少年成長今日: 3|主題: 16108

收藏本版

發帖

返回列表

跳至頁

查看: 14585 | 回覆: 1

一齊打機 [複製鏈接]

csir3290

子爵府

積分: 12550

1^#

發表於 22-5-1 10:41 |只看該作者 |倒序瀏覽 |打印

近排啱啱同仔女開始玩緊一個近期好多人玩嘅賽車遊戲「GT7」，每一次玩都玩得好開心。其實家長有用心機同佢哋一齊玩唔好淨係顧住自己玩，其實一樣可以樂在其中。我知道好多爸爸都好鍾意玩呢個遊戲，但係又有幾多家長會真係諗下同細路仔一齊玩呢！

而家好多時禮拜六日都會同佢哋玩，每次大約兩個鐘頭，同佢哋一齊玩呢個遊戲就成為我哋其中一個好重要嘅親子活動，因為呢個遊戲係玩嘅期間可以帶俾我哋好多嘅話題，亦都可以一齊諗下點樣令自己遊戲入面架車可以改裝得更靚同埋更快，我個仔就梗係發揮佢啲美術天份，點樣設計賽車服同埋架車，我個女就成日話用邊架車會跑得快啲，又可以一齊賺下錢再研究下買乜嘢車先至好。其實細路仔對呢啲嘢真係可以好快上手。透過遊戲仲可以睇到佢哋嘅恆心，為咗要達成目標，同一場比賽或者同一個測試可以做好多次。記得有一日，嗰晚要同細佬去打針，之前我哋三個都喺度玩緊呢個遊戲亦都有一關過極都過唔到，我同細佬出門口前同家姐講叫佢幫我哋手過咗嗰關，但係亦都同家姐講話玩多半個鐘頭就要完。點知當我哋等緊打針嘅時候，家姐就已經whatsapp我哋話幫我哋完成咗嗰關仲好開心添，因為佢試咗二十幾次終於成功咗所以好有成功感。嗰晚返到去家姐真係好自律咁已經自己熄機，玩完之後仲識得自己攞本書睇下，直至到我哋返到屋企。除咗讚佢之外亦都欣賞佢嘅恆心幫我哋完成咗一個咁難嘅關卡。睇得出佢好有成功感亦都好自豪，因為講到今時今日佢都仲講緊自己點樣幫我哋過度過關。

其實玩遊戲機真係可以拉近同仔女嘅距離，亦都可以令到同仔女嘅話題更加多，更加唔會令到仔女覺得家長跟唔上時代。不過陪仔女玩遊戲機呢個責任通常都會落喺爸爸身上，所以作為爸爸嘅更加要自律，更加要做好榜樣，亦都要自細就養成佢哋等佢哋知道部遊戲機係一定要爸爸同意先至可以開，控制權喺家長手上。同埋呢個應該係大家一齊嘅娛樂，並唔係佢哋一個人獨自嘅娛樂。自細養成呢啲習慣，佢哋沉迷嘅機會就會少好多。父母做個好榜樣，打機都可以增進大家感情的家庭活動！