少年成長今日: 1|主題: 16013

收藏本版

回覆發帖

返回列表

跳至頁

查看: 2912 | 回覆: 0

唔想傾 [複製鏈接]

csir3290

子爵府

積分: 12004

1^#

發表於 25-7-13 11:31 |只看該作者 |倒序瀏覽 |打印

我成日都講要同青春期嘅仔女多啲傾計多啲溝通，但係好多時家長就會遇到一個問題，就係家長想傾但係仔女唔想傾，家長一想同啲仔女傾計，啲仔女一係就好敷衍唔想講，一係就直情唔想傾，令到啲家長好冇癮。呢個時候家長就會問點解明明我都想同啲仔女溝通，但係啲仔女就硬係唔理我，甚至乎有時直情會覺得啲家長煩添！作為家長就梗係希望當自己有嘢同仔女傾嘅時候，仔女會肯同自己傾啦，當然最好就係仔女肯主動同自己溝通啦。所以當家長想同仔女傾而仔女又唔願傾嘅時候家長當然會好失望。但係家長又有冇諗過其實個問題可能都係出於自己身上呢？
我哋做家長嘅好多時去到仔女青春期嘅時候，所謂嘅溝通或者想同仔女傾都係遇到有問題嘅時候想同仔女講，但係仔女就表現得一副愛理不理嘅態度。我覺得好多時我哋都會犯咗一個錯誤，就係我哋想傾嘅時候就希望啲仔女同我哋傾，但係平時我哋根本就冇乜同仔女傾計，所以作為仔女嘅，根本就未必習慣點樣去同父母傾偈。舉個例我哋同初相識嘅朋友一開始都好難傾到一啲好深入嘅話題或者好內心嘅嘢，但係我哋會懂得同呢啲朋友慢慢建立關係，慢慢開始傾唔同嘅話題，到傾到熟咗然之後先至開始慢慢傾一啲深入嘅嘢。但係返到屋企對住自己嘅仔女，我哋又有各種各樣嘅理由，令到我哋平時好少溝通好少傾計，但係當我哋見到有問題嘅時候，或者有嘢我哋覺得要同仔女傾嘅時候，我哋就會期望仔女即刻懂得點樣同我哋傾，咁會唔會有啲不切實際呢？正如我哋嘅仔女自己都有朋友，佢哋同佢哋嘅朋友點解會咁好傾呢，咪就係因為佢哋同佢啲朋友平時乜嘢都傾，但係我哋做家長有冇試過同我哋嘅仔女乜嘢都傾呢！溝通係需要時間去建立，而唔係我哋認為有嘢傾就要佢哋傾，但係平時就唔用時間同佢哋建立溝通嘅關係。

有啲家長會覺得同仔女溝通好難，但係好多時主要原因我自己就會覺得係根本平時都唔同自己仔女傾閒偈講無謂嘢。次次家長一開口，對啲仔女嚟講就梗係覺得家長係發現問題，針對自己或者係想批判自己，喺仔女嘅立場呢啲唔係溝通，呢啲係批判。咁你叫佢哋應該點樣回應呢啲批判，同埋家長呢啲既定嘅立場呢？所以我覺得做家長都要學習慢慢點樣同啲仔女開始懂得傾閒偈，我成日都講，當個細路仔細個嘅時候，其實好多時家長都只不過係畀啲指示細路仔而唔係傾偈，作為家長其實最唔慣嘅就係點樣同細路仔傾偈，而唔係單向嘅畀指示、問問題或者批判。傾偈聽起上嚟好似好容易，但係其實係一個溝通嘅藝術，點樣傾先至令到大家舒服或者點樣去發掘一啲大家共同嘅話題去傾先至係最重要，如果去到仔女青春期先至開始話想同仔女傾偈嘅家長，先要放棄以目標為本嘅傾計，即係次次傾親都係有目的嘅傾，反而要學習點樣慢慢去先傾一啲無謂嘅話題，等仔女習慣原來同家長係可以乜嘢都傾乜嘢都講，再加上做家長嘅真係需要去搵一啲同仔女嘅共同話題，了解仔女嘅興趣，了解下時事，了解下個社會發生緊啲乜嘢，年青人又鍾意啲乜嘢，咁慢慢打開個話題，仔女亦都開始適應點樣同父母傾計，先至係開始慢慢打開溝通之門嘅方法。

如果只係成日呻仔女唔肯同自己傾計，我哋真係要反省一下我哋嘅所謂傾計，其實係想傾啲乜嘢同埋目的係乜，如果日常生活真係能夠做到只係為傾而傾，而冇乜特別目的大家傾下閒計，咁先至慢慢可以做得到，當家長有需要嘅時候或者想同仔女傾嘅時候仔女先至會慢慢開放咁同家長去傾。所有嘢都唔可以一步登天，如果我哋仲係期望當我哋有嘢要同仔女傾嘅時候，仔女就會自動自覺敞開心扉咁同我哋去傾，咁只不過係不切實際嘅諗法。父母喺仔女十幾年嚟都唔特登學習點樣去同仔女傾計，而期望仔女去到十幾歲嘅時候能夠自動自覺懂得點樣同父母溝通，咁會唔會亦都係不切實際呢！與其去伸話仔女唔同我哋傾計溝通嘅時候，做家長嘅不如嘗試放開啲，用多啲時間慢慢去同仔女傾下閒偈，令仔女知道其實同父母唔一定係要傾啲好重要嘅嘢，其實都可以好放鬆心情咁去溝通，咁慢慢先可以改善到大家嘅溝通關係。淨係懂得呻而乜都唔做，最終都只不過係原地踏步，關係唔再惡化落去都已經係好好彩！