少年成長今日: 2|主題: 16008

收藏本版

回覆發帖

返回列表

跳至頁

查看: 17400 | 回覆: 1

家長日 [複製鏈接]

csir3290

子爵府

積分: 11960

1^#

發表於 25-3-2 12:12 |只看該作者 |倒序瀏覽 |打印

剛剛過去嘅星期六，阿仔阿女一齊家長日，去到學校同老師講下佢哋讀書嘅情況。講真其實阿仔阿女平時點樣讀書，作為家長嘅自己其實大約都心中有數，而且每次派完卷返嚟，阿仔阿女都會同我哋講大約嘅成績，所以對佢哋讀書嘅情況，其實都有一定程度的了解。去到同老師最主要都係了解下佢哋喺學校上堂嘅情況，尤其是阿女都已經中四，老師就更加著緊佢哋考dse，所以去到都係聽下老師嘅意見，睇下仲有啲乜嘢可以改進嘅地方。

呢兩個星期其實都係啲學校熱門家長日嘅時間，我身邊有啲朋友，唔係呢個禮拜就係上個禮拜或者係下一個禮拜家長日。講真有啲家長可能真係唔知用乜嘢心情去面對家長日。我自己都親眼見過見家長嘅時候，個家長喺個老師面前勁鬧個細路仔，甚至乎鬧到離開咗個班房都繼續鬧緊，乖啲嘅細路仔就繼續耷低頭畀家長鬧，我都見過有啲一出咗班房門口就急步離開，費事再畀家長一路行一路話，搞到好冇面。另外喺家長日亦都好容易會知道究竟家長同細路仔日常嘅關係係點，一齊有傾有講咁行入學校門口，抑或各有各行說話都唔多句，更加見過有啲細路，一路行就怕家長講嘅說話或者做嘅行為會令佢哋冇面，好怕畀啲同學見到。

講真作為家長，其實對仔女日常嘅成績應該大約都心中有數，要鬧亦都唔係喺老師面前先至鬧。講真咁樣鬧法只不過係令個仔女更加冇面，更加閂埋隻耳仔唔想聽你講任何嘢，最好盡快離開。作為家長如果去到家長日先至知道自己嘅仔女成績，其實都應該要檢討下日常點樣同仔女相處。講真世界係好少奇蹟發生，日常都見唔到仔女溫習，亦都冇方法去幫佢哋去溫習嘅時候，去到家長日攞成績表其實都大約心中有數。講真成績都已經唔好，如果喺嗰個時間先至再落井下石，喺老師面前或者喺其他人面前再鬧，只不過令到大家嘅關係更加差。好似我對仔女咁，都已經讀到中學，其實佢哋平時嘅讀書方法都已經成曬型，作為家長根本就知道佢哋平時有冇溫書，所以去見老師嘅時候，其實都應該以平常心去面對，最主要係要聽下老師嘅意見睇下點樣改善。我發覺有陣時有啲家長鬧仔，只不過係鬧畀老師睇，證明自己平時有管教嘅細路，唔想自己咁冇面，因為仔女成績已經唔好，更加唔想畀人知道自己平時冇乜點樣理會仔女嘅成績，所以就更加喺老師面前鬧畀啲老師睇。另外一個極端就係樣樣都唔認同，覺得老師講錯，搵藉口搵理由為自己仔女做得唔好嘅地方開脫。其實所有呢啲嘅態度都唔能夠令到仔女喺成績同態度上有啲乜嘢可以改善。

面對家長日，作為家長真係應該用平常心，去聽下老師嘅意見，了解下有啲乜嘢方法可以幫仔女做得更好，如果當場可能真係唔係好接受到仔女成績差嘅話，記住深呼吸唔好發脾氣住，畀自己冷靜下沉澱一下，諗下點樣同仔女去傾，唔好即刻去指責，我成日都講人係有防衛機制㗎，你即時咁去鬧，只不過會令仔女即刻閂埋隻耳仔甚之乎鬧返轉頭，咁樣對大家都唔好。反而應該畀大家都冷靜一下，大家都諗一下，然之後返到屋企先至慢慢心平氣和去聽下大家嘅諗法，再去了解下老師嘅意見，然之後大家傾一個可以改善嘅方法，如果去到高班就真係應該開心見誠去傾下大家對前途嘅睇法，只有咁樣先令到令到家長日變得有意義。如果唔係，見完老師只係鬧下，鬧完又再冇改善又再冇傾過嘅話，咁其實家長日就變成可又可無。如果係咁不如就由仔女自己拎成績表返屋企畀個家長睇又有乜分別呢。我自己就覺得家長日除咗係拎成績表之外，其實亦都係一個好好嘅藉口等自己可以同仔女好好地傾下對成績同埋對前途嘅睇法。一年只係得一次或者兩次嘅家長日，作為家長嘅就應該好好利用呢兩個日子，聽下人哋嘅意見再去諗方法幫自己嘅仔女。