少年成長今日: 2|主題: 16008

收藏本版

回覆發帖

返回列表

跳至頁

查看: 22233 | 回覆: 0

代出頭 [複製鏈接]

csir3290

子爵府

積分: 11958

1^#

發表於 24-10-6 10:02 |只看該作者 |倒序瀏覽 |打印

琴日聽緊收音機，有人請節目主持人幫手幫手分析，佢嘅問題係佢公司有個啱啱新請嘅下屬，成日就覺得公司嘅人對佢唔好，做嘢又成日做錯，但係有一日呢個下屬嘅阿媽就打畀呢個人，竟然係投訴公司嘅同事對佢個仔唔好，又話公司應該畀多啲機會佢個仔，呢個上司覺得好煩惱，除咗要教個下屬之外，仲要應付埋佢阿媽，問主持人係咪應該炒咗個下屬。當然啲主持人都話應該仲盡快炒咗架下屬，因為炒咗佢最多都只係再面對嗰個下屬嘅阿媽一次。而且撇開呢個下屬嘅工作能力，如果再繼續留低佢喺度做嘢，可能仲要沒完沒了咁同佢阿媽打交道，教埋佢阿媽做人。呢個情況我公司以前都遇過，又係個同事嘅工作態度麻麻地，做嘢亦都經常有問題，本來大家都諗住佢係新人有啲容忍，但係點知呢個同事連請病假都係阿媽打電話返嚟公司同佢請，到最後公司都係打算都係炒咗呢個同事嘅時候，可能呢個同事都感覺到啲鑊味，所以忽然有一朝早呢個同事帶埋佢阿媽一齊返公司見老細，我哋後來得知原來呢個同事嘅阿媽係做律師嘅，佢想嚟同老細講希望唔好用炒佢嘅方式，因為驚咁樣會影響佢以後嘅履歷，所以就同老細講數，希望公司可以畀佢當為自動辭職，而且可以寫返封好啲嘅推薦信畀佢。老細為咗怕麻煩而且佢又肯即刻辭職，仲唔使補錢所以最後都同呢個阿媽講掂咗數，畀佢自己交辭職信即日生效。

去到廿幾歲人都仲要家長出面幫佢解決問題，其實講到最尾都係家長自己一手造成。當然可能有啲家長都仲樂在其中，因為可以幫仔女解決問題事事代為出手，覺得仔女非常之倚靠自己。好明顯呢類家長自細就係樣樣都幫自己嘅仔女解決曬所有問題，個心態可能係驚仔女蝕底，又或者乜都幫仔女解決嘅話可以慳返好多時間，慳返好多功夫唔使教。但係培養出嚟嘅就係啲公主同王子，冇乜自理能力，乜嘢都唔識解決樣樣都要搵阿爸阿媽去決定。講真你今次幫佢解決咗問題，但係廿幾歲人，其他人會點睇佢呢，而且你係咪可以一世幫佢解決曬所有問題呢？當你唔喺度嘅時候，佢遇到問題如果冇人幫佢解決咁又點算好呢？到時可能佢只係揀逃避唔肯去正視，到最後受害嘅究竟係家長定係佢嘅仔女，定係大家都受害呢！

所以我成日都覺得隨著仔女年紀一路長大，就要開始訓練佢哋獨立，盡量畀多啲機會佢哋自己做決定，同時要學習自己去面對同埋解決問題，家長嘅角色亦應該慢慢轉變，盡量退居幕後，只係提供意見。但係都要畀仔女學習自己去處理同埋解決。例如去到仔女讀中學時候，遇到同朋友相處嘅問題，如果都都仲係要家長出手，咁可能佢永遠都唔識得點樣同人相處，永遠都冇機會學習處理人際關係。可能有啲家長會覺得幫仔女解決問題係天經地義，咁做只係唔想佢哋受傷害，同埋經歷失敗。但係人始終需要成長，而且失敗亦都係必經嘅，只要從細個開始慢慢畀佢經歷一啲受控嘅失敗或者挫折，從中鼓勵幫佢哋建立自信，最終反而佢哋就會學懂點樣獨立解決自己嘅問題。雖然我哋都好愛錫自己嘅仔女，但係千祈唔好為咗擔心佢哋會經歷失敗同挫折，而避開呢一啲畀佢哋能夠學習成長嘅機會，每一個挫折或者失敗只要家長能夠喺身邊給予支持，從中學習，最終都會成為寶貴嘅經驗。