吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 母乳餵哺› 分享: 在仁安生左三胎, 餵人奶的失敗及成功經歷 ...

母乳餵哺今日: 0|主題: 85706

收藏本版

回覆發帖

返回列表

跳至頁

查看: 5991 | 回覆: 64

分享: 在仁安生左三胎, 餵人奶的失敗及成功經歷 [複製鏈接]

12 3 4

nicolandavy

別墅

積分: 870

1^#

發表於 12-5-5 12:26 |只看該作者 |倒序瀏覽 |打印

2012年4月5 日, 細女在仁安出世了. 今次成功成為全埋身人奶媽, 想將之前兩個哥哥的失敗經驗同今次妹妹既經驗在此分享給一些預備在私家醫院開刀同想餵人奶既媽咪~

首先, 講講仁安對於預約開刀媽咪同BB既安排:
開刀既媽咪, 一般會在預約時間既四至六個鐘前入院, 辦好入院手續後會有人帶上病房 (三樓或五樓), 之後姑娘會同媽咪量血壓, 剃恥毛, 抽血等等...之後就可以入房等, 開刀前半個鐘換好衫, 之後會有人叫你上床推媽咪去手術室.

手術完成後, 起碼都要24小時後先可以落床. 問題通常响呢度開始喇~

準媽媽成日會問, 咁我D初乳咪俾唔到BB食囉 ~ 其實可以放心. 一般約開刀既媽咪都係比預產期早十日八日, 所以你係未有奶的. 响你未落得床既時候, 姑娘己經幫你用奶粉餵左BB架喇. 佢地個schedule 如下: 02:30, 07:30, 10:30, 14:30, 18:30, 22:30. 每日有六次. BB DAY 1 食15ML, DAY 2 食30ML etc. (每天加15ML)

第二個問題又黎喇: 咁阿B食左奶樽, 咪會有機會有乳頭混淆症囉? 其實有冇我就唔清楚, 但如果媽咪係同姑娘講左會餵人奶, 姑娘係會响餵奶時間, 叫媽咪去育嬰室, 姑娘抱BB出黎俾媽咪, 跟住教媽咪正確餵奶姿勢. 叫媽咪每邊俾BB吮15分鐘, 等大腦有意識去做奶 (注意, 一般頭兩日係未有奶的, 而且心急既BB可能會係咁喊, 令到新手媽咪不知所措), 過左半個鐘, 姑娘會拎奶粉俾BB食. 如果媽咪唔累可以自己餵奶同幫BB換埋片先返房.

第三個問題通常係: 咁我駛唔駛帶泵去呀? 其實呢, 當你FEEL到谷奶到你真係要用泵去泵奶, 中間係有一D時間既. 通常開完刀第三日左右先會有谷奶既現象. 呢個時候你千萬唔好用泵住. 最緊要係如果有痛, 按鬆佢先. 姑娘可以借奶樽俾媽咪唧奶的. 開頭我建議用手唧左出黎先. 一開始通常都係一滴滴. (呢D就係初乳) 媽咪唧完可以俾返姑娘, 到下次餵奶時姑娘會替你坐返熱俾你餵阿B. 到真係通左會有奶柱. 呢個時候先用泵都未遲. 同埋我其實唔建議準媽媽咁快買泵...如果埋到身就一定係埋身最好的.

以上就係仁安既餵奶程序喇.

而家要搞細女先. 稍後有時間先再po 埋我三個小朋友的成敗經歷...

0 1 0

私人傳訊回覆引用

nicolandavy

別墅

積分: 870

2^#

發表於 12-5-5 12:51 |只看該作者

第一胎, 大仔, 2008年10月在仁安出世. 當時新手媽咪, 咩都唔識, 在一間社區中心請左個陪月. 大仔係相當心急既BB. 加上佢一出世醫生話佢個肺麻麻地, 要入箱, 所以頭三日完全餵唔到佢食奶. 第四日終於可以去餵佢, 點知佢一埋身就會喊, 我又好驚. 所以當時已經諗住唔得就返屋企泵. 在醫院住左五日 (個package 係五日四夜).

返到屋企, 那手唔成世. 個陪月又好似矇矇地咁. 我未通, 佢就日日煲上奶湯俾我. 搞到我谷到上頸. 痛到不得了. 我當時仲重手買左兩個swing, 自制雙泵. 係有奶泵到出黎, 但兩邊胸都係硬塊. 按都按唔鬆, 老公當時又唔肯幫口. 結果捱左大半個月, 終於發燒, 頂唔順喇, 放棄左. 兩個泵仲半價放左出去...唉...慘痛既失敗經歷...

私人傳訊回覆引用

babyakambm

別墅

積分: 792

3^#

發表於 12-5-6 09:31 |只看該作者

回覆：分享: 在仁安生左三胎, 餵人奶的失敗及成功經歷

I have similar experience too. My first boy was born in union in dec 08 n fail with breast feeding due to same problem as yours.
Really look forward to hear your second bb experience

私人傳訊回覆引用

chu.c9

男爵府

積分: 7137

畀面勳章

4^#

發表於 12-5-6 09:54 |只看該作者

回覆：分享: 在仁安生左三胎, 餵人奶的失敗及成功經歷

雖然我唔係仁安生，不過都期待你分享經驗呀

感恩

私人傳訊回覆引用

candy0910190

大宅

積分: 2007

5^#

發表於 12-5-6 12:05 |只看該作者

好好嘅經驗，多謝妳寫的咁詳細，好值得學習

私人傳訊回覆引用

llmanll

男爵府

積分: 8927

6^#

發表於 12-5-6 13:26 |只看該作者

謝謝分享，期待二仔同細女既經驗

私人傳訊回覆引用

sammiso

珍珠宮

積分: 40133

7^#

發表於 12-5-6 14:16 |只看該作者

唔該曬分享，學識左好多嘢！

私人傳訊回覆引用

nicolandavy

別墅

積分: 870

8^#

發表於 12-5-6 15:40 |只看該作者

2009年12月, 細仔在仁安出世. 細佬同哥哥只係相差十四個月. 醫生都問我做咩咁趕...其實, 我都覺得自己過份英勇!

同之前一樣, 都係擇日開刀(其實都唔到我簡, 因為兩胎相隔太近). 今次陀第二胎時, 七八個月左右已發現乳頭可以擠出少少奶水. 所以對餵人奶信心好大. 今次我醒喇, 只係買左個avent手泵同儲奶杯, 仲有奶袋. 細仔比哥哥好少少, 佢肯埋身啜但唔係啜好耐. 我在醫院第二晚谷奶, 自己推左成晚先搞掂. 今次我同阿仔住左四日三夜就出院喇, 因為真係好怕訓醫院. 意外地發現原來早走可以扣返錢, 慳左幾千蚊架! 嘻嘻~

返到屋企, 我就完全投入去搞細佬喇 (外判左個大仔俾工人成兩個月呀陰公...). 一開始我已經覺得埋身係mission impossible 架喇. 加上同好多媽咪一樣, 成日覺得埋身唔知佢食左幾多, 所以硬係覺得泵出黎餵好似安全D咁. 今次都有陪月, 但唔係持牌的, 係舊街坊. 我叫佢响我通晒後才煲上奶湯我飲, 當時開左罐細仔奶粉, 頭兩個星期未係富媽時就間住食. (尤其是晚上十一點幾果餐一定俾奶粉, 因為可以等佢飽肚D訓耐D.) 果次我用avent手泵, 覺得比swing好. (可能上一次不愉快經歷啦...).

就係咁, 我大約一個月左右就做左全泵媽 (唔駛再補奶粉). 但全泵真係好好好好累. 佢食時, 你要餵, 佢食完, 你又要開始泵. 食奶食一個鐘, 泵奶又泵大半個鐘. 泵完自己洗又要steam, steam完又要擺好, 即係又搞多半個鐘...跟住下一個cycle又黎喇...基本上冇停過. 出街仲慘...又要帶泵, 又要帶冰, 又要帶奶...總之煩到嘔...

其間, 有一個超慘痛既經歷. 當時大約一個半月左右, 我已經儲左三四十包冰奶, 諗住大把貨. 點知, 有一晚個雪櫃freezer唔知邊個較過個溫度, 我全部奶溶晒...發現時已太遲...要親手將自己辛辛苦苦儲既奶倒晒, 當時真係灰到呢...欲哭無淚呀..

捱左兩個月, 同家人帶埋兩個仔去澳門玩, 我都有帶晒D野去架. 不過澳門美食實在好難忍, 所以係咁咩都食, 最後因為為食而放棄了泵媽生涯. 回奶時, 真係好唔捨得架. 點知...最近先知原來餵人奶都唔駛好似想像中介口介得咁清既...

二哥呢part , 係咁多先~

私人傳訊回覆引用

kittykityi

男爵府

積分: 5184

9^#

發表於 12-5-6 18:51 |只看該作者

回覆：分享: 在仁安生左三胎, 餵人奶的失敗及成功經歷

等緊你

Make a pregnancy ticker

私人傳訊回覆引用

nicolandavy

別墅

積分: 870

10^#

發表於 12-5-7 11:28 |只看該作者

舊年八月我生日前夕, 經期一向唔準時既我心血來潮買左枝棒棒返黎驗, 點知一驗真係有左! 當時真係不知所措! 開頭真係有諗過唔要的. 因為兩個仔已經夠晒數. 但後來去做檢查, 見到個胎仲要有心跳 (七週幾) 真係唔捨得! 同家人商量後都係決定辛苦D都生! 之後驗到係女, 大家都覺得好開心tim!

最後一次陀B日子, 感覺真係幾好. 當然呢胎我都係要開刀啦. 擇左日子, 四月五日就入院喇! 今次同自己講, 點都要做到埋身餵! 開完刀第二朝, 未夠廿四個鐘我就落左床喇! 真係唔可以唔讚下我個醫生, 我三胎落地都唔痛. 好快行得走得~ 一落床就係時係去餵奶喇. 可能女仔同男仔真係唔同, 加上阿女未係食左好多餐, 所以我俾佢埋身啜, 佢肯之餘仲平均每邊每次十分鐘 (有時少D有時長D). 啜完姑娘俾奶粉, 佢又食得幾好喎, 唔似佢兩個阿哥, 食勁耐!

住院第三日朝早, 谷奶喇! 自己按下按下, 兩邊加埋擠左一安士初乳出黎. 係黃色的~ 搞掂即刻拎俾姑娘儲起下餐奶食囉~ 第四日朝早我就出院喇 (又慳返幾千, 嘻嘻).

入院前我只係買左三個dr brown奶樽及預備左一罐奶粉, 一心諗住希望妹妹唔駛用, D奶樽就俾返阿哥地用, 奶粉就俾表哥仔用. 返到屋企, 第一時間要用手擠奶. (今次連泵都冇, 好堅決地要埋身~ ) 一擠已擠出兩安幾, 阿女一喊要食我就先俾佢埋身, 之後先補奶粉.

大約係day 5-6左右, 我一邊胸塞左. (之前一直未飲上奶湯, 因為自覺仲未夠通). 好彩未飲上奶湯水, 我叫老公幫口, 又按又啜, 搞左兩晚後終於通左. 由果日開始, 到而家都未有再塞過, 每日亦都keep住兩大碗魚湯.

亦都係day 6左右, 我膽粗粗唔再補奶粉俾阿女. day 8返仁安覆診, 佢冇重到 (仲係出院收左水既重量). 醫生當時話佢有黃, 但未過200. 都OK. keep住俾多D佢食就得. day 9 去健康院, 見姑娘, 佢就話阿女有黃, 冇重. 問我一日幾餐? 我話當時係一日八餐, 每餐都食晒兩邊, 每邊十分鐘左右. 佢話唔得, 要十至十二餐, 仲要係每餐只食一邊起碼30至45分鐘! 因為前奶(頭十分鐘)係水, 後奶先係脂肪. 咁我返到屋企就每隔兩個鐘就俾佢食. 每次只食一邊. 兩日後返健康院, 重左0.2kg了! 但都仲係黃, 過左四日再返去, 再重多0.2kg! 見到阿女重, 覺得自己心機真係冇白費到! 好開心好有滿足感!

黎緊星期三再去健康院檢查. 阿女應該重左好多架喇~~~ (我而家抱都覺得有點累) 埋身既感覺真係好好, 又唔駛好似二哥果時咁煩, 食之前又要坐熱D奶, 太熱又唔得, 唔夠熱又唔得!

各位人奶媽, 加油呀! 我目標係半年, 希望半年後可以再半年, 咁就最好喇!