少年成長今日: 0|主題: 16108

收藏本版

發帖

返回列表

跳至頁

查看: 15560 | 回覆: 0

再談禮貌 [複製鏈接]

csir3290

子爵府

積分: 12548

1^#

發表於 23-1-1 11:00 |只看該作者 |倒序瀏覽 |打印

上一次講出門同人打招呼，我當然唔係話係人都打招呼啦，而係基本上你知佢係邊個先至會同佢打招呼，更唔係無緣無故喺街見到任何人都同佢哋打招呼。我總係覺得認得嘅人都應該係主動打招呼的。另外，除咗小朋友好細個嘅時候我會叫佢哋叫人之外，基本上我從來都唔會迫對仔女主動同人打招呼，而係透過佢哋日常見到我哋兩公婆咁做，所以佢兩個都習慣咗見到人就要同人打招呼，不過當然最初佢哋兩個自發咁做嘅時候，我哋都要從旁讚賞佢哋呢個行為，再加上其他人都讚佢兩個有禮貌所，以慢慢佢兩個你都習慣咗主動同人哋打招呼。咁當然我哋都唔會教佢同任何陌生人都主動打招呼啦！

講開打招呼，另外一樣同禮貌有關嘅就係而家嘅小朋友好似唔係好懂得講唔該，多謝之類嘅禮貌回應。我相信呢啲其實學校都有教，但係最有效嘅學習方法都係喺父母身上去學。但係呢一代不論父母又好或者細路仔又好，可能都習慣咗消費者嘅心態，總之我畀咗錢接受服務係應該嘅，就冇必要講唔該或者多謝之類嘅說話。但係其實我覺得呢都係啲基本禮貌，不論有冇畀錢都好，其實同人哋講聲唔該或者多謝大家都會開心啲。但係如果父母都唔慣喺仔女面前同人哋講唔該或者多謝，仔女又點會學到呢！父母都覺得樣樣嘢都係奉旨，仔女自然都會覺得每一樣嘢都係奉旨人人都應該係服務佢哋，又點會有禮貌咁回應呢。所以就算對住自己嘅仔女我都會同佢哋講唔該，就算只係畀咗粒糖我食我都會講多謝。

除咗多謝唔該之類嘅說話之外，主動道歉或者主動講唔好意思呢啲說話，喺而家呢一代細路仔身上亦都好難見到。總覺得而家呢一代比較自我中心而且有問題都係人哋有問題，好少會先覺得係自己有問題，但係正正就係呢一種心態令到大家相處時都會先保護自己，我唔係話樣嘢都要認錯先，但係當真係自己錯嘅時候就唔好吝嗇同人道歉或者講對唔住，又或者當件事未搞清楚嘅時候，先唔好覺得一定係人哋有問題先。但係偏偏而家其實好多家長喺仔女面前都覺得自己一定唔會錯，有錯一定係仔女錯或者係其他人錯。咁樣嘅榜樣仔女會喺父母身上學到啲乜嘢呢？所以喺我自己同仔女嘅相處入面，道歉根本唔係一件困難嘅事，就算作為家長做錯咗講句sorry或者對唔住，其實都唔係一件乜嘢大件事，但係對於細路仔嚟講我就覺得係一個好重要嘅榜樣。

其實乜嘢叫做禮貌做幾多先至夠，冇話一定啱或者一定錯，都係價值觀嘅問題，我只不過係想講點樣嘅父母就會教出點樣嘅細路仔，如果想細路仔有禮貌唔係講就可以，而係應該喺父母身上學返嚟。