少年成長今日: 2|主題: 16050

收藏本版

發帖

返回列表

跳至頁

查看: 17352 | 回覆: 2

第三針 [複製鏈接]

csir3290

子爵府

積分: 12219

1^#

發表於 22-9-11 10:27 |只看該作者 |倒序瀏覽 |打印

剛剛開學兩姊弟當然繼續都係返半晝，明明家姐讀中學話九成打咗兩針就可以恢復全日，但突然間又話要九成打三針先至可以恢復全日。總之對家長嚟講就總係覺得政府嘅政策好混亂，一時又兩針一時又三針。

坦白講作為家長最關心當然就係打針有冇副作用，同埋細路仔嘅學業。越細個嘅細路仔其實家長就越擔心疫苗嘅副作用。其實打唔打針始終都係個人嘅選擇，但係而家打針就變成可唔可以返全日制嘅必要條件。我總係覺得政府而家想谷細路仔打針，就攞細路仔返學嘅時間嚟做籌碼。如果而家三針九成達到目標，但係都仲係未能夠完全清零嘅時候，係咪又繼續用呢樣嘢嚟要啲細路仔打第4針呢。再咁落去其實打新冠疫苗咪就係好似打流感針一樣要年年打。但流感針家長覺得有需要就會打，但係我冇聽過話如果打流感針嘅人數唔夠就會影響細路仔返學。流感針最多都係一年一次，但新冠疫苗就可能幾個月就要打一次。而家政府谷細路仔打針嘅方法就好似上一次政府谷啲老人家打針嘅方法一樣，不停每日報有幾多細路仔入院有幾多細路仔重症，其實上一次多老人家打針嘅時候都係用緊呢套方法，每日記者會就講畀你聽有幾多老人家入院，有幾多老人家重症，有幾多老人家過身，唔打針嘅又唔畀去老人院探啲老人家，我總覺得其實而家都係用緊呢套方法去令啲家長畀啲細路仔去打針。

我明白防疫重要，但係眼見全世界而家對待呢隻病毒越嚟越似流感病毒咁處理，但有陣時我真係覺得政府處理嘅方法係令到人好混亂。好似又想理又想唔理咁，而家又個萬宗但係你睇下上一波過萬宗時政府嘅做嘢方法同而家過萬宗嘅處理方法有幾唔同就知道。由初初有幾十宗到而家又試過萬宗，其實我睇到政府都明白再係咁封落去根本唔能夠長遠行落去，最慘係你睇到全世界其他地方都已經陸續同呢隻病毒共存。所以有時啲政策我自己覺得就有啲混亂。你想人覺得呢隻病毒好嚴重，但係我而家見到嘅就係政府好多嘢都冇所謂唔理，返工又得去展覽會有得，雖然過萬宗，但市面上其實大家都係好似平常咁樣生活，所以我都唔知究竟而家呢隻病毒我哋究竟係想消滅咗佢變成零定係同佢共存。

但作為家長講到最尾都係嗰句，最關心嘅就係仔女嘅學業同埋如果要打疫苗究竟疫苗嘅副作用對仔女嘅影響，講到最尾我都係覺得打唔打針應該係個人嘅決定，即係我冇聽過話冇打流感針就會限制細路仔喺學校嘅活動一樣。我睇新聞夠話有啲官員同議員打咗四針都中啦，咁係咪又係話打咗四針先至唔會有重症呢！究竟幾時或者去到一個乜嘢地步我哋先至可以回復正常生活，其實可唔可以一個清晰嘅目標話畀我哋聽，成日話要清零會唔會有啲唔現實呢！而家幾十宗又唔可以過正常生活，幾萬宗又唔可以，萬幾宗又唔可以，究竟政府嘅目標係點先至可以過正常生活呢。究竟要打幾多針先至夠呢？係咪當全民都已經三針嘅時候，如果疾病毒都仲未解決就要全民打第4針呢？沒完沒了嘅打針又係咪解決方法呢？