少年成長今日: 0|主題: 16010

收藏本版

回覆發帖

返回列表

跳至頁

查看: 18231 | 回覆: 0

一齊去街 [複製鏈接]

csir3290

子爵府

積分: 11975

1^#

發表於 24-12-15 12:30 |只看該作者 |倒序瀏覽 |打印

就嚟又到放聖誕假，所以剛剛先至同老婆商量當對仔女放假嘅時候，同佢哋去邊度放鬆下。但係阿仔同阿女都講話放完假學校就考試所以都唔係好想去旅行。但係又諗下冇理由個假期咁長，日日都喺屋企溫書嘛，而且亦都溫唔到咁多啦，佢兩個咁勤力其實又真係要幫佢哋諗下點樣放鬆，所以都同老婆計劃下同佢哋喺邊度玩下。正如我之前成日都講，就趁對仔女而家都仲肯跟我哋去吓街嘅時候，當係幫佢哋放鬆之餘，其實都係要刻意製造一啲一家人相處嘅時間。

雖然每一日大家都喺屋企見到，好似好多時間一齊咁，但係通常都係我同老婆放工返到嚟，佢兩姊弟都係喺房度做緊功課或者做緊自己嘢，通常都係我哋主動敲佢哋房門睇下佢哋，打個招呼然之後就佢哋繼續做嘢，直至到食飯先至真正一家人坐埋一齊，食完飯之後坐一陣佢哋又各自返房，到差唔多瞓覺先至又再見一見。所以話雖然成日同埋一間屋，但係其實真正坐埋一齊相處嘅時間亦都唔係咁多。所以到放假嘅時候，總係需要搵啲藉口同佢哋去下街，因為一家人出街先至真真正正放低曬身邊其他嘢，就算出街食個飯都叫做多咗啲時間大家一齊傾下偈。所以到而家雖然佢哋都已經中學阿女仲高中添，但係我同老婆都仲會特登諗下搵啲地方同佢哋喺放長假嘅時候，可以一齊去輕鬆一下。

出街諗地方去，亦都有陣時真係需要用心思去諗下，如果成日都只不過係同佢哋行商場，其實講真唔好話細路仔其實自己都會悶，有陣時可能真係要諗下一啲新鮮啲或者佢哋都應該會有興趣嘅地方同佢哋一齊去，咁大家先至有更多交流嘅機會。其中一處其實我同老婆都想去嘅地方就係沙頭角，問咗對仔女之後，一家人就申請咗張一日嘅禁區紙，預備室聖誕假嘅時候就一齊去沙頭角一日遊，本身都有諗過跟本地團去，但係諗下其實對仔女都好似冇乜興趣跟呢啲本地團，所以唯有自己嘥少少心機申請禁區紙，起碼玩時間控制好啲。另外嗰次見阿女同啲同學去完燒烤場燒烤，有得燒嘢食又有得玩，阿女好似好有興趣，就問阿女放聖誕假嘅時候想唔想同我哋去多次，因為阿女去過所以佢都好樂意帶我哋去多一次。

當對仔女越嚟越大，佢哋越嚟越多需要自己嘅時間，作為父母有陣時都要諗下製造一啲機會同佢哋多啲相處，如果唔係，大家嘅距離可能會越嚟越遠。襯住聖誕長假期，大家平日都已經咁忙，所以可能真係要搵一兩日好好計劃一下，全家人一齊開開心心咁去玩下。唔係慢慢你越唔同對仔女出去，越唔同佢哋相處，到頭來佢哋就越嚟越唔跟我哋出街。講真，未必需要用好多錢，就係專登叫啲仔女陪自己去睇下聖誕燈飾都係好嘅，總之就搵多啲機會同佢哋相處建立多啲溝通嘅機會。