原因:
我4X歲, 身材偏胖, 剛剛喺7月頭入St. Teresa做全子宮切除手術。我經期一向好準, 不過每次黎經都會有唔同嘅唔舒服, 例如肚痛、頭痛、背脊骨痛、頭暈無力、出汗、有時無胃口、有時食量大,有時失眠、有時嗜睡, 每次都唔同,長期食經痛藥。
試過幾次喺街度痛到暈低,有一次仲送咗入醫院。
過去一年尿頻越黎越嚴重, 同朋友出街, 人地去一次廁所, 我就要去2-3次。試過夜晚瞓覺要去2次廁所。初時睇普通科醫生,照完超聲波同MRI後,發現子宮有3粒約6-8cm肌瘤同好多小肌瘤,建議我去睇婦科。今年2月左右, 我去太子睇黃樹邦醫生,佢初時比我感覺係唔多野講, 講野無乜語氣,初時驚驚地, 不過佢其實係好冷靜同細心,亦好有善意。佢同我照超聲波, 估計係肌瘤壓住膀胱引致尿頻。我攞住超聲波幅圖,根本睇唔明點解呢堆黑點就係某個意思。我嘅情況: 一係唔理佢等收經, 令個肌瘤自己慢慢收細，一係做全子宮切除咗佢, 咁以後就唔洗M痛,亦解決尿頻問題。由於我份工唔可以中途去洗手間, 而且尿頻越黎越嚴重, 又咁啱7月安排到放假,所以我決定7月做手術。
心理和身體準備:
我好鐘意小朋友, 不過因為某啲原因無小朋友。雖然知道自己就算保留子宮都未必生到, 不過喺決定做手術前都會有少少唔開心,亦好擔心手術係咪會成功,自己忍唔忍受到痛。我同老公坐低好認真咁傾過, 其實小朋友唔一定要自己生, 我地對自己嘅後輩好,當佢地係仔女都可以。事實上, 都有好多後輩有煩惱會搵我地。有一晚, 我心裏面默默咁感謝子宮喺我身體入面咁耐, 同佢講再見。
我本來無運動嘅習慣, 亦從未做過手術, 身體比較弱,都擔心自己復完能力。普通科醫生話我有機會糖尿前期,所以由決定做手術果日開始,我每日都會做GYM,鍛鍊體力,變得越黎越精神、有氣力,到後來一日唔做GYM覺得缺失咗啲野咁。
腸沾黏:
喺網上睇文, 好多人都話開肚後幾個月至十年內有幾會腸沾黏,有人仲會突然肚痛,日後再有手術會令醫生用多啲時間清除沾黏。如果想避免呢種情況,可以要求醫生做手術時用防沾黏貼用品。
以下係我入院前準備嘅物品, 比大家參考:
入院袋:
1. 身份證、保險醫療咭
2. 相關醫療報告
3. 八達通, 信用咭, 少量現金
4. 抽取式無酒精濕紙巾(抹身、抺汗用)
5. 無水洗頭噴霧
6. 抽取式衛生紙
7. 衛生巾（長身）(手術後會有少量分泌物)
8. 吸管（方便躺著喝水）
9. 口罩
10. 塑膠拖鞋（方便行走及防水為優先）
11. 保溫瓶（喝溫水）
12. 眼藥水或小包裝生理食鹽水（以防眼睛乾刺痛流淚, 我最後唔需要用）
13. 潤辱膏
14. 電話
15. 電話叉電器
16. 塑膠袋各尺寸數個 (以防嘔吐用,我最後唔需要用）
17. 眼鏡盒/眼鏡布
18. 連身闊裙、內衣、內褲(出院穿)
19. 白花膏 (以防嘔吐用,我最後唔需要用）
20. 圍巾 (保暖)
21. 行山竹(出院時用)
束腹帶由醫生安排, 不用自己帶。
聖德肋撒醫院喺入院時會送包包, 裏面有齊水杯、牙膏、牙刷、毛巾、白襪、沖涼液等。
住院日數:
預計第四日可出院。
第一天早上8時入院, 當日下午2時開刀。原本第三日情況OK可選擇出院,我自己想休息多一天,都要按原定計劃第四天中午出院。
費用及保險:
姑娘報價大約12-13萬, 最後埋單11萬多啲。
我老公公司有團體醫療保險, 而我自己有買有墊底費用($1XXXX)的自願醫保。
如果無公司醫保，只有自願醫保，正常只要比$1XXXX, 其他費用一蚊都唔洗比。即係自願醫保公司要賠十萬左右。
如果無自願醫保，只有公司醫保，公司醫保就賠償約$5XXXX, 自己要比$6XXXX。
由於我兩者都有,我喺手術前先同自願醫保公司講咁嘅情況。出院後先claim公司醫保$5XXXX, 餘下再由自願醫保找數, 結果我一蚊都唔洗比。自願醫保公司只係要賠約6萬左右,佢都有着數。
入院前禁食:
姑娘話入院前至少6小時唔可以飲水食野, 我見網上有人講8小時,所以我喺手術前8小時唔再飲食。自己本身大食,肚餓會出冷汗, 成個人會唔舒服。為免發生呢個情況, 我早一日買咗肉餅飯,朝早蒸熱食,食飯同肉無咁容易餓。朝早除咗水唔飲其他野,其他飲品易渇。果日2點一啲都唔餓,亦唔渇。
手術前檢查:
入院後好忙,要做一系列嘅野,包括心電圖、檢血糖、灌腸通便、除下體毛。
進入手術室:
成個過程我最怕就係入手術室果吓。喺推入手術室張床至到入手術室, 中間有多名醫護人員問我同病相關嘅資料,佢地語氣態度都好好,令我無咁驚。上網見啲人話要插喉,令佢地做完手術好想咳同失聲。原來我呢個手術係唔需要插喉,所以無呢個問題。入到去種豆,唔太痛,只係有少少緊張。
黃醫生同我講咗幾句, 記得佢把聲令我覺得好安心, 然後我就瞓着咗。醒返已經做完手術,喺半夢半醒咁就喺自己張床,插咗尿喉。
手術後:
第一日醒返果刻係有痛, 就好似經痛最痛時果種痛, 痛咗一陣。姑娘比咗止痛藥我食之後無再痛,期間我不斷休息、斷片。成晚不斷有姑娘入黎量血壓,睇我嘅情況。
第二日仍然唔想食野, 飲咗粥水, 排咗氣, 開始有返少少力, 仍然落唔到床。拆咗尿喉,仍然係瞓,甩左十幾條頭髮。姑娘會鼓勵我轉身同落床行吓,果陣真係未有力行落床。
第三日突然好精神, 身體嘅回復力突然增強。食到通粉, 大便輕瀉,小便正常。我係一個唔想麻煩別人嘅人,自己慢慢咁行去廁所,姑娘見我咁即刻扶我去廁所,叫我之後要去要叫佢地扶。黃醫生見我咁精神,問我想唔想出院。我想保險啲,都係住多一晚。
第四日早上已經可以準備出院, 黃醫生幫我無痛拆線, 喺疤痕上貼防水貼,返屋企可以照常沖涼。黃醫生開咗一個半月假比我, 其實我自己freelance, 唔開假紙都得,好奇想知通常開幾耐, 於事話要假紙。臨走前有位甜美可愛嘅實習姑娘黎同我傾偈講再見,原來佢都係果日最後一日喺果間醫院實習,之後就要轉醫院。我覺得呢間醫院嘅醫護、姨姨都好好,好專業,環境亦清爽乾淨,只係張床實在唔好瞓。辦手續離開嘅時候,見到一班姑娘好勤力好忙咁,我都唔多講野,快快手簽名唔阻佢地。老公接我出院果日咁啱痛風發作,辛苦佢忍痛接我出院。最後我地call車離開,順利回家休養。
休養及調理:
回家後仍然有好多野唔做得, 頭幾天真係少走動好啲, 唔好攞重野。 煮唔到飯,靠老公買肉餅飯比我食。我無進補,靠食新鮮蔬果、飲水、食蒸飯,休息充足去渡過頭2星期。日日都要用醫生比嘅束腹帶, 有時打噴嚏佢可以保護傷口。
我係一個好反瞓嘅人, 唔可以瞓床邊位置,一定會跌落床,但係要我爬去入面又有難度。咁我會瞓喺床邊,然後連枕頭慢慢成個人跣入去。
第二朝由床上坐起身以及企起身果吓係最辛苦。首先用手支撐坐起, 等30秒左右,再慢慢扶住啲野企起身,感覺傷口有少少拉扯。後來發現第二步扶住嘅野係老公肩膀係最好,佢動作要好慢,咁我就一啲都無拉扯嘅感覺,同時又可以順便抱抱,嗲吓佢咁。手術後一星期可以好慢、少少彎腰咁行, 去咗黃醫生度覆診, 佢幫我換膠布,一啲都唔痛。佢比咗疤痕膏我,叫我一個月後再覆診就可以了。
我上星期覆咗診, 佢話已經無事,唔需要再覆診了。依家大約手術後個半月,我嘅尿頻已經消失咗,可以如常咁生活。果條打橫嘅疤痕好幼好淡色, 手勢都唔錯, 繼續塗完支疤痕膏應該會再好啲。老公話好似我肚腩仔本身啲接痕,一啲都唔覺係手術疤痕。
發表於 
返回列表
