少年成長今日: 1|主題: 16009

收藏本版

回覆發帖

返回列表

跳至頁

查看: 16136 | 回覆: 0

職業訓練 [複製鏈接]

csir3290

子爵府

積分: 11969

1^#

發表於 24-12-8 10:49 |只看該作者 |倒序瀏覽 |打印

早幾日有個親戚特登打電話畀我，想同我傾下佢個仔嘅情況，事源係佢個仔今年已經中三，但係一路都成績唔好又唔鍾意返學，同屋企人又冇乜嘢好傾，今年仲因為留班所以就變得更加唔鍾意返學，成日為咗返學就同屋企人鬧交，同屋企人嘅關係越嚟越差，成績亦冇因為留班而好咗，反而因為間唔中就唔返學所以成績一啲改善都冇，剛剛過咗學校測驗，有啲科目仲冇返學校考添。屋企人都冇曬辦法但係又為咗唔想同佢嘈，所以對佢冇返學都隻眼開隻眼閉。佢個仔一早同佢哋講話唔鍾意讀書唔想返學，屋企人當然冇應承啦，但係最弊就係兩公婆都要一早返工，根本就管唔到個仔有冇返學，通常都係學校打電話畀家長佢哋先知道佢個仔冇返學。放工返到屋企問個仔，個仔又只係話唔想返，返嚟都冇意思，根本就追唔到，而且根本就冇興趣讀書。其實我呢個親戚為咗唔想同個仔再有啲咩大衝突，都已經隻眼開隻眼閉，淨係想個仔叫做坐到中學畢業就唔理佢，但連佢自己都話咁落去，其實讀唔讀到畢業都成問題。

佢搵我嘅原因係早兩日佢個仔突然間好認真咁同佢講話唔想再喺學校讀書，因為佢話學校嘅社工介紹佢，話畀佢聽可以去讀職業訓練，係職業訓練局開辦嗰啲基礎文憑課程，佢個仔話希望去試下。我呢個親戚有啲擔心，其實只不過係個仔想搵個藉口離開學校唔讀書，而且佢覺得學校社工可能係想幫學校趕佢個仔走，所以先至介紹佢讀職業訓練。我聽完我就問我呢個親戚，其實自己有冇了解過學校社工介紹佢個仔去讀嘅係乜嘢課程，佢話根本就冇時間又唔識搵，所以只係聽個仔講，個仔話係去職訓局讀三年課程就好似中四中五中六咁，讀完就可以攞到張基礎文憑。我聽完個親戚講，都曾經上網幫佢望過搵下啲資料，我先知道原來職訓局有啲咁樣嘅課程，係畀啲中三學生轉讀職業訓練，免費讀三年就好似中四中五中六咁，讀完就可以攞到一張例如工程嘅基礎文憑，如果想讀上去嘅仲可以唔使考文憑試（DSE)用呢張基礎文憑嘅成績就可以轉讀高級文憑，如果最終仲想讀上去嘅話仲可以有埋大學學位添。而呢張基礎文憑最好嘅地方就係其實已經幫佢攞咗個專業資格，如果佢讀工程嘅仲已經可以入行。我睇完曬啲資料之後，都同個親戚講話其實都幾好吖，橫掂你個仔又冇興趣讀書，話唔定呢一種類似職業訓練嘅課程可以唔使成日坐喺班房讀書，學啲技術話唔定佢個仔有興趣呢？但係我個親戚就成日擔心佢個仔咁樣會冇咗中學畢業嘅學歷，又擔心個仔離開咗學校之後就唔讀書，當然更加擔心嘅就係佢唔讀書之後會點。

但係我同個親戚講話既然你個仔都冇興趣讀，再係咁磨落去而家又留班，其實最終都未必攞到中學畢業嘅學歷啦！就算夾硬畀佢上去，佢又考唔考到文憑試呢？到時咪又係連中學學歷都冇！最慘係文憑試成績科科都唔合格，就算畀你坐到中六亦都未必有中六嘅學歷，到時咪又係乜嘢都做唔到，反而去讀職業訓練，萬一如果真係有心機讀落去，到時仲可能有個專業資格有張文憑，可能對佢搵工仲有幫助，又或者到時喺呢一個職業訓練入面佢搵返自己嘅興趣，畀心機讀落去可能發展仲好添，既然都係駁，如果你問我，我就會畀佢嘗試下，話唔定可以搵到條出路。另外既然個仔咁認真同你講，同你商量，打破咗以前嗰啲嘅僵局，其實不如順住落去話唔定仲可以改善大家嘅關係添。如果擔心個仔讀讀吓唔讀，咁既然而家佢肯同你商量，就應該順勢同佢約法三張講清楚，如果讀讀吓唔讀就要出嚟做嘢，到時屋企就唔會再畀零用錢佢，佢需要搵嘢做負擔自己嘅生活。最後我話如果你擔心學校只不過係想搵個藉口趕佢個仔出校，呢個就更無聊，如果係因為覺得學校想趕佢個仔出校而勉強佢繼續留喺度，其實最終就算學校冇要佢個仔走，到頭來冇咗前途嘅都係佢個仔。況且學校社工都係盡責任介紹唔同出路畀佢個仔去嘗試同埋考慮，問心講，如果學校唔理，其實佢個仔繼續咁樣讀落去，最終可能都係留班再留班，其實到頭來都係自己會離開。所以根本就冇必要去諗學校係咪借啲椅想講佢個仔走，反而應該集中諗下其實呢啲意見對佢個仔嘅前途係咪有幫助。

我明白好多家長都希望仔女好好地讀書，一路喺傳統嘅學校小學中學大學咁讀上去，但係事實唔係個個細路仔都適合行同樣嘅路。我呢個親戚起碼都已經算好，起碼很肯嘗試搵途徑去問下人，攞多啲意見。有啲家長甚至乎乜嘢都唔理，淨係覺得每日就係要返學放學，總之就要坐到個中六畢業，完全唔理亦都唔會去搵資料嘗試了解下究竟乜嘢先至係對自己仔女最好，一味只係話冇時間或者唔識搵，亦都唔會同自己嘅仔女去商量下點樣先至係最好。最終搞到親子關係唔好之餘，亦令到仔女錯失咗選擇嘅機會。講真我都係因為呢個親戚嘅電話，我先至上網去睇下究竟呢類課程係點樣樣，睇完之後問心講，如果我自己對仔女讀唔到書，其實我都會認真考慮畀佢哋轉讀呢類課程，因為始終都係有啲專業資格同埋對佢哋將來嘅前途都有幫助。我唔知道我呢個親戚最終會唔會畀佢個仔轉讀呢類嘅課程，但係起碼佢肯問人，肯去搵資料已經係行出咗好開始嘅第一步。我同我個親戚講話其實你細心諗清楚中六學歷係始終都需要考文憑試，佢應該要權衡一下，以佢個仔而家咁樣落去嘅發展，能夠考到文憑試合格嘅機會有幾大，如果考唔到，到頭來浪費咗三年時間之外，其實喺呢三年入面只不過不停幫佢個仔累積挫敗感，而且亦都攞唔到作為家長想佢攞嘅中六學歷。如果只係沿著呢條舊路嘅想法去諗，除非佢個仔中間突然間醒覺，對學習有一個好大嘅轉變，如果唔係你都會預見到其實個結果都未必會係理想，咁點解唔諗吓一啲新嘅方向同埋新嘅發展呢？起碼係呢件事上面可以見到嘅就係個仔肯同佢認認真真咁商量。有陣時我哋固有嘅諗法未必係最好，家長都需要接受新嘅思維，如果唔識，唔好畀藉口自己，係真係需要去搵多啲資料同埋問下人㗎！