少年成長今日: 0|主題: 16023

收藏本版

回覆發帖

返回列表

跳至頁

查看: 451 | 回覆: 0

情緒 [複製鏈接]

csir3290

子爵府

積分: 12077

1^#

發表於昨天 11:57 |只看該作者 |倒序瀏覽 |打印

上兩個禮拜其中一條網上面最多人睇嘅片段就係有關個爸爸喺壽司郎門外大炒大鬧，因為等咗好耐位所以搵個門口負責派飛嘅男仔嚟發洩，不斷鬧人。佢完全無視身邊嘅人，就算畀人拍左片都唔理，總之就覺得自己啱曬，連人哋拍咗片上網跟住都要喺網上鬧返放片嘅人。最後搞到變成網上新聞紅人，好多網上新聞媒體都播呢個片段。另外一段片亦都好多人講就係有個男人喺停車場出閘位置，突然間落車鬧後面架車嘅司機，又係爆曬粗口畀人拍片都唔理。
兩段片其實都有好多共通點，第一就係呢兩個男人都覺得自己啱曬，啱曬就可以咄咄逼人，當街當巷大聲講粗口鬧人完全冇禮貌，總之就係覺得自己啱，最緊要就係維護自己嘅權利。但係令一個共通點我就覺得更加重要，就係呢兩段片都見到其實片段中嘅男人都係一家大細喺身邊，壽司郎嗰段片個男人嘅老婆仲喺身邊幫手鬧埋一份，而且係片段入面都見到其實佢哋係同埋自己嘅細路仔一齊。另外一段男司機落車鬧人段片，亦都係一家大細喺架車入面，我仲見到段片入面個細路仔喺車窗度望出嚟。我成日都想知究竟呢啲人喺條街度咁樣放聲鬧人嘅時候，有冇考慮過自己仔女嘅感受呢！有冇諗過其實佢哋嘅細路仔點諗，係咪佢哋嘅細路仔都覺得只要啱嘅就可以唔理儀態同修養，唔理身邊人嘅睇法，放聲喺條街鬧人都可以呢？

我上次先講細路仔越大就越唔鍾意同家長出街，如果片段中呢兩個細路仔慢慢長大之後，見到同家長出街有機會發生呢啲事，佢仲會唔會想同家長出街呢？我上次都講青春期嘅細路仔最怕就係冇面同尷尬，同父母出街隨時有機會搞到自己冇面同尷尬，咁仲會唔會想同父母出街呢！又或者調返轉，細路仔成日耳濡目染，見到父母可以有咁樣嘅態度嘅時候，將來呢啲小朋友又會唔會學埋父母咁樣呢！

做咗父母真係要更加好好學識控制自己嘅情緒，我當你啱曬咁又點呢！身邊嘅人當你小丑而且仲影響咗仔女嘅發展，我當你鬧完人個個都怕咗你，但係到最後損失嘅又係邊個呢？其實呢兩個片段入面嘅男人可以有好多嘅方法去選擇處理事情，你唔滿意等得耐，你可以唔食。你覺得態度唔好你可以向佢高層反映同投訴。另外一個片段入面你覺得人哋駕駛態度唔好，你亦都可以選擇利用拍攝嘅片段去投訴，但係偏偏就因為情緒控制得唔好而選擇咗我認為係最差嘅做法，畀你發洩咗情緒，但係講真我覺得其實仲傷！做咗父母除咗為咗自己之外，都要為仔女著想，所以更加要好好控制自己情緒，父母點樣控制情緒就係仔女嘅榜樣，仔女成日發脾氣其實好多時都係父母造成。總之做咗家長就更加要謹慎控制自己情緒同脾氣，如果成日都係啲公共場所畀啲仔女見到自己控制唔到情緒，除咗影響發展之外，亦都只會令佢哋越嚟越怕同父母出街！