少年成長今日: 0|主題: 16049

收藏本版

發帖

返回列表

跳至頁

查看: 37060 | 回覆: 5

說「不」的權利 [複製鏈接]

csir3290

子爵府

積分: 12217

1^#

發表於 22-6-19 11:03 |只看該作者 |倒序瀏覽 |打印

我發覺自己阿仔好多時都唔係好識做決定，好多時問佢有啲咩睇法，就算問佢想食乜，想去邊，咁簡單佢都好似決定唔到咁，可能細個佢習慣咗樣樣嘢都跟家姐，又或者家姐幫佢做決定，所以佢唔係好慣自己做決定。其實自細都已經畀好多機會佢哋自己做決定，家姐都好啲，都算有自己嘅主見，但係細佬可能佢太顧及其他人嘅諗法，驚做咗個決定我哋會唔鍾意，所以好多時都會叫家姐決定，雖然大大吓而家都已經好啲，但係我發覺其實佢兩姊弟都仲有個問題就係唔識得拒絕人。

我覺得除咗要懂得做決定之外，亦都要懂得對自己認為唔鍾意嘅嘢say no，唔知係咪因為佢哋覺得好多嘢都要聽父母講，所以通常我哋講嘅嘢佢哋都唔會say no。當然我同老婆都覺得聽話係好，但係要懂得拒絕自己唔鍾意嘅嘢同自己唔想做嘅嘢亦都好重要。我同老婆喺好多嘢上面都會問佢哋嘅意見，由其事而家佢哋都已經五年班同埋中學，更加容許佢哋對唔想做嘅嘢say no，不過當然對啲重要嘅決定我同老婆都係有最終嘅決定權，佢哋嘅意見當然我哋都會好重視，如果違背咗佢哋嘅意願我哋當然會解釋畀佢哋聽而唔係淨係需要佢哋接受。

中國人家長好多時都係忽略咗一樣嘢，就係畀細路仔有say no嘅權利，中國人教路仔自細就要教佢哋聽話，總之父母講嘅嘢佢哋就要全盤接受，咁先至叫做孝順同埋聽話，我明白咁樣對父母嚟講當然係最容易做最容易教，但係久而久之就會令到個細路仔自己唔識得做決定亦都唔懂得拒絕人。而家社會上面好多人受騙或者甚至乎受傷害，好可能就係因為喺細個嘅時候唔懂得say no。可能有啲家長會覺得拒絕人好容易，但係連我作為成年人有陣時都會覺得拒絕人好似唔係幾好意思咁，所以我覺得自細就應該要教細路仔畀佢哋有say no嘅權利，等佢哋知道如果自己唔鍾意或者自己唔想做嘅嘢其實係可以拒絕嘅。可能有啲家長會話要拒絕人其實有幾咁難呢！但係家長自己試想像一下由自己個細路仔自細到大，你有幾多機會畀佢say no呢，好多嘢都係由家長決定因為咁樣係最快最慳時間，當細路仔唔想跟家長嘅意願做嘅時候，家長就會覺得佢哋唔聽話，咁久而久之細路仔都費事出聲，但係到佢哋越嚟越大嘅時候，可能都有家長聽過自己嘅細路仔投訴話家長成日迫佢哋做啲唔鍾意做嘅嘢。所以家長絕對需要留一啲空間，畀細路仔自己做決定，甚至乎需要留啲空間畀佢哋去學習拒絕或者say no。例如學唔學興趣班，點樣做嘢嘅方法，出唔出街，跟唔跟自己一齊去，其實好多日常生活上面嘅細節都可以留一啲空間容讓佢哋自己做決定。細路仔越大，其實畀佢哋做決定嘅空間就要越多，只有慢慢訓練，細路仔覺得父母都尊重佢哋嘅意見同埋權利，咁到進入青春期嘅時候，出現反叛嘅情況就會減低咗。所以家長除咗要重視士女聽唔聽話之外，亦都要重視佢哋可以有say no嘅權利！其實家長只要放開一啲，明白仔女亦都有佢哋自己意願，仔女懂得表達，懂得做決定甚至懂得say no都係佢哋成長一個好重要嘅階段同埋學習。