少年成長今日: 0|主題: 16016

收藏本版

發帖

返回列表

跳至頁

查看: 23279 | 回覆: 0

暑假 [複製鏈接]

csir3290

子爵府

積分: 12031

1^#

發表於 24-7-7 10:33 |只看該作者 |倒序瀏覽 |打印

就嚟又到放暑假，細路仔唔需要返學多咗好多時間，有部份多家長可能擔心仔女時間太多，所以都開始幫啲仔女搵啲暑期班，尤其是係啲雙職父母，父母都返曬工，屋企得返仔女但又唔使返學，所以最好就係搵到啲暑期班畀佢哋去上堂，等佢哋唔好有咁多空閒時間唔知做乜，又驚佢哋成日匿埋喺度打機，更甚嘅就係出咗街唔知去邊度最驚就係佢哋學壞。

我同老婆都係雙職家長，都係由朝返工返到晚，雖然屋企有工人姐姐睇住對仔女，但我哋都經歷過呢個階段。我同老婆喺對仔女好細個嘅時候就明白，如果喺對仔女細個嘅時候能夠培養到佢哋有規律嘅學習習慣嘅話，咁到長假期嘅時候，其實就算冇乜特別嘢畀佢哋做，亦都唔需要咁擔心。而呢啲訓練應該越細個開始就越容易做到。所以我好記得當年阿仔阿女開始讀幼稚園開始，到佢哋放暑假嘅時候，我同老婆都會分別攞大假陪佢哋放暑假，當然除咗陪佢哋玩下之外，我哋更加重要嘅就係希望係呢段時間開始訓練到佢哋有自己學習嘅習慣。而且當年佢哋只係幼稚園，功課壓力唔大，係呢個時間開始幫佢哋建立習慣就最好。我哋當年想建立嘅習慣其實好簡單，就喺放暑假期間，朝早起身之後都係要佢哋習慣好似返學咁做咗應該要做嘅嘢，跟住喺晏晝食完飯之後，就係佢哋嘅玩樂時間。為咗有呢一個習慣，所以當年朝早當然唔會係一早起身啦！但係起身之後食完早餐就會做少少嘅練習，而且因為佢哋仲細，所以需要爸爸媽媽坐喺側邊同佢哋一齊做，千祈唔好又係以為擺低啲練習佢哋就會自己做，反而應該坐喺佢側邊陪佢哋一齊做，都係啲少量嘅練習只不過係要佢哋適應，係要做完學習上面嘅嘢然之後先至去玩，做完練習之後就係練琴。因為啲練習容易而且壓力又唔大，又有我哋同佢哋一齊做，所以佢哋都好容易掌握而且好容易習慣，到下晝因為我哋攞咗假，所以就可以陪佢哋出去公園玩或者喺屋企自己玩。慢慢等佢哋適應咗呢個規律，到我哋放完假開始要返工之前，就嘗試畀佢哋自己做練習同埋練琴，不過當然做完之後我哋都要檢查同埋睇返佢哋做成點啦！而且仲要成日稱讚佢哋，等佢哋知道父母係欣賞佢哋嘅做法。慢慢常規就會建立，到我哋返工我哋依然都係會畀低練習佢哋自己做，不過最緊要嘅就係放工返嚟一定要睇佢哋做成點，同埋要睇返佢哋嘅練習，等佢哋知道佢哋每日做嘅嘢家長都會檢查返。而且要成日讚賞之餘仲要令佢哋覺得做完嘢先至玩會玩得比較開心，因為唔需要擔心住幾時要做返啲嘢。除此之外，適當嘅獎勵亦都需要。另一方面，我哋攞假陪佢哋放暑假嘅時候，除咗同佢哋建立學習嘅常規之外，我哋仲會陪佢哋一齊睇書去圖書館幫佢哋建立閱讀嘅習慣。其實所有呢啲嘢只要家長肯擺時間很擺心機，其實喺細路仔細個嘅時候都係相對容易建立到嘅習慣。呢個生活習慣去到佢哋讀小學嘅時候，其實已經建立得好好，根本唔再需要我哋擔心佢哋會淨係顧住玩唔做嘢。去到高少嘅時候已經唔需要再特別攞假去陪佢哋放暑假，就算係攞假都只不過係陪下佢哋去旅行去玩下，因為佢哋已經慣咗起身就先做學校嘅嘢，同埋練琴睇書。

要陪仔女去養成學習習慣，聽起上嚟好似要用好多時間同埋心機，但係如果喺佢哋細個嘅時候就幫佢養成呢啲習慣，其實到佢哋慢慢長大家長要花嘅時間反而少好多。好似我而家對仔女讀中學咁，已經唔需要再為佢哋嘅暑假而擔心，驚佢哋有過多嘅空閒時間，反而覺得應該畀時間佢哋休息同埋做自己鍾意做嘅嘢，因為去到呢個時間，其實仔女要求我哋嘅反而係更多嘅信任，相信佢哋能夠管理好自己嘅時間。好似阿仔咁早兩日已經派咗暑期作業，但係我見到佢已經開始做緊，而阿仔阿女喺暑假都要做好多本書嘅閱讀報告，呢輪見得佢哋最多嘅就係睇書。所以我始終都覺得如果家長肯喺仔女細個嘅時候放多啲時間落去陪佢哋建立常規同埋習慣嘅話，效果一定好過只係搵唔同嘅暑期班畀佢哋充塞時間。我覺得家長要記住要建立常規唔係淨係靠把口叫佢哋做就可以，而係需要家長用時間用心機陪伴佢哋一齊慢慢建立。付出嘅時間係有回報嘅，喺仔女細個嘅時候響付出呢啲時間到將來佢哋長大其實反而會用少咗時間同埋少咗擔心。