懷孕前後今日: 16|主題: 330350

收藏本版

發帖

返回列表

跳至頁

查看: 5753 | 回覆: 40

我的生產記（超長文） [複製鏈接]

12 3

janetysc

大宅

積分: 2890

1^#

發表於 16-9-19 17:42 |只看該作者 |倒序瀏覽 |打印

9月3日，寫於仁安醫院

我既baby boy終於喺開學日下晝兩點幾出世啦~
我之前仲一直擔心bb會遲出世，
因為醫生話bb係大碼bb，
驚佢遲出世會好大件，我到時就好難生，
分分鐘試產無效要開刀~

我既預產期係9月2（結婚週年月）
我好想bb係我同老公既結婚週年月先出世~
所以一直唔敢食涼野，怕佢提早8月出世~
直到8月30 and 31號，我見未生得，
就連續兩日，每日食左半個中size西瓜，
希望BB準時出世，唔好遲~
點知真係8月31號晚食完，
我9月1零晨三點幾去廁所時就見紅啦~
西瓜果然好有效!!!!!

見紅時其實我都有d迷茫係咪要去醫院呢？
但我見人話第一胎無咁快生，我又無痛無穿水~
諗左一陣我又好淡定咁返上床瞓等下先~
到大約四點，我feel到開始陣痛啦，
即刻用apps check住時間~個時係15分鐘痛一次~
但又唔係好痛，似係少少m痛咁，
所以我都忍到，仲瞓著左~
直到六點幾我痛醒左啦，
個時既陣痛係好痛既m痛咁，
仲六七分鐘痛一次，
每痛一次我就忍唔住打老公幾下發洩~
但我又唔知點解自己個時仲唔去醫院~
直到七點幾，我見去到五分鐘痛一次，
就決定沖個涼再叫細佬過黎車我同老公去醫院啦~

八點出門口，因為塞車搞到成九半先去到醫院~
媽咪都話我開學日好大機會塞車呀！
點解唔早D去醫院！
去到醫院，我同姑娘講我見紅同陣痛，
佢同我入左待產室check下~
一check之下，我原來已經開到四度，
佢奇怪點解我咁忍得痛，痛到四度先入院~
仲話你而家係準備生啦，唔可食野飲水！！
我即時呆左，因為之前一晚淨係食左d蕃茄炒蛋
同飲左節瓜湯咋~飯都無食~
而家早餐又無食，我點有力生呀？
仲要係大碼b喎！！

醫生十點幾黎左睇我，
仲叫姑娘幫我人手穿水，等我快d生~
（老公完全唔知我俾人穿左水，
因為我叫左佢落去食早餐）
到左十一點幾，我都仲係keep住得四度，
仲可以同媽媽&老公輕鬆吹水~
醫生就決定打催生針，呢針堅有效，
到左差唔多十二點就開到八度，
但我竟然仲忍到，唔洗用笑氣，
我仲心諗咁既痛就係八度拿?
點知好快，我就開始左十級痛既
來回地獄又折返人間之旅><

到左十二點幾，我開始痛到死去活來啦~
每次陣痛之間只隔1分鐘，
每痛一次我就狂聞笑氣~
我以為已生得~點知姑娘再check,
我都仲係開得八度！！！！
救命呀！！點解仲係得八度ga?!
醫生再黎左睇我，話再睇多一個鐘，
如果仲係無進展就可能要開刀啦><

到左一點幾，我陣痛去到只隔30秒一次，
開始痛到一路聞氣一路呀呀聲~
我都知會嚇親其他未生得既媽媽，
但我真係忍唔到呀~
仲聞到唔放手，要老公用力抆開><
隔一陣，姑娘見我呀到就死咁就再幫我check~
個刻，佢終於話生得啦！！！！
我都已經痛到唔知個時係幾點啦~

入到產房，醫生好快黎到~
聽到佢把聲，我知道自己真係要生bb啦~
我竟然失控咁喪喊，醫生同姑娘問我咩事,
我都答唔出，總之係好驚好驚，驚到喊~
所以我係一路生一路喊，
喊到都唔聽醫生指示亂用力~
我全程聽得醫生講得最多既說話就係：
XX(我個名）妳而家做咩事先，
唔好喊嘥哂啲力！妳咁會整親bb咖~
老公就喺我隔離不斷勸我要冷靜~同埋錫下我♡

喺我一輪喪喊亂用力之後，
我既七磅六bb終於喺兩點幾出世啦~
但我個刻仲未平復到情緒,
連bb出左黎之後姑娘抱bb喺我隔離,
我都繼續喊唔望bb~
要姑娘抱起bb錫下我先冷靜返d~
所以第一張全家幅係影到我個喊完樣，好肉酸~
醫生整完哂d野就講笑咁問我仲生唔生，
生就考慮開刀啦，妳咁樣唔得咖~
我咪話我係驚，唔係怕痛><
（我無打止痛針，又無選擇做無痛分娩）
到今日第三日住院，醫生都仲拎返個日黎講笑><
我諗返個過程都覺得自己痴線同好肉酸吖~
老公又成日扮返我嗰時點喊，正衰人！！

Anyway, 感恩bb健健康康出世，
亦感受到媽媽當年生我出黎既辛苦~
我仲記得喺我喪喊既時候，
好似小朋友咁喊住叫左句媽咪呀~
原來喺最害怕既時候係會諗起媽咪~
希望我自己都可以好似媽咪咁，
可以成為到bb既一個安心依靠♡