終於要做第一次IUI…….
9月1日Day 14覆診, 好緊張… 因為上一個CYCLE 諗住做IUI已第4次食排卵藥,但唔知點解會無卵 (之前3 次都有),好驚今個CYCLE又會無反應。 好采今次左邊有1 粒卵夠大 20X14 , 當日即刻打左破卵針, 約9 月2 日做IUI….
9月2日Day15
今日約左2 點鐘係仁安做IUI, 先生要12點前先去仁安留精, 然後要2 個鐘洗精。我1 點45分到達, 姑娘安排我入左去一個細細既房到預備, 姑娘幫我照超聲波睇下情況,由於醫生話要急尿先可以做IUI,但我仲未有急尿既感覺, 所以要不停飲水。然後姑娘比左先生洗精子後既報告我睇, 我有少少驚訝先生的精子形態洗精前差少少先合格,之前Body check已驗過2 次, 都無問題既, 估唔到結果會係咁,醫生話唔緊要,只要休息多D,食多D蕃茄及維他命C就會好D,處理過後都合格既……
2 點10分,醫生入黎開始做IUI。其實我反而唔太緊張,因為聽講話唔痛,無咩感覺,而且好快。醫生拎住條幼管既物體放入我身體入面,
哇…..都痛架wo… 感覺似做子宫頸檢查咁, 但再痛D, 不過頂得住既, 支管隊左入去, 撩撩下咁,痛左大約2分鐘到啦, 之後醫生再郁一郁就唔再痛喇,跟住叫我望下個MON, 話我知D精精已經經過條管入左去喇,成個過程好順利,10分鐘內完成。跟住係床到休息左15分鐘,期間姑娘入黎同我講IUI後要注意事項同埋比左支驗孕棒我,叫我16 號自己驗。 之後我就起身走喇, 除左個肚有少少谷谷地, 少少扯住既感覺就無其他特別
9 月3 日 Day16
個肚谷谷地同扯住既感覺強烈左, 有少少痛。醫生叫我同先生今晚再TRY 一TRY 增加機會。我有用熱水浸腳, 個肚FULL 暖貼, 同埋要塞2 粒藥。
宜家等派彩啦, 雖然唔敢抱太大期望, 但真係希望希望希望中呢…………..