少年成長今日: 0|主題: 16076

收藏本版

回覆發帖

返回列表

跳至頁

查看: 681 | 回覆: 0

禁用社交平台 [複製鏈接]

csir3290

子爵府

積分: 12354

1^#

發表於前天 11:33 |只看該作者 |倒序瀏覽 |打印

最近睇新聞見到澳洲啱啱開始實施新法例，就係禁止16歲以下嘅青少年人用社交媒體，澳洲成為全球入面第一個實施相類似法例嘅國家，咁當然引起好多青少年嘅不滿，亦都好多人嘅關注。澳洲政府認為社交平台鼓勵青少年長時間「黏住」螢幕，並更易接觸有害資訊，實施呢條法例嘅目的就希望防止青少年人過度沉迷社交媒體可以令到佢哋放低部手機。
我自己就覺得有啲奇怪，明明教細路仔用手機嘅責任就應該係家長嘅責任，點解要由政府動用到法例去禁止青少年使用社交平台呢？係咪即係家長嘅教育已經失效，要勞動到政府出手！但係做過青少年人嘅都知道，喺青春期反叛期階段，你越禁佢哋就越想做，咁樣禁法，大嘅社交平台青少年可能唔再用得，但係反而會令佢哋走向用一啲更加隱蔽更唔容易畀你管到嘅平台。呢啲禁制嘅措施係咪真係有效，就真係要拭目以待。但係明明係家長嘅責任，而家就變成咗係政府、社交平台公司、同埋其他人嘅責任。有啲家長自然覺得呢啲法例好有用，因為好多家長成日都投訴仔女唔肯放低部手機，而家唔使自己做醜人，由政府出手，冇咗社交平台可以用，自然呢啲家長就會覺得細路仔就會放低部手機。但係講真除咗社交平台之外，細路仔用手機尤其是嗰啲手機成癮嘅細路仔，除咗社交平台之外仲有玩手遊，咁係咪又係好似內地咁，連玩手遊都要限制呢！總之家長管唔掂細路仔就由政府出手，咁家長就可以唔使承擔佢哋嘅責任呢！

我自己就覺得其實根本好多時細路仔開始用手機就係電家長畀佢用，明明細路仔細細個，根本未開始需要用手機，家長就已經畀部手機佢哋用，為咗令佢安靜聽話，就用部手機嚟吸引佢哋！作為家長手機，係你畀佢哋用，但係你又唔教佢哋點用，然之後當個細路仔過度使用部手機嘅時候，你又怪過細路仔點解會手機成癮講極都唔聽，跟住就將個責任交咗畀政府，最好就由政府出手乜嘢都禁曬佢哋，咁係咪公平呢！其實由你第一次開始畀部手機啲細路仔用嘅時候，你就開始要諗點樣教佢哋用部手機，你又唔教，然之後連家長自己都成日揸住部手機唔肯放低，咁就怪個細路仔手機成癮，咁又點講得通呢！

我又明白係社交平台上面都充斥住一啲所謂不良資訊，可能對細路仔造成影響！但係你一刀切禁咗，咁其實呢啲禁令都係一把雙面刃，佢可能接觸唔到一啲不良資訊，但係亦都禁止咗佢哋接觸一啲正面嘅資訊！其實乜嘢都留畀學校教或者由政府佢禁止，咁家長嘅責任仲係啲乜嘢呢？

我可能比較守舊，自己對仔女其實都要去到成初小先至開始慢慢接觸手機，而且一路都只不過當手機係一個工具，好似攞嚟影相睇相，搵資料之類。直至到佢哋六年班先至開始真正有第一步自己嘅手機。開始畀佢哋用手機，之後亦都冇任何管制，因為係開始畀佢哋用之前，其實我同老婆都覺得已經對佢哋有足夠嘅教育，包括培養佢哋足夠嘅興趣，唔好等佢哋除咗手機之外就冇其他興趣，你都要畀佢哋知道點樣有分寸咁佢使用部手機。呢啲唔單止係講，作為家長你都要用身教示範做畀佢哋睇！

總之我就覺得教仔女恰當咁用部手機，其實係家長嘅責任，如果家長冇盡應該要盡嘅責任，而只係諗住將呢啲責任外判畀學校同政府，咁雖然好似人哋同你做咗你應該盡嘅責任，咁但係家長同仔女之間嘅關係又可以用啲乜嘢去維繫呢！