少年成長今日: 0|主題: 16035

收藏本版

回覆發帖

返回列表

跳至頁

查看: 472 | 回覆: 0

開學鎖碎事 [複製鏈接]

csir3290

子爵府

積分: 12145

1^#

發表於昨天 11:34 |只看該作者 |倒序瀏覽 |打印

學期啱啱開始，對我對仔女嚟講好多嘢暫時都仲好新鮮，由於我對仔女都已經開始高班，喺新學年佢哋都多咗啲喺學校嘅新職位要負責，所以每日佢哋返到嚟都有好多新嘅經驗同埋好多新嘅睇法想同我哋分享。每日我同老婆放工返到屋企，佢兩姊弟通常都各自喺自己間房度做功課，唔係好見到佢哋，但係一到食飯，佢兩個就會雞啄唔斷咁講好多學校嘅嘢，講真佢兩個講嘅嘢都真係好多，但係其實又唔係啲好重要嘅嘢，總之佢兩個就好想將佢學校發生嘅嘢講畀我哋聽。做家長喺呢個時候千祈唔好掃佢哋慶，既然佢哋都咁願意將自己嘅嘢分享畀我哋知道，我哋當然就要留心聽仲要適時畀反應，如果唔係講吓講吓，佢哋覺得同我哋講嘢冇癮就會慢慢開始唔想講。家長好多時就係認為佢哋講嘅嘢無聊，所以只係敷衍佢哋，正如好多人都講過呢個年紀嘅細路仔好多時都想搵人認同佢哋嘅諗法，咁做家長喺呢個時候不妨都認同下佢哋，唔好加咁多批判或者甚至乎只係敷衍佢哋，其實好簡單只係需要認同下佢哋嘅睇法，自自然然佢就地就更加願意講嘢畀我哋聽。除咗敷衍佢哋會令到佢哋覺得同我哋講嘢無癮之外，令佢哋最唔想同我哋講嘢嘅原因就係佢哋一路講我哋就一路揸住部手機。如果家長都唔重視仔女同我哋溝通嘅時間，咁我哋又點可以話仔女越嚟越唔同我哋講嘢呢！家長唔需要問咁多問題，只需要聽同埋喺合適嘅時間畀一啲認同，加上一啲嘅追問，就係鼓勵緊佢哋繼續同我哋溝通方法。喺學期初對於細路仔嚟講，除咗讀書成績溫習之外，其實仲有好多事發生，如果家長能夠利用呢個機會鼓勵佢哋多啲分享佢哋學校嘅情況，其實亦都係為將來大家嘅溝通打好咗個基礎。所以千祈唔好覺得仔女講嘢煩同埋幼稚，到將來佢哋已經唔需要再同我哋溝通嘅時候，我哋先至後悔就已經太遲。
題外話，之前曾經講過話同仔女出街千祈唔好做一啲嘢令到佢哋覺得冇面同埋尷尬。早兩日全家出去食飯就真係目擊一件事，有個阿媽同埋個女喺商場嘅詢問處度大吵大鬧，個阿媽因為商場購物儲分但係又儲唔到嘅問題，喺度不停咁同商場詢問處嘅職員爭論，但係因為個位置就正正就係商場做免費泊車嘅地方，我哋就見到嗰嗰個同商場職員爭論緊嘅阿媽，佢個女喺旁邊望住後面條人龍係咁望住佢阿媽個情況好尷尬，佢就不停叫阿媽冷靜啲唔好咁大聲，因為佢阿媽真係越鬧越大聲，佢個女講咗兩句之後就冇咁好氣企咗喺側邊垂低頭，而個阿媽可能情緒高漲，所以根本就冇留心到身邊嘅人個個都已經望住佢，但係佢個女個刻就淨係望住個地下，佢個女望落去都已經十幾歲，嗰刻鐘尷尬嘅情況可想而知。個媽同職員嘅爭論最終都係冇結果跟住只有離開，但係我代入佢個女嘅心情當刻真係想搵個窿捐入去逃避所有人嘅眼神。是想像下代入去佢個女嘅諗法，我諗佢以後真係唔會再想同佢阿媽出街，因為唔知幾時只係為咗買嘢儲分咁簡單嘅事，都可以搞到咁尷尬！所以做家長同仔女出街除咗要顧住自己嘅修養之外，更加要顧及仔女嘅感受！如果唔係千祈唔好問仔女點解唔想再同自己出街呢個問題！