少年成長今日: 0|主題: 16020

收藏本版

發帖

返回列表

跳至頁

查看: 28476 | 回覆: 0

零用錢 [複製鏈接]

csir3290

子爵府

積分: 12062

1^#

發表於 23-10-1 11:30 |只看該作者 |倒序瀏覽 |打印

講開呢排細佬日日返到屋企都好多嘢同我哋講，早兩日佢又繼續講學校嘢，佢同我哋講話唔見咗20蚊，咁我哋當然問佢點解啦！以為佢自己唔小心跌咗或者唔知擺咗去邊度。點知原來佢講係因為要幫同學，所以借咗錢畀同學。佢話嗰日佢哋上堂，原來老師一早講咗要交錢，但係佢嗰組啲同學就個個將個銀包擺咗喺班房，得佢帶咗銀包去上堂，咁佢唔想啲同學畀老師鬧，所以佢就逐個借咗12蚊畀佢哋先交咗畀老師，返到班房啲同學個個畀返錢佢，但係因為都幾散，佢自己又冇記低邊個畀咗邊個未畀，或者有冇找多咗錢畀人，終於到最後當個個同學都畀返曬錢佢之後，佢就發覺少咗20蚊。佢同我哋講又唔記得咗有冇同學未畀，佢淨係知道返咗班房之後，成組同學個個畀返錢佢，佢又冇特別記低。而且因為好多同學都要找錢佢都根本唔知道有冇找多咗畀人。

喺呢件事上面我哋當然係信任細佬，知道佢唔會係亂咁用咗啲錢，就作個故仔話畀我哋聽唔見咗20蚊，以細佬嘅性格我哋真係相信佢會咁樣去幫同學。所以我同老婆都先欣賞咗佢呢個幫助同學嘅行為，但係另一方面我哋都話返畀佢聽，其實同學係應該有自己嘅責任要負，因為佢哋明知道老師要收錢，但係自己都唔帶錢去上堂，其實佢哋應該係要負返責任，我哋同佢講我哋唔係話唔幫同學，但係有陣時做錯嘢就真係需要負責任。細佬同我哋講話佢都知道，但係唔通同學開到聲見到佢哋咁樣都唔幫好似好衰咁，而且佢都唔想啲同學畀老師鬧，因為話曬都係同組，咁我哋都明白當時佢嘅處境，只不過係同佢講返其實有陣時同學都需要自己付返責任，不過始終都係欣賞佢幫助同學嘅做法。但係另一方面我亦都教佢錢銀上面嘅嘢有陣時都要小心，今次就當係一個教訓，我同老婆最後都冇畀返嗰20蚊佢，亦都冇幫佢出頭打電話去學校同老師講，因為我哋覺得細路仔呢啲嘢，如果你打電話去到學校同老師投訴，或者同老師講，學校一定會為咗交代而認真咁做，到頭來細佬可能想幫同學本來係好事，最後變成壞事，而且有陣時細路仔嘅呢啲問題應該等佢自己去解決，好似呢件事咁，亦都等佢吸取一個教訓，就係有陣時錢銀真係要小心處理，我哋唔係話叫佢遇到同學有問題唔好幫，但係當遇到錢銀嘅時候就要小心啲去處理。我哋教佢盡量都唔好借錢畀同學，如果要借就真係要小心啲記低同埋更重要嘅就係借得錢畀同學，就要做最壞嘅打算，有心理準備就係可能同學會唔還，如果唔還就可能連朋友都冇得做，所以要諗清楚先至好借錢畀人。

細路仔上到中學另外一樣可能較為出現問題嘅就係金錢，因為佢哋小學嘅時候根本就唔需要出街食飯，所以好似阿仔咁零用錢根本就唔多，就算俾好多時我哋都係畀落去八達通度等佢搭車。但係而家因為佢每日都要出街食飯，又要搭車，咁所以佢每日嘅零用錢都有幾十蚊。對一個細路仔嚟講，其實突然間多咗咁多錢，確係相對較難控制。所以我哋要教佢點樣用錢，同埋用錢嘅態度。我哋唔會一開始就成個月咁畀錢佢，或者每次畀一個好大嘅數額佢，但係又唔好逐日畀，因為逐日畀好似呢每日都要佢交代，好似好唔信佢咁，我哋會一個禮拜畀一個固定嘅數額佢，其實大概都預到佢會用到幾多錢，而且佢每日返嚟都會同我哋講好多嘢，我哋都會借啲意問下佢晏晝食啲乜嘢，當然唔會要佢好詳細交代用咗幾多錢，但係其實透過傾計旁敲側擊大約都會預到佢每日用嘅數，到每個星期日我哋畀下一個禮拜錢佢嘅時候，佢都會大概同我哋講咗上個禮拜剩咗幾多錢，我哋通常都會叫佢自己儲起佢，然之後就畀下一個禮拜嘅零用錢佢，如果學校要交其他錢，佢先至會再同我哋講，我哋另外再畀。我哋希望透過信任同埋有規律咁畀錢佢，等佢慢慢養成儲錢同埋用錢嘅習慣。千祈唔可以令到細路仔覺得家長唔信佢哋，透過信任慢慢建立習慣。如果期間發現佢哋用錢嘅情況有唔規律嘅時候或者突然間用多咗錢，我哋先找住呢啲藉口慢慢收番緊。做家長我經常都講唔好一下子就以為升中佢就已經大個而放手乜都唔理。好似用錢咁其實都係要慢慢逐步放手，觀察住佢哋嘅情況，如果唔係一下子由冇乜零用錢變成每個禮拜可能都有兩三百蚊嘅時候，好容易就會因為唔識點用而亂咁用。但係我唔係叫家長每日就好似報數一樣要細路仔寫返清楚每一條數，咁只不過係會令個細路仔覺得家長唔信任佢哋，反而係家長應該透過平時嘅觀察同傾計，或者到每一個禮拜畀新嘅錢嘅時候去了解佢哋用錢嘅情況，所以我覺得千祈唔好一次過畀一個月嘅零用錢，然之後就不聞不問，又唔同佢哋傾計又唔了解佢嘅情況，到出現問題嘅時候可能已經好難去改變。