少年成長今日: 0|主題: 16108

收藏本版

發帖

返回列表

跳至頁

查看: 15272 | 回覆: 2

過度照顧 [複製鏈接]

csir3290

子爵府

積分: 12552

1^#

發表於 21-8-1 10:53 |只看該作者 |倒序瀏覽 |打印

琴日終於都同家姐去打疫苗，雖然家姐自己話想打但係我老婆話佢到打嘅時候都係喺個姑娘面前喊。其實打之前嗰晚阿女都已經開始唔出聲臨瞓仲真係喊咁口。之後我同老婆傾開，我老婆話阿女其實都性格幾「港女」。我老婆話阿女上車嘅時候等人開門，行到去門口都唔會自己開門要等我哋開門畀佢。我話都係因為我哋照顧得佢哋太好，我老婆話一日都係我照顧得佢太好。

講開如果相比起而家好多嘅家長，其實當日阿仔阿女細個嘅時候我哋都唔算特別太照顧佢哋。早幾個禮拜前我老婆先至講開喺街行嘅時候見到個小朋友都四五歲仲坐住喺架bb車上面；又見過有家長湊一個小朋友又係大約四五歲，但係除咗父母之外仲要帶埋個工人一齊出街，三個大人就照顧一個細路。再誇張啲又見過一對父母帶兩個小朋友仲要帶兩個工人各自照顧一個。但係睇返自己嗰兩個，其實自細就已經係我哋兩公婆帶住佢兩個出街，好少會要工人跟埋一齊，佢兩個小朋友連bb車都冇，因為我總係覺得細細個開始就要訓練佢哋自己行，有bb車畀佢哋依賴，佢哋就會更加唔願行，所以佢兩個好細個都已經自己行好遠，亦都知道扭抱冇用，因為我同老婆都係拖住佢哋兩個自己行，好細個佢哋識行冇耐已經係自己行跟我哋去街，我哋連bb車都冇買，如果喺街到扭計或者扭攰就冇得出街，而出街前亦都會同佢哋講咗要自己行，如果唔想嘅或者覺得攰就唔好出，因為事先聲明，而且我哋經常會讚佢兩個可以自己行唔使人抱好叻，所以慢慢出街要自己行就成為佢哋嘅習慣。

成日都講而家呢一代實在照顧得太好，所以佢哋習慣咗俾人照顧，細細個開始所有人就係為咗照顧佢哋咁，所以習慣咗依賴，有啲乜嘢嘢開口就有人攞埋嚟有人幫佢哋做，自我中心就係咁訓練出嚟。4、5歲都仲坐住個bb車除非好特別原因啦，唔通行街真係咁攰咁需要休息同瞓覺。出街又工人又父母唔通小朋友真係咁難照顧。我對仔女3、4歲開始出街就已經習慣孭背囊，基本嘅嘢自己孭背囊，好似水呀毛巾同扇咁都係自己帶。自細開始已經適應咗，如果買咗佢哋嘅嘢通常都係自己拎返，所以而家佢兩姊弟都會好主動咁幫我哋拎嘢。

其實細路仔嘅自理能力係訓練出嚟，如果有得畀佢哋依賴佢哋就會依賴，所以我絕對唔能夠理解點解同細路仔出街要帶埋工人又帶埋bb車，一袋二袋個細路仔就好似皇帝咁喺前面行，啲大人就跟住喺後面，行到攰唔想行就上返架bb車度瞓喺度休息，對所有人都喺呼呼喝喝一啲禮貌都冇，稍為忟憎就全部人就曬佢。最慘係啲工人，真係畀啲細路仔當佢哋係奴隸咁，乜嘢都要照顧曬佢哋。

所以要訓練細路仔嘅自理能力第一件事唔好帶工人出街，第二件事要佢哋知道工人姐姐唔係佢哋嘅工人，其實係家庭嘅一份子，就算對住外傭姐姐都要有禮貌。細路仔係需要照顧但係唔係需要過度照顧，做家長真係需要反省下有冇過度照顧自己嘅仔女。