少年成長今日: 0|主題: 16109

收藏本版

發帖

返回列表

跳至頁

查看: 13666 | 回覆: 0

粗口教仔 [複製鏈接]

csir3290

子爵府

積分: 12562

1^#

發表於 22-11-20 11:05 |只看該作者 |倒序瀏覽 |打印

早幾日難得放假放平日，當然去接佢兩姊弟放學。去接細佬放學嘅時候，喺學校門口就啱啱見到學校一個主任喺度同個家長傾緊，應該都係同佢個仔嘅操行同學業有關，因為主任同個爸爸喺度傾嗰時個仔就垂頭喪氣咁企喺側邊。本來都冇乜留心，但係因為突然間喺學校入面聽到講粗口，仲要係個家長喺度講緊粗口，先至吸引到我望過去。原來就係個爸爸喺度不停講粗口咁鬧緊個仔，應該係個仔喺學校做錯嘢主任同個爸爸喺度傾緊嘅時候，個爸爸就一路聽一路講粗口鬧個仔，期間其實個主任都有啲尷尬，都有叫過爸爸冷靜啲唔好咁鬧個仔，但係個爸爸都仲係一路係咁鬧，最慘係望到個仔非常尷尬咁垂頭喪氣咁企咗喺度。個爸爸年紀都應該有番咁上下，一口流利嘅粗口一路聽老師講就一路喺度鬧仔。我唔知道個爸爸嘅心態係點，究竟咁樣鬧仔法係想話畀佢老師聽其實佢有教仔，定係因為個老師咁樣話個細路，爸爸覺得好冇面但係又唔可以鬧老師就將個情緒發洩咗喺個細路仔身上。但係我真係覺得咁樣鬧仔法，其實除咗發洩情緒之外究竟有乜嘢用呢？我同阿仔都冇繼續聽落去，跟住就一路行咗去攞車，點知正在想上車嘅時候嗰對父子就已經一路行住同一條路離開，我聽到個爸爸仲係沿路不停講緊粗口鬧緊個仔。個細路仔其實都算係咁，應該最少都五年班，一路畀個老豆用粗口鬧一路都只不過係垂低頭喺個爸爸側邊一路跟住，又冇話駁嘴亦都更加冇話自己走咗去先。

我明白有陣時細路仔做錯嘢教仔係會令到自己都好嬲，但係用呢啲落細路仔面嘅方法咁樣鬧法其實係咪真係有作用呢？除咗傷咗細路仔嘅自尊心之外，亦都嚴重破壞咗親子之間嘅關係。更加重要係我相信呢個細路仔將來講粗口嘅流利程度應該都會同佢爸爸差唔多，因為佢所有學講嘅粗口其實都係個爸爸學返嚟嘅。我唔係話細路仔做錯嘢我哋唔應該話佢，但係我哋都要諗下究竟係一個乜嘢場合同點樣去教細路仔，好似呢件事入面我見到嗰個細路仔都應該起碼四五年班，你咁樣鬧法仲要喺啲公眾地方其實唯一嘅效果只不過令到個細路仔覺得冇面。咁鬧法你以為教緊佢，但其實只不過係將個細路仔越推越遠，當個細路仔越嚟越大，當佢一開始駁嘴其實關係就已經唔可以再返轉頭。

我對仔女細個嘅時候都試過喺街度做錯嘢，但係我經常都會提醒自己一定唔可以喺個街度咁樣鬧仔。最重要係雖然佢哋做錯嘢，我哋係需要教佢，但係我哋亦都要顧全佢哋嘅自尊心。做錯嘢我哋就因應佢做錯嘅事給予相應嘅後果，落佢面同傷佢自尊心其實唔係令到佢唔再犯錯嘅方法，剩係鬧只會令細路仔越鬧越唔驚，只係落佢面只係令到佢越嚟越唔怕冇面，所以就算要教細路，就算係喺街都要帶埋一邊，要明確話畀佢知自己唔接受佢邊一個行為或者佢做錯啲乜嘢事，又或者即刻帶返屋企喺屋企先至慢慢教。潑婦罵街式嘅教仔對管教細路仔其實作用只不過微乎其微。好似上面講嗰個細路仔咁，俾咁多同學見到佢畀個爸爸咁樣用粗口鬧法，其實只會越嚟越削弱佢嘅自尊心同自信心，佢唔識尊重個仔，個仔到頭來亦都唔會尊重個爸爸。成件事唯一達到咗嘅目的就係個爸爸鬧咗畀個老師睇，等個老師知道佢有教仔，其他乜嘢作用都達唔到甚至乎只要有反效果。潑婦罵街式嘅教仔只不過係話畀人聽自己有教仔並唔係真正為咗教細路仔。教細路仔困難嘅地方就係在於佢做錯嘢時，你要教佢但又要顧全住佢嘅自尊心，同時亦都要今佢明白自己做錯啲咩嘢。總之好似上面嗰個細路仔咁，就算佢做錯啲乜嘢都好，都唔應該用呢個咁樣嘅方式去教。