少年成長今日: 1|主題: 16021

收藏本版

發帖

返回列表

跳至頁

查看: 28325 | 回覆: 0

積極的「眼不見為乾淨」 [複製鏈接]

csir3290

子爵府

積分: 12066

1^#

發表於 23-9-3 11:23 |只看該作者 |倒序瀏覽 |打印

上個禮拜講開「眼不見為乾淨」，我覺得呢個係同青春期嘅細路仔相處一個好重要嘅技巧，因為而家呢一代其實好多諗法同做法已經同我哋呢一輩好唔同，如果我哋事事都仲係用緊我哋呢一輩嘅諗法去希望新一代跟我哋呢套方法去做嘅時候，好多時就會產生矛盾同埋爭執，所以越少干涉佢哋自己嘅做法就越能夠減少爭執。但係有啲家長可能會覺得乜嘢都當睇唔到好似好消極，同埋會好擔心佢哋會做唔到。但係其實呢個係建基於信任，信任又建基於一路以嚟嘅觀察。所以要做到「眼不見為乾淨」其實當中牽涉好多技巧，尤其係自細對細路仔嘅訓練，所以成日都講自細能夠幫細路仔訓練到一套良好嘅生活習慣，慢慢就可以建立信任，當有咗信任嘅時候，自自然然就可以放手做到「眼不見為乾淨」。但當做訓練嘅時候，其實好多家長都會忘記咗，我哋唔係要挑剔佢哋嘅錯，反而我哋要喺雞蛋裏挑骨頭，嗰啲骨頭係好嘅骨頭，係搵佢做得好嘅嘢，慢慢建立佢哋嘅自信，等佢哋知道家長嘅要求。如果雞蛋裏挑骨頭係挑壞嘅骨頭，只會令到細路仔覺得自己樣樣都做唔到咁，到頭來其實只會越嚟越缺乏自信，與其做咗都係畀人話，咁不如唔做或者點樣做家長都係唔滿意咁不如都係唔做，咁到咗青春期嘅時候就更加容易同家長發生爭執，所以要做到「眼不見為乾淨」其實唔係乜都唔理，只不過係如果細路仔細個嘅時候訓練得好，到進入青春期嘅時候一個令大家更加舒服嘅相處方法。

我自己就發覺其實自細同阿仔阿女嘅相處入面，我同老婆都要返工其實就有呢個好處，因為好多時我哋都係返咗工，所以好多嘢都係前一晚同阿仔阿女講咗等佢哋自己做，我哋返咗工嘅時間就自自然然睇唔到佢哋點樣做法，都唔好成日攞住電話監視阻住佢哋，反而都放咗工返嚟就會睇到佢哋有冇做到同埋做得好唔好，當然佢哋有做到嘅時候自自然然就要大讚佢哋，慢慢佢哋就會覺得原來爸爸媽媽係欣賞佢哋自己可以完成自己嘅工作，慢慢自信心亦都會提高。更重要嘅係因為我哋都番咗工，所以我哋唔會成日哦住佢哋幾時做同點樣做，總之我哋放工返嚟之前佢哋就完成。可以避免咗喺中間過程中出現嘅爭拗，我哋返到嚟只係見到成果咁所以要讚起上嚟都容易好多。其實我哋自己想深一層，好多時同仔女嘅爭拗其實都係因為爭拗大家嘅做事方式，好多時父母都會擔心仔女做唔曬啲嘢或者佢哋嘅方法會用得唔好，反而好多時就係呢啲地方出現爭拗。但其實件事最後都係能夠做完，但係就因為中間過程好多時父母都會有意無意好似揸住放大鏡咁逐項去檢視佢哋嘅做法，有冇按照父母嘅旨意去做而產生爭拗。但件事明明最終都完成，但係就係因為呢啲過程中嘅爭拗而令到好事變咗壞事，就算完成咗大家都唔開心。有啲父母可能仲係擔心如果「眼不見為乾淨」，中間出咗問題點算，正如我之前講過仔女去到青春期其實好多嘢都已經定咗型，父母喺仔女細個嘅時候嘅訓練已經要見到成果，如果去到呢個時間其實父母喺仔女細個嘅時候都冇訓練過，咁當然可能喺中間會有問題發生，但係我總相信就算做唔到都好都總係有啲嘢係可以學到。如果細個冇訓練開，到呢個時間仲事事干涉嘅話，就更加容易發生爭拗破壞大家感情。與其係咁，不如慢慢畀多啲信任啲細路仔等佢哋自己去做，可能未必會做得咁好又或者總係未必合父母嘅意，但係既然父母喺仔女細個嘅時候都冇刻意訓練，去到呢個時間與其樣樣都篤眼篤鼻，不如放開啲嘗試正面啲，就算唔係做到一百分都從中搵一啲進步嘅地方，慢慢學習欣賞。咁樣反而可以改善同仔女間嘅相處關係。

所以要做到「眼不見為乾淨」絕對唔係消極嘅做法，反而係一個積極相處嘅技巧係需要家長付出努力，慢慢去訓練，而能夠做到就更加顯示對仔女嘅信任，細路仔自然會更加多信心，而慢慢就會越做越好。正正之前就睇過一個關於青少年最唔滿意父母行為嘅調查，其中排喺青少年最唔鍾意父母做嘅行為入面嘅頭兩位行為，第一位就係父母唔尊重仔女，第二位就係父母唔信任自己事事都干涉。所以如果父母能夠有技巧地做到「眼不見為乾淨」，正正就能夠避免咗青少年最唔鍾意父母嗰兩個行為。同埋其實我成日講「眼不見為乾淨」除咗係同仔女嘅相處之道之外，所有人與人之間嘅關係其實用呢一個處理嘅方法都會避免咗好多爭執，尤其係同伴侶嘅相處入面，如果技巧地能夠做到就更加能夠改善到大家嘅關係。