少年成長今日: 0|主題: 16055

收藏本版

回覆發帖

返回列表

跳至頁

查看: 2791 | 回覆: 0

手機做餸 [複製鏈接]

csir3290

子爵府

積分: 12279

1^#

發表於 25-11-9 12:03 |只看該作者 |倒序瀏覽 |打印

前幾日公眾假期家傭姐姐放假，所以兩餐都要出去食。就咁啱出去食嘅兩餐飯隔離枱都坐住啲小朋友，而佢哋嘅父母都係用秘密武器，出絕招令佢哋安安靜靜咁食完餐飯。

兩餐飯所見到嘅父母都係將部手機放咗喺枱面，不停播住佢哋鍾意睇嘅卡通，吸引到啲小朋友嘅目光完全唔離開部手機，非常安靜。唯一發出嘅聲音就係部手機發出嘅聲音，所以我先知道佢哋睇緊卡通片，整個食飯嘅過程，爸爸唔使出聲，媽媽唔使出聲，小朋友就更加完全安靜咁睇住部手機。兩餐飯嘅媽媽，都分別只係見到個細路口入面嘅食物食完之後，就將另外一啖嘅食物送到去嘴邊，跟住啲小朋友食咗呢一啖食物之後就慢慢一路睇手機一路咀嚼，吞咗又另外一啖送到口邊，週而復始，除咗兩個小朋友因為都想睇各自喜愛嘅節目而發出聲音之外，成餐飯可以話係非常安靜，而我覺得最開心嘅就係爸爸，因為媽媽都需要忙住餵佢啲小朋友，但係爸爸就真係落得安靜可以自己喺度睇手機，成餐飯除咗靜之外可以話係毫無交流。其實兩餐飯見到嘅細路仔都起碼三四歲，可以懂得自己食飯，但係有咁好嘅招呼，眼望住手機食物就送到嘴邊，咁又點需要自己食呢！

手機對細路仔嚟講可以話係最吸引嘅武器，可以吸引到啲細路仔靜靜地坐喺度，目不轉睛，淨係望住部手機，完全忘我進入另外一個世界一樣，對大人嚟講只要手機一出就可以令到細路仔安安靜靜慳返好多功夫！世界上冇另外一樣嘢可以對細路仔起到更大嘅作用！但係試問咁快就出呢一樣武器，仲有啲乜嘢可以畀手機更吸引呢！三四歲，四五歲嘅細路仔就已經經常睇住部手機，佢一路長大仲有啲乜嘢畀手機更吸引呢！父母仲有啲乜嘢其他嘅手法更能吸引細路仔嘅注意呢！

食飯可以話係一家人溝通嘅機會，但係只要各人拎住自己部手機，手機一出，各自就沉醉於自己嘅世界之中，一路食一路睇，大家同手機嘅關係只會越嚟越緊密，但同家人之間嘅關係自自然然就比不上一部手機。細路仔一路長大，同手機嘅關係越嚟越緊密嘅時候，家長先發覺細路仔同手機嘅關係竟然緊密個同自己，想分開佢哋嘅時候，都唔知仲可以用啲乜嘢可以將細路仔嘅注意力集中返喺自己嘅身上。

我自己對仔女而家都已經高中，都有自己嘅手機，出街喺餐廳食飯，食之前雖然都會各自碌下手機，但係到食嘢嘅時候全部都會放低自己部手機，一路食一路傾下計，直至到食完離開餐廳都唔會再碌手機。

講開又講，其實餐桌禮儀都係家教嘅一種，細路仔埋枱食飯會唔會叫人，會唔會專心食飯，有冇禮貌等等，其實都係父母教嘅！至於點樣教，父母每日親身嘅示範就係最好嘅教材，如果我哋將呢個重任交畀手機，又會教出一個點樣嘅細路仔呢！