少年成長今日: 0|主題: 16023

收藏本版

發帖

返回列表

跳至頁

查看: 27852 | 回覆: 0

年青人的潮流 [複製鏈接]

csir3290

子爵府

積分: 12079

1^#

發表於 23-8-6 11:26 |只看該作者 |倒序瀏覽 |打印

上星期剛剛開始動漫展，因為疫情幾年冇入過去，所以今年點都要入去睇一睇。雖然動漫展好似係年輕人嘅專利，但係入場所見，其實好多家長都帶埋自己嘅仔女入去睇。好似我咁，其實我對仔女對入去睇動漫展都唔係非常熱衷，反而係我想入去睇下。可以同埋對仔女都入去了解下而家動漫嘅最新潮流，入到去總有啲嘢係大家都啱睇。好似我個女就成日問我入去想買乜嘢，我個仔就對高達同埋超人特別有興趣。行咗差不多兩個鐘頭動漫展其實話題可以不絕。我相信好多家長同埋仔女入去，除咗個爸爸想睇自己嘢之外，亦都係想同仔女多啲溝通。好似嗰日睇新聞有個媽媽喺個訪問入面就話想了解下年青人嘅諗法，所以專登入去動漫展，話唔想同細路仔脫節當然就要親身入去了解。我覺得個媽媽講得好啱，好多時家長同青春期嘅仔女有代溝嘅原因就係同佢哋嘅諗法脫節，又或者係同佢哋冇共同話題。其實呢兩樣嘢都好睇家長自己有幾開放，好多家長都會覺得動漫展呢類嘅展覽同自己冇關亦都冇興趣又怕人多，所以唔會主動話入去睇。但如果換一個角度諗，作為同仔女溝通嘅橋樑其實呢類展覽真係要入去睇下。就好似嗰日喺動漫展期間我同仔女嘅話題真係可以不停咁傾。所以我成日都話同仔女培養共同興趣好緊要。

好似啱啱開始嘅暑假咁，今年我都安排同佢哋一齊去參加暑期班，就係一齊三個人一齊去學氣槍射擊。不過當然都係因為我自己對呢個運動有啲興趣，再加上阿仔阿女聽到可以我哋三個一齊學，而且學嘅地方有冷氣所以佢哋都表現得好雀躍。一齊上堂嘅時間大家都有講有笑，大家又互相比較下射擊嘅成績，雖然一堂成三個鐘頭，但係好快趣咁又過去咗，一啲都唔覺得悶。而且上堂之後大家延續嘅話題都仲可以不斷。例如返到屋企大家會傾下點樣可以射得快啲好啲，點樣嘅動作會好啲點樣練習會有用啲。大家又會研究下啲氣槍嘅外貌性能，同埋啲裝備咁，所以又係話題不絕。到考試嘅時候大家都會緊張對方表現成點，上堂期間又會拍吓片影吓相。所以上堂嘅時間開開心心咁又過咗去，最終我哋三個都能夠考試合格攞到證書，之後仲會安排一齊再去練習添。
雖然佢哋放緊暑假，我同老婆都要返工，但係都要安排一啲活動同佢哋一齊進行，因為佢哋除咗喺屋企做下功課之外，其實我哋都唔想佢哋嘅生活咁無聊，我個女鍾意剪片，所以我哋放假嘅時候都會特登同佢出去四圍去拍下嘢，等佢放暑假期間可以有多啲時間去剪下片。而一齊去學嘢，就更加可以增加我哋嘅溝通內容同埋發展共同興趣。所以家長唔好成日都話同仔女溝通唔到，其實機會從來都係喺家長手上，只不過係家長有冇在意去發展呢啲機會。抑或乜嘢都話仔女嘅興趣自己唔啱，又或者係對潮流嘅嘢都好抗拒。其實就算係一齊睇劇，都可以發展好多話題出嚟。例如我老婆間中都會煲下劇，佢最鍾意就係睇啲偵探推理劇，但係睇嘅時候都會叫埋阿仔阿女一齊睇，慢慢就發展到阿仔阿女都會陪我老婆一齊睇，佢哋嘅話題亦都會多咗。

所以千祈唔好覺得仔女去到青春期就自自然然會同家長有代溝，其實只要家長肯喺細路仔細個開始，同佢哋一齊培養共同興趣，都多啲了解佢哋嘅興趣同埋潮流咁，自然大家就會有多啲共同話題，仔女亦都會覺得父母係貼近佢哋嘅諗法，自自然然代溝嘅機會就會減少。多啲接觸年青人嘅諗法除咗可以增進同仔女相處嘅關係之外，亦都係保持自己心境年青一個好好嘅方法。有啲家長更加會將代溝作為同子女溝通唔到嘅藉口，覺得代溝係必然會發生，其實打開溝通呢度門嘅鎖匙從來都係家長手上，呢把鎖越早用鎖匙打開就越容易打得開，但係可悲嘅係有陣時係家長自己放棄咗呢一把打開溝通知門嘅鎖匙。