少年成長今日: 0|主題: 16012

收藏本版

回覆發帖

返回列表

跳至頁

查看: 27261 | 回覆: 1

體諒 [複製鏈接]

csir3290

子爵府

積分: 11997

1^#

發表於 24-8-11 11:53 |只看該作者 |倒序瀏覽 |打印

同青春期嘅仔女溝通，對家長嚟講好多時都係EQ嘅大考驗，好容易會令到家長發脾氣。青春期嘅仔女通常十問九唔應，一係就敷衍咁答咗，再唔係就乜嘢都唔講，家長問多兩句就畀一個煩厭嘅表情，所以同佢哋溝通真係好容易令人發忟憎。我自己同對仔女相處其中一樣就要學識放低自我。但係對於家長嚟講其實偏偏放低自我就係最難，因為好多時家長都會覺得自己生得仔女出，自然就有權知道仔女嘅一切，生得對仔女出就應該能夠控制佢哋嘅一切，就係呢兩樣嘢令到家長覺得仔女有責任乜嘢都要講畀家長聽同埋要按家長嘅指示而行。但係偏偏呢種心態就同青春期細路仔嘅變化產生最大嘅衝突，因為十幾歲嘅細路仔正正就係想有自己嘅世界有自己嘅諗法，講白啲就係想要更多嘅自由，所以家長越係管束佢哋就越容易反感，越容易想向外衝出去，衝突就會由此而起。

但係作為成年人我哋要知道細路仔去到青春期嘅變化其實好多時都係由身體嘅荷爾蒙影響。好似開始注重自己嘅形象，開始想搵更多嘅認同感等等，一切嘅變化其實都係嚟至佢哋成長中荷爾蒙嘅影響，所以對於佢哋嚟講要控制亦都唔係咁容易。但係我哋作為成年人其實要控制嘅自己嘅情緒相對就比細路仔年青人容易好多，只要我哋明白佢哋成長中嘅變化，接受同埋體諒嘅話，其實衝突就冇咁容易發生。

講真好多時同仔女間嘅衝突都係受大家一時嘅情緒嘅影響，但係我覺得我哋做大人嘅其實更加應該懂得控制自己嘅情緒，如果大家都係火星撞地球就只會火上加油，最弊係家長好多時總係覺得係仔女做錯，就更加容易覺得仔女應該先道歉或者所謂認低威，然之後先至可以平息件事，但可惜嘅係喺呢個時間嘅細路仔受到荷爾蒙嘅影響，變得衝動同埋容易發嬲，亦都更加容易受情緒嘅影響，亦都唔會咁容易認低威，大家各執一詞冇人肯讓步，雖然可能未必會再發展成嚴重嘅衝突，但係只要一方唔出聲到最後大家就只會繼續冷戰或者繼續互不溝通，咁樣對大家嘅關係只會有壞嘅影響。所以我成日都提醒自己要明白仔女都係一個獨立嘅個體，佢哋逐漸長大逐漸需要更多自己嘅空間同逐漸需要有自己嘅諗法，所以就要先放開以為仔女係我哋嘅財產，我哋有權控制佢哋一切嘅諗法。正如我之前講應該畀佢哋有多啲嘅空間同埋做決定嘅機會，家長唔係幫佢哋決定一切而係成為資料嘅提供者讓佢哋自己作決定。再者作為成年人，我哋應該有比細路仔更高控制情緒嘅能力，冇理由佢哋發脾氣我哋又要同佢哋一樣發脾氣，家長更應該要先懂得學習控制自己嘅情緒，當有事發生嘅時候，其實家長先要做嘅反而係先處理咗自己嘅情緒再去處理發生嘅事。好多時家長如果火遮眼嘅時候，眼中就只有怒火，就會忽略咗其他嘅一切，所以我哋作為成年人就更加應該先處理好自己嘅情緒比自己冷靜一下，諗清楚所有嘅選擇，如果我哋自己都唔冷靜我哋又點能夠叫仔女冷靜呢！當我哋冷靜落嚟嘅時候先至有可能會發現有其他更多嘅處理方法。而且仔女見到我哋自己可以冷靜落嚟嘅時候，其實佢亦都會慢慢冷靜。所以我自己都會經常提醒自己當感覺到自己開始脾氣到嘅時候，就要先放低，俾自己冷靜一下然後先至再去處理。當冷靜落嚟嘅時候，我哋就會明白其實我哋係想處理事件而唔係希望破壞大家嘅關係。

我覺得作為家長要應對仔女青春期嘅變化，首要就係慢慢放開家長嘅權威，放開家長控制仔女一切嘅心態，另外亦都要學懂控制自己嘅情緒，凡事都應該先處理好自己嘅情緒再去處理發生嘅事情。咁樣先至能夠同仔女繼續保持良好嘅關係。