少年成長今日: 0|主題: 16108

收藏本版

發帖

返回列表

跳至頁

查看: 13634 | 回覆: 2

毛公仔 [複製鏈接]

csir3290

子爵府

積分: 12554

1^#

發表於 21-8-29 11:05 |只看該作者 |倒序瀏覽 |打印

其實一路都想同老婆放低對仔女兩個人去staycation，但係每一次話去住酒店之前阿仔阿女都話一定要跟埋嚟住。所以除咗間唔中同老婆兩個自己出去拍下拖之外，都未試過放低對仔女自己兩個出去過夜。點知早兩個星期食飯嘅時候傾開話不如去住返我哋結婚擺酒嗰間酒店，因為當年結婚嘅時候都冇住到。屋企嗰兩個小朋友好似冇乜反應咁，咁當然佢哋開頭又話一齊但係我都同佢哋講話嗰度冇乜嘢啱佢哋玩，咁講下講下佢哋兩個又好似冇乜所謂，所以終於上個星期就同老婆兩個自己去左staycation。

臨出發都冇乜嘢，兩姊弟仲喺屋企自己玩，仲同我哋講話要全晚睇電視添。咁我哋就出發啦，一路都好好地，夜晚仲同佢哋視像講電話添。到夜晚臨瞓傾電話都仲冇事，點知瞓瞓下家姐打嚟話細路喺度喊，家姐話可能佢掛住我哋，因為佢習慣咗每晚都要我同老婆分別入房同佢攬咗同kiss咗之後講埋goodnight先瞓，家姐開埋視像畀我哋睇細路喊到收唔到聲，終於嗰晚就要工人姨姨入去陪佢瞓，佢先至肯瞓。第二朝一早就打嚟問我哋幾時返。

都唔知話我哋一家嘅家庭關係太好定係阿仔太過需要安全感。之前講過阿仔細細個開始已經好需要安全感，成日都要黐住我哋兩公婆，以前細個嘅時候連夜晚瞓覺，都要我老婆陪到佢瞓著先至畀我老婆走，到小學先慢慢開始幫佢戒，但係都要我老婆陪佢起碼半個鐘，慢慢去到早兩年佢終於肯自己瞓唔使我老婆入去陪佢瞓，不過條件就係要買啲公仔畀佢擺側邊攬住瞓，佢話咁樣安全感大啲好似媽媽喺隔離咁。

講開公仔，其實我個仔都幾鍾意玩毛公仔，我諗佢毛公仔嘅數量大大話話冇100都有幾十，咁但係佢又唔係好女仔，連家姐都冇佢咁多呀！但其實除咗毛公仔之外，機械人呀或者其他玩具佢都鍾意玩，我哋又唔會特別介意話驚佢玩毛公仔會好似女仔咁，而且嗰陣時諗住啲毛公仔會令佢多一個精神同情感嘅寄託，到而家雖然嚟緊升五年班，但係佢都仲會同啲毛公仔傾下偈，當佢哋屋企人咁，夜晚差唔多半張床都畀啲毛公仔瞓，佢話咁樣瞓先至有安全感喎，真係俾佢激死。

可能有啲家長見到阿仔咁樣會擔心佢好女仔，其實我同老婆又冇咁諗，我哋覺得阿仔只不過係感情豐富，需要有一啲感情寄託，毛公仔有陣時就好似佢嘅伴咁陪佢一齊。細路仔有時都需要有啲地方去宣洩佢哋嘅感情，好似我個仔咁鍾意玩毛公仔，又或者好似嗰晚我哋去咗staycation佢臨瞓喊曬咁，我哋都冇話過佢，因為根本就唔係一啲錯嘅嘢。家長唔好介懷究竟係男仔定女仔，冇話男仔就唔可以感情豐富，有陣時勉強佢哋有改變反而仲會適得其反。