少年成長今日: 0|主題: 16097

收藏本版

回覆發帖

返回列表

跳至頁

查看: 10942 | 回覆: 1

欣賞 [複製鏈接]

csir3290

子爵府

積分: 12481

1^#

發表於 26-1-11 11:21 |只看該作者 |倒序瀏覽 |打印

假期少不免又係出街食飯，今次一坐低就比隔離枱嘅一對母子吸引，點解佢會吸引到我注意，就係因為媽咪做嘅嘢好特別，係呢一個時代嚟講係真係比較少見。隔離枱對母子，個仔大約四至五歲，個媽媽我諗大約30幾40歲，一坐低見到佢哋特別嘅地方係本來呢對母子係對住坐，但係當叫完食物之後，忽然間個媽媽就走咗個去個仔嗰邊同個仔一齊坐，然之後就攞咗本英文故事書出嚟，同個仔一齊喺度睇故事書，個媽媽一路同個仔睇住本故事書講故仔，個仔又一路聽得好開心，有陣時仲同個媽媽一齊喺度讀英文添，睇得開心嘅時候個仔都會大聲咗，但係個媽媽都會提醒個仔唔好咁大聲唔好影響到其他人。就係咁，兩個人一路喺度睇故仔書一路等嘢食，到啲食物嚟咗嘅時候，個媽媽就坐返去自己個位置，然之後就同個仔講叫個仔要食得乾淨啲要自己食，食食下我忽然間聽到個媽媽同個仔講話好欣賞佢今日食飯食得咁乾淨同食得咁快。咁事實佢個仔又真係坐喺度自己食飯，期問當然同媽媽有傾偈。個媽媽食完飯之後，個仔仲未食完，個媽媽仲可以換取咗一段短嘅時間自己睇下手機，直到個仔食完飯跟住就埋單離開咗！
我最欣賞嘅係成餐飯入面，個媽媽根本就唔需要攞部手機出嚟氹個仔食飯，亦唔需要逐啖逐啖咁餵個仔，我更欣賞嘅係個媽媽會懂得「欣賞」呢個詞語嚟讚個仔食飯食得咁有規矩，會用正面嘅方法去讚賞個仔加強佢做正面行為嘅效果。雖然睇起上嚟好似好小事，但係又真係有幾多個家長真正做得到呢！我相信呢位媽媽都應該用咗一段時間去訓練個仔食飯嘅規矩，事實證明唔需要用手機都可以令到細路仔乖乖哋安安靜靜咁食餐飯，只不過係家長願唔願意付出呢啲時間。好似呢位媽媽咁，就係食飯前同個仔一齊睇故事書，冇錯其實都係用啲方法令到個仔安靜守規矩，父母可能冇咗嗰段時間去睇自己部手機，但換來嘅係唔需要靠部手機，亦都增加咗大家親子關係嘅時間！點樣選擇呢啲就係父母自己嘅取捨！雖然好似只不過係食餐飯嘅規矩，睇上嚟好似好小事，但係凡事都係從小處開始慢慢累積就變成習慣，究竟係用本故事書定用部手機或者用其他方法對細路仔嘅成長比較有好處，全部都係家長自己嘅選擇！