DAY 1
由於旺季都多人,都預左DELAY,差不多遲左一個鐘先起飛,幸好台中是細機場,好快過關同拎好行,司機已經係出面等我地,仲帶我地去中華電訊買電話卡(要登記PASSPORT)
之後出發食清水米糕,不過原來係有少少辣的,之後就去梧棲漁港掃街同買手信,3老同3小都食同買得好開心.個零鐘左右我地就去左高美濕地,夕陽好靚,不過好大風,由於好凍我地冇比小朋友落水玩,但佢見到係好想落的,仲見到彈塗魚同招潮蟹,3個小朋友都好興奮.
跟住去碧根行館CHECK IN 之後去逢甲夜市再掃街,相對六合,士林等,可能因為年三十,相對失色.
DAY 2
第一站包車司機帶我地試芋圓,都好味,之後去百菇莊採菇,買香菇餅做手信好好食.小朋友採菇好開心,唔貴HKD $50-60,即採即整埋香菇酥好好味.
之後去左包車司機提議的安妮公主而冇去多人到的薰衣草森林,因平地多較?細小朋友,結果因為有個戶外沙池,3個都玩得好開心,甚至話最開心係玩沙,我諗下次去沙灘得啦,唔洗去旅行.食物好食,影相都靚.跟住放好電,上車就訓下又到廣興紙寮,參觀完玩拓印,一人整左一個扇.跟住又去18度c巧克力食雪糕.有免費咖啡同茶飲,好多人
再上清境CHECK IN愛立家旅遊民宿.由於玩左成日,今晚決定係民宿食火煱,價錢平,3個細最鐘意任食的王子麵.夜晚睇星星,我仲好似見到流星.
DAY 3
一早出發去清境農場羊咩咩表演,3個小朋友騎大馬,單人100TWD,雙人150TWD,不過個圈有D細,再睇綿羊脫毛SHOW,再摸羊餵羊,影相,大個個完全唔驚,細個2個嫌棄綿羊既口水.之後再行去睇馬術SHOW都幾遠,要預留時間.個日好曬,我同老公都曬到LUC皮.我想講成日話好凍,我去個幾日都好熱XD
之後行番去小瑞士紙箱王食LUNCH送小瑞士門券,唔洗錢都OK.之後同細個2個番去民宿休息下,5:30去伊拿谷甕缸雞,呢間包接送,食物唔錯又平,8個人有魚又蝦又雞HKD$600唔洗.
DAY 4
一早先出發去民宿放低行李,再去搭纜車去九族文化村,唔洗點排隊玩遊戲,食物唔貴,3個細都開心,撞啱有奧特曼展,啱晒2個仔.
回程搭番纜車去日月潭,沿住湖邊行去伊達邵老街,試左飯飯雞翅、杰記山豬肉大刈包、年記做不復賣,紅茶但杜啦白鰻棍我地遲左,食唔到,相對逢甲,呢到食物更有特色.
DAY 5
又係一早出發,包車司機帶我地試阿婆香菇茶葉蛋,好入味,好味!之後去水沙連睇睇,再去集集火車站同集集老街影相行下.
跟住去彩虹眷村,小小一個地方,但影相效果好好,但3個細被遊樂場吸引住,佢地影左好少相.之後去寶島53行館CHECK IN,再去左國立自然科學博物館,
由於唔夠時間,無睇太空劇場、立體劇場,生命科學廳有恐龍最啱小朋友睇,行完生命科學廳去左科學中心幼兒科學園,呢個限每節40人,不過唔去唔太大損失,
另外,半導體的世界要拎預約券,我地太遲冇得玩了.之後去左SOGO,食滿堂紅,都抵食,但唔叫做好好味,有好多款HD雪糕任食.都抵食110CM以下只需100TWD.
跟住搭免費車回酒店(用一卡通(出發前去TST拎免費的)市區公車享10公里免費優惠),我鐘意呢間多過碧根.我仲去7-11 拎埋博客來訂既書,好方便.
DAY 6
起身去買手信一福堂檸檬餅,台灣太陽餅博物館買蜂蜜太陽餅(好好味),犁記買鳳梨酥再去宮原眼科食雪糕,我覺得一般般,但好多人排隊.
之後包車到機場,今次只係遲左少少就起飛.
包車司機唔錯,有禮貌,揸得安全,架車又大又舒服又乾淨,大仔同婆婆易暈車浪都最少上清境冇嘔,而且不單準時仲好早到,清境個日佢怕塞車,仲早左個幾鐘到.