少年成長今日: 1|主題: 16049

收藏本版

發帖

返回列表

跳至頁

查看: 20079 | 回覆: 0

質素 [複製鏈接]

csir3290

子爵府

積分: 12217

1^#

發表於 23-4-23 10:23 |只看該作者 |倒序瀏覽 |打印

屋企附近嘅大型商場喺復活節期間搞咗個好大型嘅充氣嘉年華，所以日日都好多家長帶埋啲小朋友去玩，令到個商場好熱鬧，我對仔女都有人諗過入去玩，不過第一好難買飛，第二望落去都似乎係適合啲比較細個嘅小朋友，所以佢兩個雖然想玩但係又好似有啲唔係幾好意思。

早兩日一如往常嘅星期六都要接阿仔阿女學畫學琴，老婆又唔得閒，就得我一個百無聊賴咁喺個商場度遊嚟遊去等佢兩個，終於企咗喺商場2樓望落去個充氣嘉年華，原來望住啲人玩都幾吸引，企下企下就企咗差唔多半個鐘。

喺個充氣嘉年華入面小朋友就當然玩得好開心啦！但係有啲跟埋入去陪仔女玩嘅家長就見到佢哋都幾狼狽。首先佢哋冇啲細路仔咁靈活，家長跟埋入去玩其實最主要都係睇住自己細路仔，驚佢哋有危險，第二就係同啲仔女影相。突然間聽到有個家長喺度鬧啲小朋友嘅聲音，連我企喺二樓都聽到，望過去原來佢唔係鬧緊自己個小朋友而係話緊其他小朋友，應該就係話其他啲小朋友因為大個啲，玩嘅時候興奮得滯可能唔覺意撞到佢個小朋友，個阿媽就喺度係咁話嗰啲細路，話佢哋做乜唔讓佢個仔，因為佢個仔咁細個，見到嗰個畀人話嘅細路仔個樣好無辜咁企咗喺度，但係個阿媽得勢不饒人係咁話佢，但係佢個仔又好笑嘅，因為已經走開咗自己玩。其實喺啲咁多人嘅地方，咁多人玩其實唔覺意撞親實會有，咁照計嗰啲地方就算撞親都唔會有啲咩危險，因為四圍都係嗰啲充氣嘅玩具，又四圍都係軟墊，個阿媽亦都話咗個細路仔，咁何必得勢不饒人呢！我明白佢都係保護自己個仔，但係大家都喺度玩而且大家都係細路仔啫！

另外見到另外一個阿媽同自己嘅細路仔喺度玩，咁佢個細路仔應該都真係好細個，可能真係得三四歲其實玩得唔係好靈活，本來都冇乜嘢，只要個阿媽同個細路仔唔好玩啲咁高難度又擒高擒低嘅嘢都冇問題，但係個阿媽就帶住個細路仔不停叫前面啲人讓佢，當佢要玩啲擒高擒低嘅時候，因為玩得唔靈活個家長又要教佢點玩，就終於搞到後面塞曬車排曬隊，但係個阿媽就不停同後面啲人講叫佢哋等讓吓佢可以慢慢爬咗上去先，我唔係話佢阿媽咁樣教個細路有乜問題，而係話喺啲咁人多嘅時候，其實自己都應該睇下個環境以唔好阻住人為原則！仲有啲家長其實佢嘅仔女有好多嘢都未必適合咁細個嘅細路玩，但係佢入去嘅主要目的就係打卡同影相，所以好多位置都要個細路仔擺好多姿勢做好多動作畀佢影，喺個高滑梯滑落嚟見到後面塞晒人都叫個細路仔坐定畀個家長影到滿意為止，然之後先至落嚟，啲家長為咗影相可以完全無視後面排緊隊嘅人，但個家長事實係冇犯規因為佢真係排隊，只不過排到佢嘅時候佢就慢慢喺度影相，慢慢喺度擺pose，影到滿意先至輪到下一個去玩。另外，有啲家長就為咗要追住自己嘅仔女，驚佢哋一路玩嘅時候會有危險，但係啲細路仔又跑得快，嗰度嗰啲嘅設計其實又唔係好適合大人喺度跑嚟跑去，攪到有啲家長又好狼狽。其實有陣時係啲家長阻住其他細路仔玩，甚至乎我都見到有家長試過唔覺意撞到其他細路仔添！

講到尾其實呢啲家長都冇違規，因為佢哋真係跟足嗰啲指引，有排隊又有比足入場券先至跟埋一齊入去，但係有陣時係咪就係淨係守寫出嚟嘅明文規定就夠呢！有陣時冇寫出嚟嘅嘢先更加顯示到一個人心道德規範有幾高，好似禮讓，關心其他人，有同理心等等雖然冇明文規定，但係其實就應該存在喺每一個人嘅心入面，而且作為家長其實亦都係親身教緊自己嘅仔女呢一啲自身嘅修養，所以一個真正有質素嘅人唔只懂得守白紙黑字的明文規定，更重要係反映在佢日常待人處事嘅態度上，尤其係一啲冇明文規定必須要做嘅態度上。因為呢啲唔係因為你驚犯法先至去守嘅規矩，而係真正反映一個人存在於心中嘅原則同價值觀！呢啲正正就係家長要要用自身的言行舉動教畀細路仔最重要嘅嘢。