少年成長今日: 1|主題: 16109

收藏本版

發帖

返回列表

跳至頁

查看: 2808 | 回覆: 0

疫情下的開學 [複製鏈接]

csir3290

子爵府

積分: 12560

1^#

發表於 20-9-6 11:02 |只看該作者 |倒序瀏覽 |打印

啱啱已經開咗學一星期，今年嘅開學真係不一樣的開學，阿仔阿女朝頭早起身換好校服然之後，竟然係坐喺個廳度對住部電腦行開學禮。幸好就算我同老婆番晒工只係佢哋對住部電腦，但係都好認真。另外，為咗應付佢哋今年嘅開學，除咗一般嘅書簿費之外仲要額外每人買多咗部電腦畀佢哋預備上網課。政府派嗰一萬就咁用晒啦！

經過今次疫情，其實都證明到實體學校真係好緊要，無論電子設備點樣先進都唔能夠代替親身返學。兩姊弟雖然都好緊張。每一次上網課之前都做好曬準備，但係總會失驚無神個電腦就會出現問題。好似早兩日家姐上上吓網課傳訊息畀我話個電腦忽然冇曬聲，嗰刻其實都唔知點樣可以幫到佢，我同老婆都返曬工屋企個工人姐姐又唔識搞。幸好屋企都仲有部平板，家姐終於自己搞左一輪先至勉強上到。除咗設備問題之外其實網課亦都好講細路仔係唔係自律。聽到有啲親戚朋友講佢啲仔女成日都瞓到唔知醒，又或者要學校打曬電話嚟追功課。但係家長又返曬工，只係靠工人姐姐睇住根本就鞭長莫及。所以形式上係上咗堂但係根本達唔到理想嘅效果。

除咗要學生自律之外，我喺網上睇到家長講，有陣時又覺得有啲學校其實都幾唔實際，中學生每日要上六個鐘頭網課都算啦，可能細路仔年紀大啲可以做得到，但係連小學生甚至幼稚園有啲都話要朝九晚四咁上網課就真係幾過份。我只能夠覺得呢啲學校係為做而做，做畀人哋睇學校好積極咁停課不停學，但係就冇考慮細路仔係咪真係能夠負擔到。我覺得我對仔女間小學都叫做好啲，一日都只係想三個鐘頭到嘅網課，不過我都擔心阿仔阿女成日對住個電腦螢幕今年再去驗眼可能近視又會再深啲。

其實成個疫情咁樣上堂法，正正就係考驗家長喺自己細路仔細個嘅時候有冇幫細路仔建立常規嘅習慣同自律嘅學習模式，我成日都覺得學習唔係淨係靠學校，反而家長嘅培養先更加重要。學校只係佢哋學習知識嘅地方，但係建立學習規律同埋培養學習興趣，好大程度就係靠家長喺小朋友細個時點樣去處理同埋幫佢哋去建立。所以經過今次疫情，如果家長都仲係只係依賴學校去幫細路仔建立學習規律同埋習慣嘅話，萬一再有任何呢啲情停課嘅情況發生最受影響嘅就係呢一批家長嘅仔女。我覺得經過今次疫情復課之後，學校入面學生嘅學習差異會更大，自律同勤力啲嗰批嘅成績會再抛離冇咁自律嗰批學生再遠啲。如果子女仲細，經過今次真係要計劃吓點樣培養佢哋嘅學習習慣先得。