少年成長今日: 0|主題: 16008

收藏本版

回覆發帖

返回列表

跳至頁

查看: 27542 | 回覆: 1

考試！乜都唔可以玩！ [複製鏈接]

csir3290

子爵府

積分: 11964

1^#

發表於 24-10-13 11:28 |只看該作者 |倒序瀏覽 |打印

近排喺睇到有個中六學生將佢學校嘅通告擺咗上去社交平台，原因係佢好唔滿意學校因為想佢哋專心考好文憑試，所以佢就停曬中六級佢哋所有課外活動，就連佢練咗好耐嘅學界比賽都唔準參加。件事就喺網上引起一陣嘅討論，究竟學校係咪過份緊張，連學生參加課外活動嘅機會都剝削埋。

如果你問我，我都會反對學校嘅做法，但係其實學校嘅呢個做法偏偏亦符合咗好多家長嘅意願，代替咗家長做醜人呢個角色，所以應該會幾受部分家長歡迎。因為有啲家長總係會覺得，如果要專心讀書，當然就要停曬所有嘅活動。而家由學校出面，老實講有啲家長應該會舉腳贊成。

我之前都曾經幫過個朋友一齊教啲細路仔打波，每到考試前啲細路仔就會請假，最誇張嘅考試前一個月就已經話要請假開始溫習。有陣時我都不禁會問一個禮拜只係打一次嘅波，而每次都只係兩個鐘頭，係咪真係咁影響溫習，或者咁需要呢兩個鐘頭嘅時間嚟溫習呢？又或者係咪只係形式上面覺得需要畀個細路仔知道考試，所以就要幫佢請假溫習呢？如果因為參加課外活動而搞到冇時間溫書，咁會唔會其實係家長幫啲細路仔報得太多唔同嘅興趣班，令佢仲忙過番工先至冇時間溫習呢！

課外活動其實係令到細路仔可以釋放壓力嘅一個好方法，每個禮拜打下波，彈下琴或者做下其他課外活動，可以調劑一下心情之餘，其實亦都可以令到溫習更有效率。成日話唔好畀咁多壓力細路仔，但係正正就係為咗考試而取消曬所有嘅課外活動，要專心溫習，其實講真咪又係話畀啲細路仔聽考試有幾大壓力囉！

另一方面普遍家長都希望為仔女成績唔好搵到原因，其中最容易搵到嘅咪自然係賴落去啲課外活動或者其他讀書意外嘅活動身上，所以一發覺細路仔讀書成績唔好，第一件事就係停曬佢所有課外活動，令佢連玩同放鬆心情嘅時間都冇埋。講真，真係唔打波其實嗰個零兩個鐘頭係咪真係攞咗嚟讀書先，好多時你以為停曬佢啲課外活動，其實咪又係只不過喺屋企玩手機，都頭來係咪真係攞咗嚟溫書呢？如果細路仔長期成績都係麻麻地，絕對唔會因為參與咗啲乜嘢課外活動而令到佢成績更差，相反話唔定嗰樣佢鍾意嘅課外活動可以發掘佢另外一方面嘅能力添！家長普遍都唔會將細路仔成績唔好嘅原因歸咎於自己身上，所以最容易就係將個原因歸咎落去佢花得太多時間喺其他活動上面。但係試問細路仔嘅讀書習慣係由邊個幫佢養成呢！

如果當發現就算取消曬啲課外活動，佢都係成績冇乜進步，咁又可以點做呢？而且連細路仔可以發揮自己或者做自己鍾意做嘅嘢嘅時間都冇埋，最終仲破壞埋親子之間嘅關係！講真好似我個女而家中四，所有佢參加嘅課外活動都係佢鍾意嘅，包括而家學緊長笛彈緊琴，仲有打羽毛球，其實只要佢自己時間控制得好，我同老婆完全冇打算干涉佢參與呢啲課外活動，就算去到文憑試都好，除非佢自己覺得需要搵多啲時間嚟讀書佢自己提出，就算係我都會叫佢諗清楚，講真除咗讀書之外，我覺得玩下自己鍾意玩嘅嘢，其實真係可以調劑心情，釋放壓力令讀書嘅時候更加有效率。千祈唔好以為要佢專心溫習就取消曬佢所有活動，唔畀佢參加任何比賽等等，就可以令到佢更專心同更多時間溫習，其實效果可能只會適得其反，而且只係成年人一廂情願嘅諗法。