家長話要勉強維繫一個家庭就係為咗唔想佢哋覺得家庭唔健全。正正係雙反，關心係出自愛，所以只要細路仔感覺到愛，感覺到關心，其實就等於幫佢哋加咗一個防護罩。而且如果家長喺細路仔細個嘅時候，已經在意教佢哋正確嘅價值觀同埋規矩，都佢地長大嘅時候，自然就唔需要成日覺得佢哋樣樣都篤眼篤鼻成日話佢哋。

總之細路仔去到青春期嘅時候，家長其實都面對一個問題就係細路仔開始長大，開始有自己嘅朋友，咁究竟要點樣做先至唔會推咗個細路仔出去朋友度呢？呢個就好睇家長同仔女之間互相建立嘅關係同埋相處嘅方式！如果擔心子女誤交損友，與其只係擔心不如趁細路仔細個嘅時候著力幫佢哋加添屏障同埋防護罩，減低佢哋誤交損友嘅機會。到仔女去到青春期嘅時候就更加應該在意點樣同仔女維持一個緊密嘅關係。只有在家中找到認同及愛，佢哋就更難受到出面朋友的影響！

0 0 0

私人傳訊

跳至頁

返回列表

上一主題 • 下一主題

回覆

發帖

頻道

討論區

熱門搜尋：

少年成長 今日: 0|主題: 15990

少年成長今日: 0|主題: 15990