少年成長今日: 1|主題: 16010

收藏本版

回覆發帖

返回列表

跳至頁

查看: 1551 | 回覆: 0

成績 [複製鏈接]

csir3290

子爵府

積分: 11975

1^#

發表於 4 天前 |只看該作者 |倒序瀏覽 |打印

兩姊弟都考完試，近排佢哋返學都係對卷，雖然都知道佢兩個讀書都算得上係認真同勤力，對佢嘅成績亦都有啲嘅掌握，但係作為家長嘅，唔多唔少對佢哋嘅成績都會有啲期望同緊張，尤其是呀女已經中四，開始面對公開試嘅壓力，點都會有啲擔心佢嘅成績跟唔跟得上。所以呢個禮拜同老婆每日放工返到屋企都會問下佢哋派卷嘅成績考成點，佢兩姊弟都會好主動咁講畀我哋聽。但係我成日心入面都有個諗法，就係佢哋講完成績畀我哋聽之後，究竟點樣畀反應佢哋好，又唔想淨係就咁話幾好，好似敷衍佢哋咁。但係又唔想畀到壓力佢哋，唔好等佢哋以為我哋只係重視佢哋嘅成績，所以都唔係好知點樣畀反應，尤其是當佢哋話畀我哋聽成績都係60零70分嘅時候，講真心入面都會諗呢個分數好似麻麻地咁，但係又唔想表達到好似好緊張，唔想畀額外嘅壓力佢哋。尤其是佢哋升咗中學之後，連我自己都要適應佢哋唔再係好似小學咁，成日都九十幾分，中學每個科目嘅計分原來真係好唔同，有時聽到佢哋講話自己得30幾分或者四十幾分，原來佢嗰科滿分可能講緊只係60分或者70分，做家長真係有陣時唔知點樣畀反應好。所以漸漸亦都學懂咗多啲欣賞佢哋考試前嘅努力，多啲讚賞佢哋嘅讀書方法同埋自動自覺。唔想令佢哋覺得我哋只係睇佢哋嘅分數。但係另一方面亦都唔可以懶懶閒好似唔理佢哋考乜嘢分數都冇所謂咁，所以而家佢哋講完成績畀我哋聽之後都會問下究竟你啲科幾多分總分，都會了解下佢有啲乜嘢做得好同做得唔好嘅地方，就算考出嚟嘅成績唔係我自己心目中所想嘅，都一定唔會有任何責怪，都只係會提醒佢下次答題目嘅時候要再小心啲。因為講真佢兩姊弟平時都已經係緊張自己成績，亦都會主動溫習，所以我都成日要提醒自己要多啲欣賞少啲責怪。
但係尤其是家姐，講真小不免會擔心佢dse嘅成績，因為好似今次考試咁佢大部分話畀我聽嘅科目都係六十幾分七十幾分，如果用返以前小學分數嘅標準，自自然就會只係諗佢係屬於中間，極其量只係中上嘅成績，咁對家姐將來考大學會唔會有影響呢！雖然有呢個擔心，但係都唔會喺阿女面前表達覺得佢而家嘅成績未如理想。但係做家長嘅原來真係要懂得放開啲，同埋要自己懂得搵下資料，唔識嘅就問吓人。就住阿女嘅成績其實我都問過下啲朋友，原來佢哋都話以呀女而家間學校嘅程度嚟講，同埋佢而家嘅分數喺文憑試嚟講，原來成績已經算係幾好，之後呀女攞番學校以現在考試成績推算佢文憑試結果嘅成績表返嚟，原來阿女喺分數上有啲科雖然只係得60幾70分，但係相對於文憑試嚟講原來都已經算係幾好成績。有一科原來仲可以有五星嘅推算添。咁當然要讚啦！亦都慶幸自己當日幸好冇用自己嘅理解而以為阿女嘅成績只係一般，而表達對阿女嘅成績有任何不滿同擔心。

呀女而家中四，你話唔擔心佢嘅成績就假嘅！但係作為家長都唔可以畀過份壓力佢哋之餘亦都唔可以完全唔理。做家長嘅藝術就係要學習當中點樣攞到平衡。