少年成長今日: 0|主題: 16008

收藏本版

回覆發帖

返回列表

跳至頁

查看: 22340 | 回覆: 0

教仔無小事 [複製鏈接]

csir3290

子爵府

積分: 11956

1^#

發表於 24-10-20 11:55 |只看該作者 |倒序瀏覽 |打印

上星期同阿仔阿女去參加佢哋嘅音樂會，其實都唔係啲乜嘢嘅音樂會，只不過係佢哋嘅鋼琴老師定期都會幫佢嘅學生舉辦嘅演奏會，希望佢哋吸收多啲表演嘅經驗，亦都有多啲自信唔怕喺人哋面前表演。所以其實阿仔阿女學咗琴咁多年，佢哋都已經唔係第一次參加呢類嘅音樂會，只不過今次個規模再大型少少，仲要買門券先至可以入去睇。

一如過往嘅音樂會一樣，都會有好多家長特登去睇自己嘅仔女表演，我自己就覺得呢類音樂會，除咗畀細路仔多啲演奏嘅經驗之外，其實亦都係鋼琴老師對家長嘅一個交代，起碼就算未考到鋼琴試嘅都畀家長見到自己嘅仔女學琴學成點，所以音樂會嘅參加者年齡都好參差，有彈得好好比較大個嘅青年人，亦都有啱啱學冇耐，年紀相對比較細嘅小朋友。咁音樂會入面自自然然家長都好緊張幫自己嘅仔女拍片同影相啦！鋼琴老師仲好照顧週到，已經搵咗一個最靚嘅位置預備當每一個小朋友表演嘅時候，佢嘅家長就可以上到嚟嗰個位置等佢哋可以喺最好嘅位置影相同拍片。因為係鋼琴老師學生嘅演奏會，所以其實唔係好多外人參與，絕大部分都係學生嘅家長。但係正正就因為係家長多，所以我發現咗一個好有趣嘅現象。就係大家當然會好留心睇自己嘅仔女表演，同埋拍片影相，但係一到其他人表演嘅時候，我就見到好多家長喺度玩手機啦，甚至乎恰緊眼瞓都有。我自己就覺得既然話曬都係一個音樂會，其實係咪都應該要尊重下其他表演嘅學生呢！雖然唔係啲乜嘢大型嘅音樂會，但係其他學生都係喺度表演緊，係音樂會上面玩手機做其他嘢甚至恰眼瞓，其實係咪唔係咁尊重表演嘅場合同埋其他表演嘅參加者呢！當自己嘅仔女見到父母除咗專心幫自己拍片影相之外，到其他表演者表演嘅時候就係喺度玩手機或者恰眼瞓，咁佢哋嘅仔女又會學到一個乜嘢態度呢！其實呢一啲睇起上嚟好似好細微細眼嘅嘢，其實正正就要家長身教！簡單如好似今次表演要懂得尊重其他表演者，咁去到戲院睇戲嘅時候熄電話，唔好講嘢等等，呢啲所謂細微細眼嘅態度其實都係需要家長身教。細路仔見到原來就算音樂會，家長都可以玩手機或者恰眼瞓，當佢哋第時真係有機會去欣賞一啲大型音樂會或者表演嘅時候，佢哋會唔會懂得去尊重其他參與表演嘅人呢！如果到時佢哋學家長咁又玩手機恰眼瞓甚或者喺度傾計，咁隔離嘅人會點睇呢啲小朋友呢！

可能有家長會覺得呢啲又係啲雞毛算皮嘅嘢，可能又係我吹毛求疵，但係我正正就係想講其實喺教養小朋友上面，尤嘅係培養佢哋嘅品德，根本就係要由最小處開始，我哋越係唔注意嘅嘢，但係日積月累一點一滴，其實就成為細路仔將來嘅價值觀同埋品德。所以唔好事事都覺得係小事，作為家長有咗細路仔之後，培養佢哋嘅品德同埋價值觀呢個重任就落喺家長身上面，佢哋嘅價值觀同埋品德其實就係累積自一點一滴喺家長身上學返嚟嘅嘢。所以一個負責任嘅家長，我覺得真係經常要反省一下自己嘅品行同埋表現，究竟會對細路仔造成乜嘢影響！總之作為家長真係要時刻注意其實我哋一言一行正在喺細路仔嘅心入面累積緊，將來成為佢哋做人嘅價值觀同埋品德。教仔無小事，只不過係作為家長嘅又有冇注意咁解！