少年成長今日: 1|主題: 16033

收藏本版

發帖

返回列表

跳至頁

查看: 24713 | 回覆: 0

開學 [複製鏈接]

csir3290

子爵府

積分: 12136

1^#

發表於 24-9-15 10:29 |只看該作者 |倒序瀏覽 |打印

話咁快就放完暑假又開學，家長千祈唔可以睇輕開學呢個時間，如果處理得好除咗減少以後爭拗嘅機會亦都會增強大家溝通嘅機會，令到親子之間更加多話題。

首先一開學，我對仔女每一日返到屋企都非常知多嘢講，因為好似好耐冇講學校嘅嘢咁，所以每一日我同老婆放工返嚟，佢兩個就會一輪嘴咁圍住講好多學校嘅嘢。因為好多對於佢哋嚟講都係新鮮嘅嘢，所以佢哋好想講畀我哋知。例如今年有邊啲新老師教佢哋，有邊啲老師佢哋唔係咁鍾意，又會講下班上面嘅新同學，又好似家姐咁，今年第二年做領袖生，好多關於領袖生嘅嘢佢又會講，家姐今年又畀老師揀咗做功課輔導員，要去低班幫手教啲學弟學妹功課，好多會議都要佢哋自己籌備，佢間唔中都會問下我同老婆嘅意見。細佬又會講下佢今年畀老師揀咗做體育幹事，講下佢練波嘅情況，又會講下佢哋籌備活動嘅會議等等，總之好多嘢講！但係對於家長嚟講，聽起上嚟又好似係啲雞毛蒜皮嘅嘢，家長返完一整日工返到屋企，當然好攰想有自己嘅休息時間，我自己都好理解，但係當對仔女一輪嘴咁喺度同我哋講嘅時候，如果只係敷衍咗佢又或者甚至乎唔應，慢慢佢哋就會覺得同我哋傾計冇趣，所以就算點攰，到坐埋一齊食飯，佢哋講嘅時候，我哋都要畀啲反應同佢哋一齊傾，我哋仲會講返我哋以前細個讀書嘅情況同佢哋比較一下。有啲家長可能會因為攰又或者覺得佢哋講嘅嘢雞毛算皮而冇乜反應，但係亦會有啲家長借呢啲機會嚟說教。我就覺得兩樣都唔，好其實細路仔呢啲時候仲肯同家長講咁多佢哋見到嘅嘢，其實無非都係想分享下佢哋嘅經歷，作為家長唔好說教之餘仲要畀到反應，咁就可以慢慢培養到佢哋繼續同我哋傾計，正如我上次講，如果你想啲仔女當我哋係朋友咁，我哋就要記住點解佢哋會同朋友傾計，就係因為同朋友傾計會傾得開心，同朋友傾計會有認同同埋唔會說教。咁係呢啲鎖碎事上面，其實正正我哋做家長就要發揮朋友嘅角色，咁佢哋先會習慣多啲同我哋傾計。而且我哋要意識到究竟幾時其實仔女係想向我哋求助，想我哋畀啲意見，例如我頭先講阿仔今年畀老師揀咗做體育幹事，佢要負責設計一張海報，阿仔都會問我哋意見，喺呢個時候我哋就要嘗試畀啲意見，例如佢設計咗出嚟，我哋覺得點，當然唔好淨係彈都要讚，阿仔又會問我比賽嘅章程應該要包括啲乜嘢，咁我又會同佢一齊上網搵下，睇下有冇啲其他比賽嘅章程可以參考下咁。總之做家長，我明白放工雖然好攰，但係都唔可以放棄同仔女溝通嘅機會，唔係到頭來又會埋怨點解仔女乜嘢都唔同自己講。

另外一樣如果喺開學時期處理得唔好嘅嘢，就會好容易產生爭拗。呢樣就係功課同埋溫習嘅問題，家長應該趁開學嘅時間，尤其是係初小嘅細路仔，慢慢開始幫佢哋培養做功課同埋溫習嘅習慣，當中當然牽涉好多技巧，我之前都有講過，但係我覺得好重要嘅就係應該趁學期初開始，家長每晚都應該幫佢哋睇下啲功課同埋開始幫佢哋溫下啲默書測驗。因為你唔趁學期頭開始建立呢啲習慣，去到學期中發覺佢哋做得唔好嘅時候，其實想改就已經困難好多。我自己就覺得就算點冇時間，每一晚都應該要開始檢查佢哋嘅功課，趁學其初功課少啲亦都容易啲建立呢啲習慣，我覺得家長未必需要幫仔女睇功課的對錯，但係起碼都檢查一下佢做曬啲功課未。咁樣先至會令到仔女開始明白自己嘅責任，就係每一日放學返嚟就要做功課同溫習。除咗檢查功課之外，如果要默書仲要用少少時間幫佢哋溫下默書。只有由學其初開始建立呢啲習慣同常規，細路仔先至會比較容易適應，產生爭拗嘅機會亦都相應減少。

總之家長千萬唔好睇輕開學呢個時間，其實好多習慣同常規都係應該由呢個時間開始去建立，如果唔好好利用呢個時間去處理，將來發覺有問題時，只會需要用更多嘅時間去改正。

0 0 0

私人傳訊

跳至頁

返回列表

上一主題 • 下一主題

回覆

發帖

頻道

討論區

熱門搜尋：

少年成長 今日: 1|主題: 16033

少年成長今日: 1|主題: 16033