少年成長今日: 1|主題: 16010

收藏本版

回覆發帖

返回列表

跳至頁

查看: 26914 | 回覆: 1

為難了教練 [複製鏈接]

csir3290

子爵府

積分: 11975

1^#

發表於 24-12-1 11:15 |只看該作者 |倒序瀏覽 |打印

之前提過我啲教練朋友遇過嘅一啲無理家長事件，之前嗰個就係因為教練唔畀一個程度未達標嘅細路仔出場，因而被家長教師會召見解釋，因為教練冇畀佢落場嗰個細路仔嘅家長就係家長教師會嘅委員，佢覺得佢個仔學咗成年就應該要出場，但係教練冇畀到，最終就演變成為練緊波嘅期間畀老師叫咗上去解釋。早幾日又同另外一個教練傾開，佢都係喺度吐苦水，佢話佢教咗一間小學幾年，上個學年有場比賽，已經帶佢哋打到全港嘅總決賽爭冠軍，但係佢其中一個隊員喺比賽前熱身嘅期間喺度講粗口，教練就罰咗佢上半場唔可以出場，因為教練一路都同佢哋講球品有幾緊要，終於嗰場比賽佢教嗰間學校差一分輸咗比賽，只係攞到全港嘅亞軍。當時班家長已經質疑點解教練唔畀嗰個細路仔出場，因為佢哋覺得個細路仔打得幾好，唔畀佢出場可能係導致輸波嘅其中一個因素，再者嗰個細路仔嘅家長就更加大反應，因為佢哋覺得係教練令到佢個仔錯失咗攞冠軍嘅機會。教練話其實班家長同埋學校之前都仲好好地，一路讚佢話佢帶到隊波由學界冇成績，去到而家可以爭全港冠軍，但係點知呢場波之後，就態度大逆轉，又係需要佢去啲所謂家長教師會度解釋，點解冇派過細路仔出場，教練已經一再解釋其實教小朋友波，唔單止教技術仲要教球品教品德，況且個細路仔講粗口仲要講到其他人都聽到，其實都只係罰咗佢半場冇得打，但係班家長都係唔同意教練嘅做法，覺得如果唔係因為呢個決定就唔會輸咗場波。教練話雖然之後好似冇乜嘢咁，但係點知去到新學年續合約嘅時候，學校就以請咗個收費較為平嘅教練為理由，冇再同我呢個朋友續約。我朋友話其實個體育老師同佢合作咗好多年都覺得唔好意思，私底下都同佢講，其實唔續約最主要嘅原因就係因為輸咗嗰場波，同埋班家長唔滿意佢嘅決定而導致到輸咗場波，佢哋覺得如果唔係我呢個朋友當時唔畀嗰個細路仔出場，其實佢哋已經係全港冠軍。我朋友無可奈何都要接受呢個決定，但係教咗呢隊波幾年，睇住佢哋由冇乜成績教到佢哋全港第二，正所謂無功都有勞，我朋友話齋，一路帶佢哋上嚟同班家長嘅相處都好好哋，班家長一路睇住佢哋有成績仲成日讚教練教得好，但係因為係呢個重要場合，因為要教細路仔唔好講粗口，最終導致連波都冇得教。我朋友話齋，就算攞唔到冠軍都已經係全港亞軍，仲想點呢！就算班家長同學校平時講到贏輸唔係最重要，但又係去到緊張關頭，原來冇嘢比贏更加緊要！嗰個講粗口嘅細路仔嘅家長，唔係去幫手教個細路仔唔好講粗口，反而係教緊個細路仔贏先至係最緊要，因為佢哋已經冇再提佢做乜要講粗口。成件事嘅重點只係變成因為教練嘅決定而冇咗個冠軍。我朋友都話其實再教落去都可能冇乜意思，因為其他球員望住呢件事嘅發展可能都已經唔再信教練嗰套。

真係有啲家長就係咁，口入面講到話細路仔參加體育活動最緊要係有益身心培養興趣，原來呢個目的只係適用於啲細路仔水平未夠，未去到攞獎嗰個境界，先至話攞獎唔係最緊要最緊要係培養興趣，攞嚟安慰自己。但係一去到攞獎嘅水平就乜嘢都係假最緊要贏，有部分家長嘅心態就係咁，無論參加乜嘢課外活動都最緊要係攞獎攞證書，除此之外其他都係次要，我唔知道呢啲家長係咪大多數，但係起碼由香港教練教細路仔嘅方法，點解要咁催逼，有陣時令到啲細路仔練習只係覺得辛苦而唔係享受嗰種運動嘅樂趣，就知道教練最重要需要應付嘅係一班要求乜嘢嘅家長。喺我朋友嘅呢一件事上面，佢作為一個教練，佢自己都反思究竟係教球品重要定係攞獎重要，佢話平時已經同細路講唔可以講粗口，如果犯規就會罰冇得落場，教練平時一向都係咁做，如果因為冠軍賽而破壞呢個規矩，咁佢自己都覺得佢教緊啲乜嘢價值觀畀佢啲球員呢？佢話當時其實佢個心都有啲掙扎，但係最終佢都覺得品格同守規係緊要過攞獎先至做咗呢個決定，佢以為學校同班家長嘅諗法都係同佢一樣，但係原來平時口口聲聲話要點樣教好自己仔女嘅家長，去到最後佢先發覺原來攞獎先至係最緊要。作為朋友其實我只係聽下佢呻吓。其實我係非常支持佢，因為我非常認同尤其是喺細路仔發展嘅階段，你教佢品格其實仲要個幫佢攞獎，攞唔攞到獎可能只係一時，但係品格就影響佢嘅一生。希望講一套同教另外一套嘅家長喺我哋嘅社會入面只係佔少數吧！能夠教到球技同埋幫到攞獎，好多教練都能夠做到，但係能夠幫你教埋仔女品德嘅教練，係咪應該更加受到重視呢！