少年成長今日: 0|主題: 16009

收藏本版

發帖

返回列表

跳至頁

查看: 26663 | 回覆: 0

私人空間 [複製鏈接]

csir3290

子爵府

積分: 11973

1^#

發表於 23-10-22 10:53 |只看該作者 |倒序瀏覽 |打印

屋企裝修完之後，阿仔阿女都有自己嘅房，隨之而出現嘅就係阿仔阿女多咗時間喺自己間房閂埋房門唔知做乜，我相信呢個都會係好多家長遇過嘅問題。以前因為阿仔阿女係同一間房，而且佢都仲細所以佢哋兩個嘅活動範圍一般都係個廳入面，不論係做功課或者玩，佢兩個都會喺個廳到進行，所以每一日返到屋企都會好熱鬧，因為佢兩個都喺個廳度一入到屋就見到佢哋。但係而家情形就有啲唔同，佢哋兩個都有自己間房，各自放學之後都會入咗自己房度做功課練琴或者做自己嘢，好多時返到屋企一開門就覺得好似冷清咗，因為通常都淨係見到老婆自己坐喺個廳度，好似冇咗以前嗰種熱鬧，開頭都有啲唔慣，以前嘅我入咗屋之後第一時間就會埋去攬下佢哋，但係而家就變咗係放低曬啲嘢先至各自敲門入佢哋房睇下佢哋做乜嘢。相反而家反而係多咗時間得我同老婆兩個自己喺個廳度，不過幸好佢兩個間唔中都會走出嚟個廳度睇下我哋兩個做緊乜嘢，出到嚟又會同我哋傾下計，以前好多時間聚埋一齊，但而家反而更加珍惜食完飯大家一齊坐喺個廳度睇一陣間電視嗰段時間，因為跟住佢哋坐一陣又會各自返房溫習或者完成未做完嘅工作。少咗時間一齊喺個廳度，當然會少咗時間一齊傾偈，還好我哋全家一向溝通嘅模式都係好多嘢講，所以佢哋喺廳嘅時候我哋都仲會有好多嘢一齊傾，而且我哋都繼續保持一啲大家一齊嘅生活習慣，例如例牌我哋星期六晚，一定會大家坐埋一齊飲汽水食薯片然之後睇一套電影。所以雖然少咗時間一齊坐喺廳但係大家溝通嘅機會亦都冇少到。

佢哋各自有咗自己嘅房間，其實我哋做家長亦都要開始尊重佢哋有自己嘅私人時間同埋空間，我時刻都要提醒自己要尊重佢哋自己嘅私人空間，所以當佢哋閂埋房門各自喺房嘅時候，我哋都盡量唔會隨便入去，當然開頭一定會擔心佢兩個唔知各自喺房度做乜嘢，但係其實諗深一層，我哋都要對自己嘅仔女有信心，因為佢哋係我哋兩公婆教出嚟嘅，所以就算佢哋閂埋房門喺房入面好耐，我同老婆一般都唔會干涉佢哋，甚至乎我要入佢哋間房我都會先敲門唔會隨便就衝入去，要知道當細路仔一路長大嘅時間，其實佢哋都會爭取有自己嘅空間同埋時間，如果家長太過干涉太過管束，反而會增加大家嘅拗撬。家長可能有個感覺就係其實細路仔所有嘅嘢都係嚟自家長，家長當然有權去管束同埋控制，細路仔講乜嘢私人空間同時間呢？就係呢一套諗法有陣時就會令到家長忽略咗細路仔喺長大時候嘅需要。家長好多時都會好擔心細路仔一唔喺自己嘅視線範圍嘅時候，就唔知佢哋會做乜嘢又會驚佢哋犯錯又，所以成日有意無意之間就會侵入咗佢哋嘅私人時間同埋空間，家長想知道細路仔究竟做緊啲乜嘢，自自然然就希望隨時隨地都監察到。但係正正就係呢一個對私人空間同埋時間睇法上面嘅矛盾，就產生咗好多細路仔同家長之間嘅拗撬。所以我哋真係要慢慢放手畀啲仔女，當然亦都要從中細心觀察佢哋嘅轉變，不過當然最重要嘅就係要對我哋嘅仔女要有信心，畢竟佢哋都係我哋一手一腳教出嚟嘅。

除咗實體嘅空間之外，其實網上嘅世界亦都係一樣，而家我對仔女都有自己嘅ig，佢哋都會同自己嘅同學朋友喺網上面溝通，社交平台亦都係佢嘅私人地方，作為家長亦都要去尊重，有啲父母可能好想自己嘅仔女加埋自己入去佢哋嘅社交平台，好多時以命令嘅方式，但係仔女又唔係咁願意，因為覺得父母都係想入去監察佢哋同埋干涉佢哋同朋友嘅溝通。所以我就用咗個相反嘅方法，就係在仔女未有社交平台之前，我間唔中都係自己嘅社交平台到post 一啲 story，亦都會間唔中同佢哋一齊睇社交平台，首先當然係順便教佢哋一啲上網嘅價值觀，同時因為令到佢哋想追看我個社交平台，所以令到佢哋都想有自己嘅社交平台帳戶，用嚟到追看我同老婆平時出嘅post，就係咁自自然然佢哋就會加咗我同老婆入去。不過更重要嘅就係我哋要懂得尊重佢嘅私隱同埋佢發表嘅權利，所以當佢哋出post嘅時候我同老婆都會第一時間like佢哋，其實就好似同朋友之間喺社交平台嘅相處一樣。慢慢產生互相尊重而佢哋亦都唔介意畀我哋知道佢哋出啲乜嘢嘅post，遇到啲好笑嘅嘢仲會一齊分享添。

所以當仔女一路長大，其實做父母亦都要學懂去尊重仔女希望有自己嘅空間同埋時間，唯有懂得互相尊重先至能夠增進大家嘅溝通同埋關係。家長以為自己可以控制一切，隨意入侵仔女嘅私人空間，到頭來只會令到仔女嘅私人空間變得更加封閉變得更加唔容許家長進入。懂得尊重先至係促進溝通嘅最有效方法。