少年成長今日: 1|主題: 16017

收藏本版

回覆發帖

返回列表

跳至頁

查看: 17079 | 回覆: 0

長老 [複製鏈接]

csir3290

子爵府

積分: 12040

1^#

發表於 25-2-2 13:14 |只看該作者 |倒序瀏覽 |打印

講到教細路，成日都話兩公婆嘅標準同埋教法要一致，千祈唔好一個緊一個鬆，或者喺細路仔面前標準不一，甚至一個教緊細路嘅時候，另外一個喺細路仔面前就持相反意見，最終細路仔就最知道走呢啲灰色地帶。

但係原來除咗兩公婆之外，凡有份參與教細路仔嘅人，其實個標準都應該要一致。好多家長最開心就係有所謂「長老」幫手湊仔，其實有陣時老人家幫手湊細路，反而最容易出現同家長嘅教法唔一致嘅情況。我明白香港好多家庭父母都忙於工作，如果有老人家幫手帶下啲細路仔，其實真係可以減輕好多負擔，但係有陣時喺老人家嘅概念入面「孫係愛嚟錫嘅」，仔女先至係攞嚟教嘅，所以普遍都會較為愛錫啲孫仔孫女，乜嘢都要就佢哋，但係正正就係呢啲心態，有陣時就好影響父母教自己仔女。尤其是如果細路仔大部分時間都係跟老人家，到父母要接手嘅時候，有陣時就會顯得較為困難。

我前兩日食晏嘅時候就目擊呢個情況，隔離枱有兩個細路仔應該三四歲，阿媽同埋應該係細路仔嘅阿嫲一齊帶住呢兩個細路仔食飯，嗰兩個細路仔就一路喺度扭計，呢樣又話唔食嗰樣又話唔食，其實個媽媽都有將啲食物剪細先至畀兩個細路仔食，但係個老人家就一路話緊個阿媽，叫佢再剪細啲，其實個媽媽都講得啱，剪得太碎根本啲細路仔就唔會用口去咬，但係個老人家就不停喺度「哦」個阿媽，叫佢再剪碎啲。到個細路仔扭計唔食嘢，又話唔鍾意食牛肉，其實個媽媽都好耐性教緊個細路仔，只不過係同個細路仔講話如果你而家唔食，咁一陣間肚餓都唔會再買其他嘢食，亦都教緊兩個細路仔唔可以揀飲擇食，但係當個阿媽教緊嘅時候，個老人家又是喺側邊不停出聲，又係話佢哋唔鍾意食就由得佢，唔好逼佢哋，個老人家仲跟住話出去買其他嘢畀佢哋食，喺呢個情況我見到個阿媽都好似好無奈，但係最後都忍唔住出聲同個老人家講，話咁樣做會搞到佢哋揀飲擇食，而嗰兩個細路就見到個老人家撐佢哋就更加喺度扭計，佢哋扭計個阿媽又想教，但係個老人家又係側邊出聲，總之最後就係嘈喧巴閉。我食完飯就走咗冇再睇落去，唔知道最後結果係點。

其實老人家肯幫手湊細路仔，其實真係減輕咗父母好多負擔，但係有陣時有啲嘢真係要講清楚，或者大家要知道個標準係點樣。好似上面我所講嘅例子咁，好明顯細路仔就梗係因為有老人家撐腰，就唔聽阿媽講。所以老人家亦都要明白其實教細路嘅主導權應該喺父母度，縱使佢哋未必同意作為父母嘅教法，但係亦都唔應該係啲細路仔面前公然同啲父母唱反調，大家有唔同意見絕對冇問題，但係大家就應該喺細路仔唔在場嘅情況之下好好地去商量點樣教。我自己都明白有老人家幫手睇吓細路仔嘅重要性，好似我同老婆結婚嘅時候，就已經刻意搬近外父外母住，因為我哋明白細路仔突然間有啲咩事嘅時候，如果老人家住得近係真係可以即時幫到手，亦都減輕咗我哋嘅負擔，到而家我都覺得當時好彩同我外父外母住得近，亦都好感激佢哋嘅幫手。但係教細路仔始終都係我同老婆嘅責任，所以我老婆有陣時為咗湊細路嘅情況都會同外父外母商量。所以有老人家幫手湊細路仔係好，但係老人家都要明白千祈唔好影響咗父母教細路仔嘅標準同埋手法，當大家有唔一致嘅時候，最緊要大家係傾得清清楚楚，千祈唔好父母一套老人家又另外一套，咁最終都係苦咗個父母。