少年成長今日: 4|主題: 16097

收藏本版

回覆發帖

返回列表

跳至頁

查看: 11975 | 回覆: 0

為他人設想 [複製鏈接]

csir3290

子爵府

積分: 12479

1^#

發表於 26-1-4 11:46 |只看該作者 |倒序瀏覽 |打印

等咗好耐嘅尋秦記終於喺除夕有得睇，當年都有追住睇呢套電視劇，當然第一時間同老婆講話要去睇，好似為咗一個完結咁樣。當年煲劇當然差唔多日日都追，我老婆反而冇乜睇過，而我對仔女根本就只係當一部普通電影去睇，唔知道套劇係乜嘢。因此為咗唔好令佢哋入場嘅時候咩都唔知，對啲角色人物完全冇印象，又咁啱係假期，所以都係youtube度搵咗啲片段同埋資料等我哋睇之前，尤其是係對仔女大約對啲角色人物同埋故事都有啲啲印象，唔好入到去戲院睇戲嘅時候好似咩都唔知咁！
一家人開開心心入場，可能當年追過套劇嘅人而家都已經變成人哋嘅家長，所以戲院入面見到好多家長帶埋自己嘅小朋友一齊入場。但係好多細路仔都唔知都套劇人物嘅關係，所以入到去就好多嘢問！真係正正咁啱坐我哋前面就有一對家長帶住一對十歲八歲嘅小朋友入場，套戲開始無耐，個細路仔就成日問個家長呢個係邊個嗰個係邊個，點解會咁樣等等嘅問題，最慘係家長又唔識做，唔教佢叫佢唔好喺戲院度咁大聲講嘢，最弊個家長仲好似解釋劇情咁喺度同個細路仔講，真係非常騷擾，終於都有人忍唔住，好大聲咁喺戲院度叫佢哋收聲，要講返屋企先講！幸好嗰對家長可能都知衰，冇駁嘴！所以淨低大約三分一套戲大家都可以安安靜靜咁睇埋落去。

去戲院睇戲要安靜，去博物館參觀又要安靜，去玩要排隊要有耐性等等呢啲去唔同場合嘅禮儀，其實都真係需要家長去教，最弊好多家長就成日覺得自己個細路仔只不過係一個細路仔，所以無論點都好其他人就應該要接受！如果家長唔教，其實細路仔永遠都唔會學識佢呢啲唔同場所嘅禮儀同規矩，啲細路仔仲以為咁樣大聲講嘢或者唔守規矩係合理添！學校其實都有教呢一啲禮儀規矩，其實主題嘅思想都係要教細路仔為他人設想，但係學校只不過係教同提醒，而真正做畀啲細路仔睇教佢哋為他人設想嘅就係佢哋嘅家長！如果連家長都唔懂得做，學校教幾多嘢又有啲乜嘢用呢？因為學校只不過係講畀佢哋聽，但佢哋每日接觸嘅喺家長身上學到嘅原來又係另外一套！只要去各大商場，戲院，博物館或者係公園，都不難會見到有啲家長將自己嘅細路仔野放，任由佢哋鍾意點就點，當影響到人嘅時候就只會怪責其他人點解唔會就佢哋嘅細路仔，因為細路仔乜嘢都唔識，所以做大人嘅自然就要就下佢哋！但係呢類家長係絕對唔會反省吓佢哋嘅細路仔乜嘢都唔識嘅原因，其實就係佢哋作為家長乜嘢都唔教！以為佢哋慢慢長大就會知道，而且其他人你都必須要就佢哋嘅細路仔！要細路仔成為一個有教養嘅人，就需要家長自細開始除咗養之外，仲要教，仲要親身身體力行感用身體示範畀佢哋睇乜嘢叫做教養！事實作為成年人嘅我哋真係未必會怪啲細路仔冇教養，因為最終要怪嘅我哋都只會係怪佢哋嘅家長！