少年成長今日: 0|主題: 16108

收藏本版

發帖

返回列表

跳至頁

查看: 15295 | 回覆: 1

運動熱潮 [複製鏈接]

csir3290

子爵府

積分: 12554

1^#

發表於 21-8-22 11:13 |只看該作者 |倒序瀏覽 |打印

今屆奧運會香港成績咁好，由其係劍擊，所以有人預測呢一塊金牌會令香港學習劍擊帶嚟熱潮。預期好多家長都會畀自己個仔女去學劍擊，另外因為游水同羽毛球嘅成績都好好，亦都會令好多家長喺奧運之後畀仔女學游水同埋羽毛球。

喺香港好多家長嘅心目中其實學運動唔係真係因為鍾意嘅運動，而係因為學運動有個好主要功能就係報學校，i所以家長都好在意細路仔參加比賽同埋攞成績。要培養一個細路仔鍾意一個運動，其實真係好難而且都需要花好多心機，如果一開始玩運動就係因為希望佢可以攞獎或者參加好多比賽，其實細路仔到頭來反而會唔鍾意嗰項運動。自己都做過運動員，雖然唔係港隊咁勁，但係都叫做打咗十幾年波，所以都知道如果真係要打比賽其實係要好辛苦嘅練習，細個細路仔根本就唔會鍾意咁辛苦嘅練習方式。如果夾硬逼其實只會令到個細路仔越嚟越唔鍾意。如果要個細路仔自細開始就鍾意一項運動，其實培養興趣先係最緊要，對一個細路仔嚟講其實興趣就嚟自玩，如果玩得開心冇壓力，佢慢慢就會鍾意而且肯擺心機落去練習。

但係偏偏香港好多教練教運動，不論咩運動都好，其實都係偏重於辛苦，咁亦都唔能夠怪啲教練，因為好多家長嘅目標就係要睇到個細路仔要不停練習，如果覺得佢哋練習唔辛苦，就會覺得個教練冇教到嘢一樣，有得家長會在意到成日問教練究竟自己仔女幾時可以參加比賽。所以久而久之，係訓練入面教練都係偏向技術嘅練習，但係呢啲練習通常都係缺乏樂趣，都係比較刻板比較苦悶，細個咁樣練習其實好難會令到細路仔鍾意嗰種運動。但係相反如果家長平時都肯同細路仔去玩下嗰種運動，令到啲細路仔覺得其實練習之餘嗰種運動仲可以玩得好開心，慢慢佢先至會鍾意嗰種運動。偏偏有啲家長就以為將個細路交咗畀個教練，個細路自己就會鍾意咗嗰種運動，但係一個十歲樓下嘅細路仔連運動基礎同樂趣都未有，就叫佢開始好辛苦咁練，佢又點會鍾意嗰種運動呢！

所以要陪養個細路仔喺運動上面嘅成就，首先就要培養佢哋嘅興趣，只要有興趣佢哋先至能夠堅持，因為運動嘅練習都係一啲刻板又辛苦嘅練習。參與比賽最重要嘅目標，我覺得唔係攞獎反而係要細路仔透過喺比賽過程入面嘅得與失，學會堅持學會接受失敗，個人品格嘅成長比起比賽嘅成績更加重要。家長更加要避免利用比賽嘅成績嚟衡量細路仔學習運動嘅效果。運動唔係一個潮流，亦都唔好期望學習運動可以帶嚟一啲實質嘅利益。反而作為一個興趣慢慢培養，其實學習運動可以帶來好多意想不到嘅效果，對細路仔日後嘅發展同埋成長你都好有幫助。我同自己對仔女講，而家佢哋學游水學打波將來到佢哋自己有仔女嘅時候起碼可以多一樣嘢可以同佢哋一齊玩。

其實香港好多小朋友嘅運動興趣，就係畀自己係家長親手摧殘咗！