少年成長今日: 0|主題: 16023

收藏本版

回覆發帖

返回列表

跳至頁

查看: 5117 | 回覆: 2

揾機會相處 [複製鏈接]

csir3290

子爵府

積分: 12079

1^#

發表於 25-8-10 14:37 |只看該作者 |倒序瀏覽 |打印

放緊暑假我同老婆都要返工，得番一對仔女自己喺屋企，成日都會諗下佢哋會唔會好悶冇嘢做！所以每到暑假我同老婆都會盡量嘗試睇下可唔可以攞到假然之後陪下對仔女，除咗有機會可能會同佢哋去下旅行之外，平時佢哋番學，我哋又番工冇乜時間，所以就襯呢啲假期都會同佢哋四圍去吓，等佢哋見多啲唔同嘅嘢，亦都唔需要因為日日都喺屋企而覺得悶。其實同仔女嘅感情就係需要咁樣慢慢培養，家長都要花啲時間搵藉口同佢哋去吓街或者陪下佢哋一齊，咁大家自自然然就會多啲嘢講。做父母嘅有陣時就真係需要花啲心思諗啲嘢大家一齊做，最好成為習慣。好似到而家都會每個禮拜六晚，都會同對仔女坐喺個廳度搵套戲大家一齊睇，雖然啲戲對仔女未必一定好有興趣同我哋一齊睇，但係因為我哋睇戲嘅時候就會一齊食薯片飲汽水，連阿女自己都話重點唔係睇戲係食嘢，但係喺食嘢睇戲期間，大家又會多咗嘢傾。又或者好似上個禮拜電視有兩場足球比賽直播，雖然阿女同老婆對足球都唔係好有興趣，但係見到我同個仔一齊喺度睇，咁大家又一齊緊張一齊睇，阿女仲挨住我個膊頭睇咗成場波添。有陣時家長會覺得唔知點同仔女相處，但係相反我就會覺得家長有陣時真係需要製造一啲機會同仔女相處。唔好同仔女一坐埋就係傾讀書或者只係問問題，其實講下廢話都好緊要。做爸爸就更加應該要放下自己嘅身段，講真冇話做爸爸嘅就乜嘢都要識，同啲仔女多啲傾唔同嘅嘢，唔識咪一齊搵下資料一齊搵答案，咁就會增加大家嘅溝通機會。其實同仔女相處嘅機會成日都會出現，只不過好多時家長自己又冇捉緊呢啲機會去同仔女相處。最唔好就係連出街食飯，一家人都係各自揸住部手機，我明白手機好多嘢睇，但係我哋都有一個習慣就係一食嘢嘅時候就大家全部都放低部手機傾下偈。其實仔女都係有樣學樣，如果父母都係一路食飯一路揸住部手機冇乜嘢講嘅話，又或者一講就只不過喺度問問題，又或者講啲仔女唔鍾意聽嘅嘢，咁我做仔女我都寧願一路食一路拎住部手機，起碼唔使同你溝通先，亦都唔需要答咁多問題。但係父母就係咁得意，自己揸住部手機就得，但係當自己有嘢要問仔女或者想同仔女傾嘅時候，如果仔女揸住部手機就會唔鍾意。咁但係調返轉父母又肯唔肯先放低自己部手機，慢慢習慣同仔女傾多啲閒計呢！總之我覺得千祈唔好成日都覺得同仔女好難相處或者搵唔到相處嘅時間，問題嘅重點係父母自己嘢有冇搵機會或者刻意製造嗰啲機會去同仔女相處呢！開頭仔女未必習慣或者好願意，但係時間耐咗，發覺父母都肯陪自己多啲嘅話，慢慢其實仔女都會開始願意多啲同父母一齊出街多啲陪伴嘅時間。講真細路仔細個嘅時候其實都好期待父母同自己出街或者期待多啲父母陪自己，反而有陣時係家長自己唔察覺呢啲機會或者冇利用到呢啲機會。慢慢久而久之，先至覺得同仔女嘅關係疏遠咗。總之唔好放過每一個同仔女相處嘅機會，記住問問題並唔係溝通，咁先至能夠增進同仔女之間嘅感情同埋關係。