少年成長今日: 0|主題: 16097

收藏本版

回覆發帖

返回列表

跳至頁

查看: 6858 | 回覆: 0

散吓步，鬆一鬆 [複製鏈接]

csir3290

子爵府

積分: 12467

1^#

發表於 26-1-18 10:24 |只看該作者 |倒序瀏覽 |打印

剛剛過去嘅星期六，一家人食完晏之後，專登一家大細走咗去新開嘅東岸板道東段行咗一次。記得東岸版度舊年開第一段嘅時候都已經專登去行過，覺得嗰度環境同風景好靚，好適合一家大細去散步。當睇到新聞話啱啱開埋東段，所以就一家大細再去行東段。專登㨂係太古城開始，因為嗰度有大型商場可以食埋飯之後仲可以攞個藉口當係散步消化吓，而且如果只係行新開嗰段，因為得一公里多啲，覺得距離比較短，但係由太古城開始行，一路沿住海邊行到過去新開嗰段東段，以北角為終點，然之後再行返轉頭其實大約都係一個鐘頭鬆啲嘅時間，行得唔太辛苦，可以一家人慢慢行當散步而且風景又靚，雖然人多啲，但係其實都行得舒服。
我自己就一路都好enjoy一家人去唔同地方散吓步，唔好成日都行商場，而且因為係散步，所以一路行大家都唔會揸住手機，就算係用都係最多攞部手機嚟自拍吓，又可以好自然咁樣搵到話題傾下偈。就好似嗰日喺東岸板道散步咁，基本上都唔使特別搵話題，大家行吓行吓就自自然然多嘢傾。不過行到去嗰段什麼玻璃走廊，排曬隊，條龍好長就唔好浪費時間專登走埋去排啦，因為你知啲後生仔最憎就係咁樣排，連我對仔女都話就係為咗行幾塊玻璃要排咁耐。而果幾塊玻璃下面只不過係啲海水，但係為咗行嗰四塊玻璃又要排隊攞鞋套跟住又要還鞋套，所以都唔知為乜！淨係講下點解咁都要排同埋咁多人排，都成為我哋嘅其中一個話題。

有啲家長話都唔知點樣搵話題同仔女傾計，又或者覺得同啲仔女傾無謂嘢好難，其實好多時只不過係睇環境同時間，你越係刻意搵話題或者搵時機其實就越難，反而食完飯散吓步呢啲時間，大家又唔會揸住部手機，望到乜嘢就傾乜嘢，隨心咁去講反而啲話題就會走出嚟。所以當仔女一路長大，趁佢哋都仲肯跟我哋出去食飯嘅時候，搵下機會多啲同佢哋散吓步傾吓偈，既可增進大家嘅了解多啲溝通，又可以增進大家嘅感情，何樂而不為呢！趁呢條東岸板道啱啱開冇耐，搵機會約下仔女一齊去散吓步絕對值得！不過都係要提醒，傾計就係傾計，唔好有咁多批判，傾閒偈就係傾啲無關痛癢嘅嘢，所以無必要加咁多批判落去。趁假期用一兩個鐘頭時間，大家一齊去散吓步，效果絕對比你想像中嘅大！